Ịrịka 34
34
Ẹhwị ẹtẹ Ikanaani
1Ẹnẹyịmavara ộ kà yị Imosiisi ka, 2ọ̀ mẹ̀ ọda yị Anisirẹrị nịnị, dị ọ kà yị wa ịzị ẹ vị ẹhwị ẹtẹ Ikanaani ana vị ogu ẹnịnị ọnị ẹ ya vaa ngụ aanị. 3Ẹhwị anị eyi ụvẹtẹ vaa hụrị ịnị ụnọmị Izini na ngụ akaha Edomi nyima hụụnị ẹtaha eyi ụvẹtẹ oku ịkẹ. 4Ẹhwị anị eyi ịzị ọyị zị ngụ ẹtẹ, ọ za oze Akirabimi na ngụ Izini, na ngụ Ịkẹdẹsị Ibaneya. Avọọ ọ mẹ ngụ Ihazari Adari huu ngụ Azimoni. 5Hụrị Azimoni na ngụ Okuha Ijipiti na ta ha Òkū Imeditareniya. 6Ẹtaha ẹtẹ ọnọọ eyi ịzị ọyị zị ngụ ẹtẹ ọ vị utenyi Òkū Imeditareniya nị. 7Ẹhwị ẹtẹ ọnọọ eyi ẹbẹẹba vi ene nyima hụrị utenyi Òkū Imeditareniya huu na ngụ ataba Ihuuri. 8Dị ẹtẹ ọnọọ hụrị ịzọọ na ngụ Irebo Ihamati, di o che parahu na ngụ Izedadi. 9Dị ọ vavọọ na ngụ Izihwironi, dị ọ ta hi Ihazari-Enoni. Ẹhwị ọnị eyi ẹbẹẹba ẹtẹ ọnọọ za yị. 10Ẹhwị ẹtẹ eyi ịzị ọyị zị hụrẹ vẹ vị ene nyima hụrị Ihazari-Enoni na ngụ Isehwami, 11dị ọ va chi na ngụ Iribira akaha Ayini, dị ọ hụrị ịzọọ na ngụ oku Chinereti ana a raà hị́ Òkū Igariri. 12Avọọ ẹhwị ẹtẹ ọnọọ mẹ na ngụ Okuha Ịjọdanị parahu na jẹẹ Irehu Anọ. Avaba ẹhwị ẹtẹ Anisirẹrị jesi kara ọ vị ọnọọ nị. 13#Ịrị 26.52-56#Ijos 14.1-5Dị Imosiisi ka yị Anisirẹrị ka, ẹtẹ ọnọnị Ẹnẹyịmavara sị yị wa ka ọ vị ogu ẹnịnị. Ẹnị ịrẹsụ ịhịịna ne beri achẹva Ịmanasẹ a vee si ụvọ zee dị aa ga ẹ yị wa nị. 14Aa vịdị raà sị ẹtẹ yị ịrẹsụ Irubẹnị ọnịrị Igadi ne beri achẹva Ịmanasẹ nịnị. 15Ẹtẹ ana ya akẹnẹ Okuha Ịjọdanị eyi ịzị ọyị zị kwẹẹtẹ ana va eyi ka Ijeriko ọ vị ẹnịnị nị.
Ọdọvịdị nịnị ene sị eyi pe ẹnya ọyị ga
16Dị Ẹnẹyịmavara kà yị Imosiisi ka, 17Eriyaza ọnịrị Ijosuwa ana vị ozi Inuni ẹ vị aza ana vaa ga ẹtẹ ọnọọ yị wa nị. 18Ọ kà Imosiisi ọ nyị ọdọvịdị ọnyọọnya hụrẹ ịrẹsụ ọzọza ana vaa gụ́ wa ụvọ. 19Ịrẹha aza ẹnẹẹ yị: Ikarẹbị ozi Ijehwụnẹ hụrị ịrẹsụ Ijuda, 20Ịsẹmụwẹrị ozi Amihudi hụrị ịrẹsụ Isimiyọnị, 21Eridadi ozi Ikisironi hụrị ịrẹsụ Ịbẹnjamịnị, 22Ibuki ozi Ijogiri hụrị ịrẹsụ Ịdaanị, 23Ihanịweri ozi Ehwodi hụrị ịrẹsụ Ịmanasẹ, 24Ịkẹmịwẹrị ozi Isihwitanị hụrị ịrẹsụ Ehwireemi, 25Erizahwani ozi Ipanachị hụrị ịrẹsụ Izeburuni, 26Iparitiwẹrị ozi Azanị hụrị ịrẹsụ Iisaka, 27Ahihudi ozi Iseromi hụrị ịrẹsụ Asahwi, 28Ipedaheri ozi Amihudi hụrị ịrẹsụ Inahwitari. 29Aza ẹnịnị Ẹnẹyịmavara nyị ka ẹ ga ẹtẹ Ikanaani yị Anisirẹrị nị.
Currently Selected:
Ịrịka 34: EBTP
Highlight
Share
Compare
Copy
Want to have your highlights saved across all your devices? Sign up or sign in
Ebira First Bible © Bible Society of Nigeria, 2014.
