Ọbadaya 1

Ohomorihi ộ sị ụya rị Anedomi.

1Â nyị ọnọrụ ọnyara aanị ọnị ịrẹha rị Ọbadaya. Ẹnẹyịmavara Ochẹtẹẹngụ ộ sị ịsa ene vee tu anẹkụra Edomi zụ ọ. Anedomi nịnị ẹ̀ raà wụ́ enube ọnọọ hụụnị ụvọ Ẹnẹyịmavara, dị ọnụtụ anị rẹ raà kà a yị anẹkụra nịnị ana vọ nị. Ẹnẹyịmavara kà anẹkụra ẹnẹẹ è tenyi ẹngụ, dị ẹ gẹ ịrẹkụ tù Anedomi nịnị. 2Ẹnẹyịmavara kà ọnị vaa va Anedomi nịnị nọ ẹtẹ ịnị akakana anẹkụra ana vọ, dị ọzọza kụkụ aa sị eyi wụ̀ wa. 3Ọyị sị ẹngụ tụ ẹba Anedomi nịnị ọ sị wa vene. Agụvị ka ẹẹ ra ịrẹsụ ataba, dị ẹ sị ịrẹta-ịrẹta jị ọvọ okiri-okiri kara ohyẹtẹ ẹkụra ẹnịnị, di ê ro ka ẹ yị nyị anẹkụra ẹnyẹnyị ene zu ziizi ẹnị ụvọ nị. 4Ẹnẹyịmavara kà Anedomi nịnị ẹ̀ẹ daka dà irehi ẹnịnị tụ́ aha ana nẹba anka ịzị ọkasịmẹẹ̄ mẹ ịrẹngwẹ anị tụ́, ẹ̀ẹ hyakụ na dà irehi ẹnịnị tụ́ ẹbẹẹba kere-kere ịnị akakana ụzọmị, ọnị vee tura wa chi vẹ ẹtẹ. 5Ọ kà, oyi nịnị ẹ̀ẹ ngụ tu ọza ịrahụ, ịsa ọnị e yee sì kẹnẹ ẹ yaa sị hụụ ịzọọ nị. Avọọ aza anaā kụ́ ịsa ọyịnaa gụ́ ịnị aarẹ mẹ̄ rẹ navọ ịzaha tịtẹ yị oniruwa nịnị. Ama ọnịvị Anedomi nịnị vi ene vee hí wa hụyẹ-hụyẹ za ẹtẹ ịhị eyi ẹnịnị ọ̀ọ nị. 6Ẹwụ nịnị evere Iisọ re! a vaa kụ́ avaba ogu awụ nịnị ọnị ụ maanị chi ayị za aanị. 7Avaba anẹkụra ẹnị ẹwịrị wa vịdị ze vee vene wụ nịnị. Ẹnịnị vaa va ụvọ beri ọnịvị awụ nịnị, dị ẹ dụ wụ jịnẹ hụụnị ẹkụra awụ nịnị. Aza ẹnị ụ sị ayị tụra, dị ẹwịrị wa aa rị ịsa vabẹ, ẹ vaa va ịrẹpa zi wụ, di eyi awụ nịnị e yi hweyi tụ́ wa. 8Ẹnẹyịmavara kà, ịhị ọnị àa pa ịva yị Anedomi aanị, dị ọnị wụ̀ avaba ọyẹrẹyị ẹnịnịị vaa ha. Ẹ yị kụkụ vaa nyị ọza ọnị eyi anị hweyi tụ́ ịrẹsụ ataba ịzị evere ẹnịnị ra hi. 9Avaba isoja ene hi ẹkụra ọbanyị ẹnịnị ana aā hị́ Itemani vị ọnị ayị ẹnịnị vaa sẹ hi ịnẹ. Ẹ yị nyị isoja ẹnịnị ana vaa ha.

Anedomi nini ẹ̀ chamayị yị Anisirẹrị

10Agụvị ka ệ dọ ezi Ijekọvụ ọnị ẹnịrị wa vị ezi ẹyịnyara ẹnya, dị ẹ wụ̀ wa, a vee vu wa ẹtẹ, dị ọ vị ụhị wa pooro zịna-zịna. 11Ẹnịnị vị ana ha ẹtẹ tụ Anisirẹrị ịnị ụmẹ ana vọrọ ka ẹ sị gụ wa ụvọ. Dị anẹkụra ọsa ngụ tu Anisirẹrị nịnị dị ẹ kụ ogu ẹnịnị, dị ẹ̀ ga ẹtẹ ẹnịnị hi ẹngụ ụvọ nị. Anedomi nịnị vị ana sị zụ ka ẹnịrị ọnịvị Anisirẹrị nịnị ẹ ya tu wa nị. 12Ẹ́ yị vọrọ ka Anedomi nịnị ẹẹ jẹ ka ịrẹyị odivi o tu wa, a vị dị ayị ẹnịnị oo hine ka Anijuda ee vú ẹtẹ. Ẹ́ yị vọrọ ka ẹnịnị ee wu hi wa ịnị ụmẹ ọnị o si divi yị wa. 13Ẹ́ yị vọrọ ka Anedomi nịnị ẹ ngụ tu aza Ohomorihi ẹkụhị ọnị ịrẹyị odivi sị tu wa. E yi rere ka ẹnịnị ệ kụ ogu Anisirẹrị nịnị ịnị ụmẹ ẹngụkata sị tụ wa. 14#Ayị 34.5-17; 63.1-6; Ijer 49.7-22; Ezk 25.12-14; 35.1-15; Emọ 1.11,12; Ịma 1.2-5Ẹ yị vọrọ ka Anedomi ệ jẹvẹnẹ tụ ịzị oze ahẹva, dị ẹẹ wụ̀ Anisirẹrị nịnị ẹnị usu jị avị eyi nyee, ne tu ka ẹ za aza ẹnyị chire ọnịvị ẹnịnị ụvọ ịnị ẹkụhị ayodu ẹnịnị.

Ẹnẹyịmavara ộ vu Anedomi nịnị ẹtẹ

15Ụmẹ ọnị Ẹnẹyịmavara vaa sị họ̀ oponu ịrẹsụ avaba anẹkụra ẹnẹẹ aa gụrị ẹtẹ. Avaba odivi ọnị Anedomi nịnị mẹ̀ vị ana vaa vẹ ịrẹsụ ẹnịnị. 16Anka ẹnịnị mẹ mẹ̀ aza Ẹnẹyịmavara ana ra ịrẹsụ ataba anị ẹsẹvẹsẹvẹ, avọọ gẹdẹ-gẹdẹ anẹkụra ana kara wa mẹ vaa sị eyi ẹnịnị re ẹẹva nị. Ẹnịnị vaa rị ụya ana ngụ ajẹ, di e su, dị ayị ẹnịnị hí ịnị ẹhẹ.

Ẹnẹyịmavara ộ sị Anisirẹrị nyị ẹbẹẹba

17Ama Anisirẹrị nịnị vaa dọ ẹtẹ ana vị ẹnịnị varẹma hụụnị ụvọ aza ana ba wa uchi ụvọta. Ijerusarẹmị vaa vị aha ọnịnị ịzị aza vee zwe naa tẹ̀ hi. 18Ezi Ijekọvụ ọnịrị ezi Ijosẹẹhụ vaa sịị mẹẹ anka ịra ana vaa rị ezi Iisọ anka ịra mẹẹ̄ rị ugugu ọchị akụ ịnị aarẹ avọọ nị. Ẹnẹyịmavara kà ẹ yị nyị ezi Iisọ ana vaa ha vụrụ-vụrụ. 19Anisirẹrị nịnị ene hi eyi ụvẹtẹ Ijuda ẹ vaa nyị ẹtẹ ézi Iisọ ịrẹsụ ataba nị. Ẹnị ene hi inozi iruvo ataba ẹtẹ Anihwirisiti nịnị vaa dọ ẹtẹ Ehwireemi ọnịrị Ịsamarịya nịnị. Ịbẹnjamịnị nịnị vaa dọ ẹtẹ Anigiriyadi. 20Dị Anisirẹrị nịnị ana vaa vavẹ eehi hụrị Ihara vaa dọ ẹtẹ hụrị Ihwonesiya huu na ngụ Ịzarẹhwatị. Aza ana kụ hụrị Ijerusarẹmị ana ya Ịsẹhwaradị ẹ vaa nyị Ịnẹgẹvị (eyi ụvẹtẹ) Isirẹrị nị. 21Aza ẹnị Ẹnẹyịmavara dọ ha vaa ra ịrẹsụ ataba Ịzayọnị, dị ẹ̀ yaa mẹ̀ ịjọva tụra Anedomi ịrẹsụ. Ẹnẹyịmavara vaa vị ohinọyị tụra wa ịrẹsụ.

Currently Selected:

Ọbadaya 1: EBTP

Highlight

Copy

Compare