Ịrịka 27
27
 sị ẹtẹ yị ezi anẹẹ Izerohwehadi
1Â nyị ọnọrụ aanị ana aā hị́ Izerohwehadi ana vị ozi Ihehwa, ana vị ozi Igiriyadi, ana vị ozi Imakiri, ana vị ozi Ịmanasẹ, ana vị ozi Ijosẹẹhụ. Izerohwehadi ọnọọ ộ ma ezi anẹẹ-anẹẹ ẹẹhị ana aa hị́ Imahira, Inowa, Ihogira, Imirika ọnịrị Itiriza. 2Ẹkụhị ọnya aanị, dị ezi anẹẹ ẹnẹẹ nọ ịnị ajẹngụ Ẹnẹyịmavara ịzị e ne tụ́ Imosiisi ọnịrị, Eriyaza ne beri ọdọvịdị Anisirẹrị nịnị vaka ọkọnị Anisirẹrị. Dị ezi anẹẹ ẹnẹẹ kà, 3ada ẹnịnị ẹ̀ yị ma ozi ọnọrụ di o ve su ịnị ụnọmị. Ọ yị ịnị aza ana saasa Ikora mẹ̀ akamawụ hí Ẹnẹyịmavara, ama usu ịvị ẹngụ anị o su nị. 4Sị ẹ vẹ dị a ka ịrẹha ada ẹnịnị o vu, agụvị ka ọ yị ma ozi ọnọrụ wáá yọ? Dị ẹ ka Imosiisi ọ sị ẹtẹ ana vị ịpa ada ẹnịnị yị ẹnị nị. 5Imosiisi ộ sị ịrẹyị ẹnịnị vị ọvịdị Ẹnẹyịmavara, 6dị Ẹnẹyịmavara kà a yị Imosiisi ka; 7#Ịrị 36.2ịsị ẹ vọrọ ezi anẹẹ Izerohwehadi họ̀ use anị aanị nị. Agụvị avọọ, Imosiisi ọ̀ sị ẹtẹ ana vị áada ẹnịnị ịdị anda ada ẹnịnị yị wa. 8Ẹnẹyịmavara kà Imosiisi ọ ka yị Anisirẹrị nịnị ka ọza ẹnẹ ẹ̀ yị ma ozi ọnọrụ di o su, a sị ẹtẹ anị yị ezi anẹẹ anị. 9Ama ẹ̀ yị ma ozi vụrụ-vụrụ, dị a sị ẹtẹ anị yị ẹyịnyara anị. 10Ẹ yị nyị ọyịnyara, a sị ẹtẹ anị yị ẹyịnyara ada anị nịnị. 11Aa vị ka ọ yị nyị ọyịnyara ụvọta ọnịrị ọyịnyara ada, a sị ẹtẹ anị yị anda ana gụrị ọ huu kere-kere. Ẹnẹyịmavara kà avaba Anisirẹrị ẹ sị ụvọ za ọda ọnọnị pooro.
 nyị Ijosuwa dọ Imosiisi ịrẹsụ
(Ọda 31.1-8)
12 #
Ọda 3.23-27; 32.48-52 Ẹkụhị ọnyara aanị, dị Ẹnẹyịmavara kà Imosiisi ka ọ hịrẹ nọ ịrẹsụ ataba Abarimi, di o re ẹtẹ ọnị raà sị yị Anisirẹrị nịnị. 13Òo sị ọ re, o vee su anka ẹnẹbẹnị anị Eerọnị me su avọọ. 14Ẹnị ẹyịva ê su agụvị ka ẹnịnị ẹ sị ahụ jịnẹ ọda Ẹnẹyịmavara ịnị ụmẹ ọnị avaba ịragụ Anisirẹrị sị zyaazị hị́ ọnị agụvị enyi Imeriba ịnị ụnọmị Izini. 15Imosiisi ộ mẹ̀ aduwa, dị ộ kà, 16Taarụ! Ẹnẹyịmavara Ohomorihi ana yẹ ịsa ya ịnị ayị ẹyọza, navọ wa nyị ọza ana vaa vị ọdọvịdị yị Isirẹrị. 17#1 Ohi 22.17; Ezk 34.5; Imt 9.36; Ịmk 6.34Ọza ọnọọ ọ vaa kụ́ aza nọ ịrẹkụ agụvị asị aza anị sị mẹẹ anka atẹmẹ nịnị ẹnẹ ẹ yị nyị ọza ene sere e avọọ. 18#Kụra 24.13Dị Ẹnẹyịmavara kà Imosiisi ka ọ sị Ijosuwa ozi Inuni ọnị Ụhwẹ Ohomorihi yà pe, dị ọ sị ụvọ tụra a ịrẹsụ. 19Dị ọ sị Ijosuwa jẹẹ ọvịdị Eriyaza ana vị ohirẹsụ irehi Ohomorihi ọnịrị avaba ịragụ. 20Dị ọ si ụkata yọ, dị avaba ịragụ ọ sị ịrẹsụ yọ. 21#Kụra 28.30; 1 Ịsa 14.41; 28.6Ama Ijosuwa vaa nọ ọvịdị Eriyaza ohirẹsụ irehi Ohomorihi, di Eriyaza sị urimi ne sì iruvo ịrẹyị ịnị ụvọ Ẹnẹyịmavara, dị ọ kà a yị wa ịsị a vọrọ ka ẹ̀ mẹ ẹ̀ẹ yaa jịnẹ ọnịrị ẹ̀ẹ yaa vẹ ini eehi. 22Ịzẹyịza dị Imosiisi vavọọ mẹ̀ ẹ anka Ẹnẹyịmavara mẹ ka yọ, dị ọ sị Ijosuwa jẹẹ eyi Eriyaza ọnịrị avaba ịragụ Anisirẹrị; 23#Ọda 31.23dị ọ sị ịrẹsụ, dị ọ sị ọ jẹẹ ka ọ vị ọdọvịdị anka Ẹnẹyịmavara mẹ ka nị.
Currently Selected:
Ịrịka 27: EBTP
Highlight
Share
Compare
Copy
Want to have your highlights saved across all your devices? Sign up or sign in
Ebira First Bible © Bible Society of Nigeria, 2014.
