Ịrịka 19
19
A mẹmẹ nyịna ịvị kwooze
1Ẹnẹyịmavara ọ̀ kà a yị Imosiisi ọnịrị Eerọnị ka, 2ẹ ka yị Anisirẹrị nịnị ka ẹ za ido ọnẹnị. Ọ kà ẹnịnị ẹ̀ sị imaaru ovivi ọnị ẹ yị nyị ụkụ, dị ọza ẹ yị vịdị sị mẹ̀ ụkọrọ ịnị aarẹ da va yị wa. 3Imosiisi ọ̀ sị ọ yị Eriyaza ana vị ohirẹsụ irehi Ohomorihi, dị aa sị ọ nọ ịrẹma ẹkụra, dị aa wụ́ ọ eyi anị. 4Eriyaza ọ sị igege da anị ụpẹ ịhịmba, dị o che sẹ enoze ajẹngụ Ẹnẹyịmavara. 5Ọ vavọọ sị ọ mẹ dị ọ rị avaba ịtụmpa anị ọnịrị uye anị ne beri anị, na vaka ẹnyịnịnẹ anị ịra saka-saka. 6Eriyaza ọ sị ọkụ isida, ọnịrị avọ avị ana aā hị́ ihisopu ne beri owu ovivi tụ́ ịnị ịra anị. 7Ohirẹsụ irehi Ohomorihi ọ̀ọ sị mẹ ta, dị ọ hụ enyi, dị ọ nyịna awuru anị, dị ọ va zụ ngụ ịzị aza hi. Ama ịsa ọnị ọ mẹ aanị ó re du ọ ẹngụ. Ọ yị vaa nị pooro dị oruva anị o tù. 8Ọza ana rị imaaru ọnọọ ịra vị ọnị rẹẹ̀ vaa hụ enyi dị ọ nyịna achị anị. Ịsa ọnị ọ mẹ aanị o reè du ẹngụ pooro dị oruva anị o tù. 9#Ihib 9.13Ọza ana àa nị ọ́ zụ na kụ́ atịtọ imaaru ana a rị ịra aanị ne hì ịrẹma okokoro ajẹngụ ẹnịnị. Atịtọ ọnọnị vị ana aā kụ́ hi aha ana nị agụvị aza ẹẹ ka a vahụra enyi dị ẹ hụ ọ nyịna ẹngụ ẹnịnị hụụnị ịvị ọnị ẹ mẹ. 10Ọza anaa kụ́ atịtọ ọnọnị gụ vị ọnị ọnị rẹ vaa nyịna achị anị, dị ọ hụ enyi. Ọnị ọ yị rẹ nị pooro ngụ oruva anị. Ọda ọnọnị vị ana ya ịzọọ pooro ya Anisirẹrị nịnị ọnịrị anikinami anaa ra beri wa. 11Aza anaa sị ụvọ kanyị oku, ẹ yị nị. Aa nyị ka o jị obori ẹnịnị ẹkụhị ịhịmba. 12Aa nyị ka ẹngụ aza ẹnẹẹ ẹ hụ enyi ana sị atịtọ tụ́ ịhị ẹ tụ ọ ẹkụhị ọhụta ọnịrị ẹkụhị ịhịmba, dị ẹ nị ịhị. Ama ẹnịnị ẹ̀ẹ yị vara ẹngụ ẹnịnị ọnịnị ịnị ẹkụhị ọhụta ọnịrị ẹkụhị ịhịmba, ẹnịnị ẹ yị nị. 13Aza anaa kanyị oku ọza, dị ẹ yị hụ enyi ana a sị atịtọ vahụra dị ẹ nị nị, ẹnịnị ẹ ra du irehi Ẹnẹyịmavara ẹngụ. Agụvị avọọ asị a ro wa vaka Anisirẹrị nịnị nị. 14Ọza òo su ịnị ajẹngụ, ọda ana za ẹ yị; avaba aza ana ya ajẹngụ ọnọọ ọnịrị avaba aza ana ngụ ịzọọ ịnị ụmẹ ọnọọ ẹ yị nị. Ẹ vaa za ido anị ẹkụhị ịhịmba. 15Avaba ẹnya ẹnẹ ẹ yị nyị òkù ịnị ajẹngụ ọnị oku su tụ́ ẹ yị nị. 16Ọza tụra ọza ana sị ụvọ kanyị ọza ana a sị ụhwọ wụ́ ẹhẹ, a vị ọza ene su usu ozu anị, a vị ka vị o su nị, a vị ka wa sị ụvọ ka nyị ẹchụkụ ọza, a vị ikuta, ẹ yị nị ẹkụhị ịhịmba. 17Aza ẹnẹ ẹ yị nị ẹ sị atịtọ ụnọ ana rị ịra, dị ọ ka a tụ́ ịnị ẹnya, dị ọ ka enyi ene si hi ọ. 18Ọza ana ra vara ọnịnị ọ sị avọ́ ọchị ana hị́ ihisohu dị ọ jị ọ ngụ enyi dị ọ chesẹ avaba ịsa ene hi ịnị ajẹngụ Ẹnẹyịmavara ne beri aza ene hi ịzọọ, ọza ana sị ụvọ ka nyị oku, a vị awụ ọ nị, a vị ka vị o su usu ozu anị nị, avị ka wa sị ụvọ ka nyị ẹchụkụ ọza, avị ikuta. 19Ịhị ana tụ ọ ẹkụhị ọhụta ne beri ẹkụhị ịhịmba ọza ana sị vara ọnịnị o che enyi sẹ aza ẹnẹ nị ẹngụ. Ịhị ana tụ ẹkụhị ịhịmba aza vara ọnịnị ẹ nyịna awuru ẹnịnị, dị ẹ hụ̀ enyi, oruva ọnọọ ẹ va vara ọnịnị. 20Ama aza ẹnẹ nị, dị ẹnịnị ẹ yị nyịna ẹngụ ẹnịnị, ẹnịnị ẹ yị kụkụ va yị ịnị evere Anisirẹrị nịnị, agụvị ka ọ ra vara irehi Ẹnẹyịmavara ịsa ịdọtị. Enyi ana sị vara ọza ọnịnị, ee yi chesẹ wa ẹngụ. 21Ọda ọnọọ nị va naa va sị ahụ chire pooro. Ọza ene che enyi sẹ aza ẹngụ ọyị vara wa ọnịnị ọnị ọ rẹ bẹdọ nyịna ịta anị, aza ana sị ụvọ kanyị enyi ana sị vara aza ọnịnị ẹ yị va nị pooro di oruva o tu. 22Ịsa tụra ịsa ọnị ọza ẹnẹ ẹ yị nị ọ̀ọ sị ụvọ kanyị, ọza tụra ọza ana kanyị ọ, ẹ yị va nị pooro di oruva o tu.
Currently Selected:
Ịrịka 19: EBTP
Highlight
Share
Compare
Copy
Want to have your highlights saved across all your devices? Sign up or sign in
Ebira First Bible © Bible Society of Nigeria, 2014.
