Inehemaya 6

Ẹngụkata ana a kụ tụ Inehemaya

1Ịsanbaratị, Itobaya ọnịrị Ịgẹsẹmị Anarabi neberi ọnịvị ayị ana vọ ệ wụ́ ka me reè tenyi ọvọ ọnọnị tụra ta, ama mệ yị kụ ukere chire oze ọbanyị nịnị ve tu ụmẹ avọọ, 2dị Ịsanbaratị ọnịrị Ịgẹsẹmị tụ́ hị́ mị ka ẹmịrị ẹnị ẹ̀ na gẹ ịnị ẹkụra ọnya ana aā hị́ Ikehirimi ana vị ọnyara ịnị ẹkụra eweyi-eweyi ini ozi ẹtẹ Ono. Ama mâ yẹ ka vị́ ẹnịnị ee si oze ọnị ẹ vaa zị mẹ mị ọnyara nị. 3Agụvị avọọ, mị tụ́ aza hi wa ka mâ nyị ụkọrọ obooro ọnị maa mẹ̀. Mẹ yị zụ za ụkọrọ ọnọọ jẹẹ, di me ve tu wa. 4Ẹnịnị ệ vavọọ tụ ụtụ ọnọọ ụpẹ ẹẹna ve tu mị ịhị ọnọọ. Dị mị va ohi ọnyọọnya na yị wa nị. 5Ana tụ ọ ụpẹ ọhụhị, dị Ịsanbaratị chẹrẹ iwe tụ ozi ahụ anị ka ọ sị ụvọ sị ọ chapaa va yị mị nị. 6Ịnị iwe ọnọọ, Ịsanbaratị ka Ịgẹsẹmị ộ kà yị ọnị ka ọ sị ngụrẹyị ka ẹmịrị Aniju nịnị ẹ sị eyi gẹ ka yaa jẹẹ yị ẹngụ ayị, dị ma vị ohinọyị ẹnịnị. Agụvị avọọ ị yaa tụra ọvọ nị. 7Dị ọ rẹ ka ẹma raà nyị ọnịsẹ ka ẹ̀ nọ̀ọ Ijerusarẹmị ka ẹma vị ohinọyị Ijuda nị. Ọ kà ohinọyị Ipesiya vaa wụ̀ ọ. Agụvị avọọ me ve tu ẹnị, dị ẹmịrị ẹnị ẹ̀ gẹ eyi ịrẹyị ọnọnị. 8Dị mị và ohi naa yị ọ ka ẹ yị nyị ịzẹyịza ịnị ịrẹyị ọnị ọ kà aanị. Ịreche kẹnẹ ô che nị. 9Ẹnịnị vị enee chire yi angwa kẹnẹ. Ẹnịnị ê ro ka ẹnị ẹ̀ẹ ha ayị hí yị ịnẹ, mị vaa va ụkọrọ hi ẹtẹ. Ama dị mị mẹ̀ aduwa ka Ohomorihi ọ̀ sị ụkata yị yị mẹ̀ ụkọrọ ọnọọ nị. 10Ẹkụhị ọnya dị mị ne heyi Isemaya ana vị ozi Ideraya, ana ada anị vị Imehetaberi nị. Isemaya vị ana a jị ẹngwa tụ ịnị eehi anị. Dị Isemaya kà a yị mị ka ọnịvị ka ẹnị aa vaa wụ̀ mị ịrahụ nị. Agụvị avọọ ẹmịrị ọnị ọ̀ na tẹ̀ ịnị irehi Ohomorihi, di ye chire oze hi ẹngụ tụ ịzọọ. 11Dị mị tụ ọ ohi ka sị ẹ vẹ dị ẹngụ ẹmị ọnọnị ee zwe na tẹ̀? Óó ro ka mị maa na tẹ̀ ịnị irehi Ohomorihi agụvị ụhwẹ amị? Mẹ yị nọ! 12Ịzịịzọọ mị yẹ ka Ohomorihi ẹ yị ka avọọ. Ama Ịsanbaratị ọnịrị Itobaya ẹ sị ẹkẹhị yị ọ ka o vene mị nị. 13Â sị ẹkẹhị yị ọ ka o chire mi angwa dị ma sụ ụba na mẹ odivi agụvị ẹnịnị e re oze du mị. 14Dị mị da ịpẹ yị Ohomorihi ka ọ sị ụya rị Itobaya ọnịrị Ịsanbaratị ịnị ịsa odivi ọnị ẹ yaa mẹ̀. Dị ọ rẹ sị ụya rị Inodaya, ọnẹẹ ana vị ọnịsẹ ọnịrị ọnịsẹ nịnị ana vọ ana sị vụrị ka ẹnị ẹ tụ mị angwahi.

Ọvọ ọ ta tụra

15Ẹkụhị ẹvarẹwụ tụra ẹẹva a sị tụra ọvọ ọnọọ, dị ụkọrọ ta ịhị ẹ tụ ọ ẹkụhị ohurẹẹhị ịnị ụhwẹ ana aā hị́ Eruri nị. 16Ịjị ọnịvị ayị nịnị ọnịrị avaba ẹkụra ana kara wa wụ́ ka ọvọ ọ sị jị, dị angwahi ngụ wa ẹngụ agụvị ka ệ yẹ ka Ohomorihi ộ gụ yị ụvọ da a nị, dị ụhị kụkụ aa nyị wa nị. 17Ịnị avaba ụmẹ ọnọọ, ọdọvịdị Anijuda nịnị ọnịrị Itobaya vị anaa chẹrẹ iwe tu hi ẹngụ pooro dị ọvọ ta tụra. 18Aza ọrụrụ-ọrụrụ ene hi Ijuda ee hị́ eku ka ẹnị a saasa Itobaya agụvị ka ọ nyị ozi Isekaniya ana vị ozi Ara. Dị ozi Itobaya ana rị Ijehohananị rẹ nyị ozi Imesurami ana vị ozi Ịbẹrẹkiya nị. 19Aza vị ana ya eyi amị aa kà ebira ọyịza Itobaya, dị ẹ raà ka avaba ịsa ọnị mi kà yị Itobaya nị. Dị Itobaya chẹrẹ iwe ọrụrụ-ọrụrụ ka ọnị ọ sị chire mị angwa nị.

Currently Selected:

Inehemaya 6: EBTP

Highlight

Copy

Compare