Ịrịka 6

Ido ọza ana a sị nyị yị Ohomorihi

1Ẹnẹyịmavara ộ ka yị Imosiisi 2ka ọ kà yị Anisirẹrị nịnị ka; Àa nyị ọnọrụ a vị ọnẹẹ ana ka ọnị a sị ẹngụ anị chire Ohomorihi ụvọ dị ọnị ọ vị ọtirenyi, 3#Irk 1.15ẹ yị kụkụ vee hú eche ọnyọọnyị; ọ yị vee hú eche ịvayịnị ana raà sụrẹyị ọnịrị igirepi, ọ yị rẹ vaa rị ẹtụtụ igirepi ọnyọọnyị ana sị wụ̀. 4Ẹnịnị yị vaa rị ịsọyịrị ana sị ẹtụtụ ọchị ẹnẹẹ mẹ. 5Ẹnịnị ẹ yị yaa kụ́ ịrẹsụ ịnị avaba ụmẹ ọnị ẹ sị ẹnịnị tụ́ irenyi yị Ẹnẹyịmavara. Ẹnịnị ẹ̀ raà sị ẹngụ ẹnịnị tụ́ irenyi. 6Ẹnịnị rẹ vaa sị ụvọ kanyị oku ene su pooro ịnị avaba ẹhẹ ẹnịnị. 7Ọ vị ada, ọ vị ọnyị, ọ vị ọyịnyara ọnọrụ a vị ọnẹẹ òo su, ẹnịnị ẹ yị nyayịnẹ sị ụvọ kanyị oku anị. 8Avọọ ẹ mẹẹ vaa mẹ ịnị avaba ụmẹ ọnị ẹ́ sị vị ọtirenyi yị Ohomorihi nị. 9Àa nyị ọza mẹmẹ su gụrị ẹngụ aza ẹnẹẹ vi ene du ẹyị ịrẹsụ ẹnịnị ẹngụ. A nyị ka ẹ hụụnị ịnị akakana aza ẹkụhị ịhịmba, dị ẹ kụ ịrẹsụ àaa mẹ ido anị 10Ịhị ẹ tụ ọ ẹkụhị ịhịnta, dị ẹ̀ sị arekuku ẹẹva ne tu ohirẹsụ irehi Ohomorihi oze anaā ngụ ajẹngụ Ẹnẹyịmavara 11Dị ohirẹsụ irehi Ohomorihi sị arekuku ọnya mẹ̀ ịsọvọ ịvị, dị ọ sị ọsa mẹ̀ ịsọvọ anaā rị ịra. Avaba ịsọvọ ẹnịnị vị anaā gụ wa ẹngụ agụvị ka ẹ sị ụvọ kanyị oku. Ịhị ọnọọ gẹdẹ-gẹdẹ a raa varẹma tenyi sị ẹyị ẹnịnị chire Ohomorihi ụvọ nị. 12Ịrẹma ọnọọ, a nyị ka e tenyi sị wa chire Ohomorihi ụvọ agụvị ka eku ẹnẹ vịdị hị́ ò si du. Agụvị avọọ dị a sị atẹmẹ ịrayị ọnya mẹ̀ ịsọvọ ịvị wa. 13#Ụkọ 21.23,24Ọda ana za aza ana sị ẹngụ ẹnịnị tụ irenyi yị Ohomorihi yị. Ịnị ịsọvọ ọdịrẹma ana aā mẹ̀, dị ọzịnya-ọzịnya ẹnịnị na ọvịdị oze ana na ngụ ajẹngụ Ohomorihi, 14dị ọ mẹ̀ ịsọvọ ẹnịnị yị Ẹnẹyịmavara. Dị ọzọza sị ozi ịdẹba ịrayị ọnya ọnị ẹ yị nyị ụkụ mẹ̀ ịsọvọ anaā rị ịra, dị ọ sị ozi atẹmẹ ịrayị ọnya ọnị ẹ yị nyị ụkụ mẹ̀ ịsọvọ ịvị. Dị ọ rẹ sị ịdẹba ana nyị ẹngụ anị mẹ̀ ịsọvọ ẹngwọọrọ, 15ne beri ụvụrẹẹdị ẹnẹ ẹ yị nyị owu uji ọnya, ọnịrị Ịbụrẹẹdị ana a sị angwẹ orivi na vaka ibisikiiti ọnị angwẹ orivi ya ịnị anị. Dị ẹ rẹ sị ayị ọnịrị eche mẹ̀ ịsọvọ. 16Di ohirẹsụ irehi Ohomorihi sị ịsa ịsọvọ ẹnịnị na ọvịdị Ẹnẹyịmavara nị. Dị ọ mẹ̀ ịsọvọ ịvị ọnịrị ịsọvọ anaā rị ịra. 17Ọ vavẹ ịrẹma ẹnẹẹ, dị ọ sị ịdẹba ọnịrị ụvụrẹẹdị ẹnẹ ẹ yị nyị owu uji ọnya mẹ̀ ịsọvọ ẹngwọọrọ, ne beri ịsọvọ ayị ọnịrị ịsọvọ eche. 18Avaba ẹnẹnị ẹ ta mẹ, dị ẹnị ana aā nyị tụ irenyi aanị kụ́ ịrẹsụ ẹnịnị ọvịdị oze ajẹngụ Ohomorihi, dị a rị ẹyị ịra ịnị ịra ana aa ka hi ịsa ịsọvọ ẹngwọọrọ. 19Àa ra kụ wa ịrẹsụ, dị ohirẹsụ irehi Ohomorihi va sị ịrẹsụ ịza ịdẹba ọzịnya-ọzịnya ana a chịnẹ ọnịrị Ịbụrẹẹdị ẹnẹ ẹ yị nyị owu ọnya, ne beri ibisikiiti ọnyọọnya tụ wa ụvọta. 20Dị ọ kụ̀rà ẹyịza ẹnẹẹ tụ ẹba hi Ẹnẹyịmavara anka ịsa ịsọvọ. Avaba ịsa ẹnẹẹ ẹnịrị uye ịrẹva ọnịrị usi ẹ sị vị Ẹnẹyịmavara yị ohirẹsụ irehi Ohomorihi. Àa maanị sị ọ mẹ, dị aza ana a nyị tụ irenyi aanị nẹngụ hu eche. 21Aanị a mẹẹ̄ za ido aza ana ra sị Ẹnẹyịmavara nị. Àa nyị ọza ịnị ẹngụ ẹnịnị ana zẹ ịzẹzẹ ịsa ọsa, dị ọ mẹ anka ịsị ọ ka.

Aduwa ọnị ohirẹsụ irehi Ohomorihi vaa mẹ yị aza

22Dị Ẹnẹyịmavara kà yị Imosiisi ka, 23Eerọnị ọnịrị ezi anị ẹ maanị mẹ̀ aduwa yị Anisirẹrị nịnị: ẹ kà a ka, 24Ẹnẹyịmavara oo sere wa, dị ọ mẹ ka oo zee yị wa. 25Ọ navọ ọọ ngwayị ẹnịnị, dị ọ̀ rẹẹ va ayị ẹnịnị. 26Ẹnẹyịmavara ọọ mẹ ọyịza yị ẹnịnị, dị ọ̀ mẹ ẹngwọọrọ yị ẹnịnị. 27Dị Ẹnẹyịmavara kà Eerọnị ọnịrị ezi anị ẹ̀ẹ ka ọnị ọ mẹ ka o zee yị Anisirẹrị, ọnị vaa mẹ̀ ka o zee yị wa.

Currently Selected:

Ịrịka 6: EBTP

Highlight

Compare

Copy