Ịrịka 23
23
Enube Ịbaraamị ịpaapa
1Ịbaraamị ộ ka yị Ịbarakị ka ọ hì ụta ịsọvọ ịhịmba tụ ịzọọ, dị ọ sị ụnọ ịhịmba ọnịrị ịdẹba ịhịmba vẹ. 2Ịjị Ịbarakị vavọọ raa mẹ̀ ẹ, dị ẹnịnị sị ụnọ ọnya ọnịrị ịdẹba ọnya mẹ̀ ịsọvọ ịrẹsụ ụta ịsọvọ ọnyọọnya nị. 3Dị Ịbaraamị kà yị Ịbarakị ka ọ jẹẹ pe ịsọvọ anị, dị ọnị ọ jẹẹ oboka ọnya, ẹyịyara Ẹnẹyịmavara vaa sị ẹngụ zụ ọnị. Ịsa tụra ịsa ọnị Ẹnẹyịmavara ọ́ kà ọnị vaa ka nị. Dị Ịbaraamị ọnịnya hịrẹ nọ ịrẹsụ ataba nị. 4Ịjị Ẹnẹyịmavara vee tu Ịbaraamị, dị Ịbaraamị kà ọnị o reè tenyi ụta ịsọvọ ịhịmba, dị ụnọ ọnịrị ịdẹba ana a sị mẹ̀ ịsọvọ ya ịrẹsụ ụta ọnyọọnya nị. 5Dị Ẹnẹyịmavara kà yị Ịbaraamị ịsị ọ vaa ka yị Ịbarakị, dị ọ ka ò nee tu ọ nị. 6Ịzẹyịza, dị ọ vavẹ vee tu ọ ka Ịbarakị jẹẹ akaha ịsọvọ anị beri avaba ọdọvịdị Animowabi nị. 7Dị Ịbaraamị kà, Ịbarakị ohinọyị Animowabi ộ sị ọnị hụrị ịrẹsụ ataba Aramị vẹ ịzẹnị nị. Ọ kà ọnị o chi hi Anisirẹrị, dị ọnị o du wa. 8Ọnị mẹmẹ nyẹngụ chi hi aza ọnị Ẹnẹyịmavara o yi chi hi? Ọnị mẹmẹ nyẹngụ ka ọhịmị aza ọnị Ẹnẹyịmavara o yi du. 9Ọnị ee re wa hụrị ịrẹsụ ataba, ẹnịrị aza ẹ yị vahụra. Ẹẹ jẹẹ te yị ẹngụ ẹnịnị nị. 10Ẹnịnị ẹ rụrụ anka ezi ịnị eteesu. Ẹnẹ zụ za wa ịrịka? Navọ ọnị o su usu ẹngwọọrọ ọnịrẹyịzẹyịza, dị ẹtaha anị ọ ya anka Anisirẹrị. 11Dị Ịbarakị kà a, sị Ịbaraamị aa mẹ aanị? Ọnị ka ọ tụ́ ozirenu hi ọnịvị anị, dị ahịka aa mẹ̀ aduwa ka o zee yị wa nị. 12Ịbaraamị kà a, ịsị Ẹnẹyịmavara kà kẹnẹ ọnị zụ ka nị.
Enube Ịbaraamị ọhụva
13Dị Ịbarakị sị kà ọ saasa ọnị nọ aha ọsa ịzị o vee re wa. Oo vee re ịpa ẹnyị ẹnịnị, dị o chi hi wa yị ọnị. 14Avọọ, dị ọ Ịbaraamị nọ ịnozi Izohwimi na ngụ ịrẹsụ ataba Ipisiga nị. Dị ọ hi ụta ịhịmba, dị sị ụnọ ọnịrị atẹmẹ mẹ̀ ịsọvọ tụra ịrẹsụ ọnyọọnya nị. 15Dị Ịbaraamị kà a Ịbarakị ọ jẹẹ pe ịsa ịsọvọ anị, dị ọnị o nee tu Ẹnẹyịmavara eyi ọsọọ nị. 16Dị Ẹnẹyịmavara ve tu Ịbaraamị, dị ọ kà ịrẹyị yị ọ ka ọ varẹma na ka yị Ịbarakị nị. 17Ịjị Ịbaraamị ne tu Ịbarakị ọnịrị ọdọvịdị Animowabi nịnị jẹẹ pe ịsa ịsọvọ anị, dị ọ kà a ịsị Ẹnẹyịmavara kà yọ nị. 18Dị Ịbaraamị tụ̀ ohi ka Ịbarakị ozi Izipọ si ụtọ pe ẹtẹ dị ọ wụ́ ịrẹyị anị. 19Ohomorihi ọ yị vị ọzarẹyịrẹsụ. O yi mē cheeche, a vị dị ọ vara ayị anị. Ịsị ọ ka ọọ̄ mẹ̀ nị. 20Ọ kà ọnị ọ ka a ka o zee yị wa. Ohomorihi ọ̀ọ ka o zee yị wa, ọnị ẹ yị zụ vara a. 21Ọnị ẹ yị re odivi a vị akanya ini ẹhẹ ẹnịnị. Ẹnẹyịmavara Ohomorihi ya pe wa; ọnị ọ vị ohinọyị ẹnịnị nị. 22Ọnị ana kụ wa hụrị Ijipiti vị ana nyị ụkata anka ụnọ avọọ. 23Ẹ yị nyị ahọ̀nọ a vị ẹbẹ ọnị ọza zụ mẹ dị ọ za Anisirẹrị nịnị. Kana eyi dị wee re ịsị Ohomorihi raà mẹ yị wa. 24Anisirẹrị nịnị sị mẹ anka idu ana nyị ụkata avọọ nị. Ọ yị tụ́ ụhwọ́ ẹ yị vị ọ rị uye ọnị ọ za, dị o hu anị. 25Dị Ịbarakị kà, Ịbaraamị ò yi chi hi wa, asị ọ rẹ mẹ̀ aduwa ka o zee yị wa. 26Ịbaraamị kà ọnị ọ vịdị raà ka yọ ka ịsị Ẹnẹyịmavara ọ ka ọnị vaa ka nị.
Enube Ịbaraamị ọhụta
27Dị Ịbarakị rẹ ka Ịbaraamị ọ vẹ ẹnị ẹ na aha ọsa, ẹyịyara Ohomorihi vee chi hi wa yị ọnị ịzọọ. 28Avọọ ọ mẹ sị Ịbaraamị nọ ịrẹsụ ataba Ipiwọ ana va inozi akẹbẹẹba irehu anọ chire. 29Dị Ịbaraamị kà a yị Ịbarakị ka o hi ụta ịhịmba tụ ịzọọ, dị ọ sị ụnọ ịhịmba ọnịrị atẹmẹ ịhịmba ana a sị mẹ̀ ịsọvọ. 30Dị Ịbarakị mẹ̀ avaba ịsa ọnị Ịbaraamị ka ọ mẹ nị.
Currently Selected:
Ịrịka 23: EBTP
Highlight
Share
Compare
Copy
Want to have your highlights saved across all your devices? Sign up or sign in
Ebira First Bible © Bible Society of Nigeria, 2014.
