Ịrịka 36
36
Ogu ẹtẹ mẹmẹ tu anyẹnẹẹ ịnị ovwoovu
1Â nyị ụmẹ ọnya aanị ọnị ohi-ohi ovwoovu ịrẹsụ Igiriyadi ana vị ozi Imakiri aazị Ịmanasẹ ozi Ijosẹẹhụ ẹnịrị ohi-ohi ovwoovu ana vọ ịnị ẹtẹ Isirẹrị ne tu Imosiisi. 2#Ịrị 27.7Dị ẹ kà Ẹnẹyịmavara ọ mẹ̀ ọda ka ọ ga ẹtẹ yị Anisirẹrị nịnị, dị ọ sị ọnyịrẹva Izerohwehadi ọhụva ẹnịnị yị ezi anẹẹ anị. 3Ẹnịnị ẹ̀ẹ nyị anịrẹsụ ọsa, a sị ẹtẹ ana vị ẹnịnị ịnị ẹtẹ ohiku na vaka ẹtẹ aza ẹnị nyị. Avọọ aa mẹ vaa sị ọ hụụnị ẹtẹ ana vị ịrẹsụ ẹnịnị nị. 4Ịnị ịrayị ẹvarẹwụ ọnị Anisirẹrị nịnị sị dọ ogu ẹnịnị varẹma yị ọza ana nyị ịsa anị, a vaa sị ẹtẹ ezi anẹẹ Izerohwehadi hụụnị ẹtẹ ịrẹsụ ada ẹnịnị yị wa, dị kụkụ vị ogu anịrẹsụ ọva ẹnịnị pooro zịna-zịna. 5Agụvị avọọ Imosiisi mẹ ọda ọnị Ẹnẹyịmavara kà yọ yị Anisirẹrị nịnị nị. Ọ kà ịrẹyị ọnị ịrẹsụ Ịmanasẹ ka vị ịzẹyịza. 6Agụvị avọọ Ẹnẹyịmavara kà ezi anẹẹ Izerohwehadi ẹ zụ va ọnọrụ ene ze wa eyi, ama ẹ̀ vị anẹkụra ẹnịnị kẹnẹ. 7Ogu Anisirẹrị ọzọza vị ana vaa ya ịnị ogu ẹkụra anị. 8Ọnyẹnẹẹ ana àa sị ogu yi hụụnị ovwoovu anị ịnị ẹkụra ọnyọọnyị ịnị ẹtẹ Isirẹrị, anẹkụra ọnọọ ọ rẹ vaa va nị. Àa maanị aa mẹ̀ ẹ, Anisirẹrị ọzọza vaa sị ụvọ za ogu ohiku ẹnịnị. 9Ogu ẹnẹẹ ẹ yị vaa hụụnị ụvọ anẹkụra ẹnyị naa ngụ ịnị ụvọ anẹkụra ọsa. Ẹkụra ọzọza vaa sị ụvọ za ogu anị. 10Ịzẹyịza ezi anẹẹ Izerohwehadi ệ na mẹ anka Ẹnẹyịmavara mẹ̀ ẹ ọda yị Imosiisi. 11Ezi anẹẹ Izerohwehadi ẹnẹnị ẹ rị: Ịmara, Itiriza, Ihogira, Imika ọnịrị Inowa nị. Ẹnịnị ệ na va ẹnị ẹnịrịị vị ezi ẹyịnyara ịnị ada. 12Ịnị ịrẹsụ ezi Ịmanasẹ ozi Ijosẹẹhụ ẹnịnị va ọnọrụ hi nị. Ogu ẹnịnị vana yị ya ịnị ịrẹsụ ada ẹnịnị ịnị ẹkụra ẹnịnị. 13Ẹsẹnị ẹ vị ọda ọnị Ẹnẹyịmavara raà sị̀ yị Imosiisi ka ọ sị yị Anisirẹrị nini ịnị inozi Imowabi ọ gụrị Ijodani akẹnẹ Ijeriko ana vịdị hị́ Okuha Ịjọdanị.
Currently Selected:
Ịrịka 36: EBTP
Highlight
Share
Compare
Copy
Want to have your highlights saved across all your devices? Sign up or sign in
Ebira First Bible © Bible Society of Nigeria, 2014.
