Ịnahụmị 1

Ẹnẹyịmavara aa kụ́ ayị hi Ininivẹ

1 # Ayị 10.5-34; 14.24-27; Ịzhw 2.13-15 Â nyị ọnọrụ ọnya aanị aa hị́ Ịnahụmị ana vị Anerikosi. Ọsọnị ọ vị ẹtore ọnị Ẹnẹyịmavara sị zụ ọ ka ọ kà yị anẹkụra Ininivẹ nị.

2Ẹnẹyịmavara Ohomorihi vị anaā kụ́ ụhị;

Ọnị ọọ̄ sị ụya rị aza ana aa va eyi ịrazị ka a nị.

Ọyịkụ-ọyịkụ o vee si sí ọnịvị anị nịnị atọ nị.

3Ẹnẹyịmavara ọ yị mā hụra kụ́ ayị

ama ọ nyị ụkata ẹnẹmẹhị.

Ọ yị vaa navọ ka ọza ọ mẹ̀ ebira odivi, ọ mẹ̀ ẹ sị rị.

Òo hu ahụ kẹnẹ dị okorowa ọnịrị opomi ana aa tụ́.

Eguhi ọ vị edudu ahẹtẹ anị nị.

4Ẹnẹyịmavara ọ̀ọ mẹ̀ ọda kẹnẹ,

dị avaba enyi ini irehu ọnịrị òkū nịnị wụ̀ za ẹtẹ.

Avị ọnịrị ododo ene hi inozi Ịbasanị ọnịrị Ịrẹbanọnị ne beri Ataba Ịkamẹrị vị anaa wara za eteesu.

5Ẹnẹyịmavara òọ kana eyi kẹnẹ, dị ataba nịnị ee ziizi;

dị otutu nịnị nā anka ụsụ ana gụrị ịra avọọ.

Dị ẹtẹ ziizi, dị ivoovo za avaba aza ene hi ịrẹsụ ẹtẹ.

6Ẹnẹyịmavara àa kụ́ ayị, ẹnẹ hụ ọ jẹẹ zi ọ?

Ẹnẹ zụ ha hụụnị ọyịkụ ọkatẹngụ anị?

Ọyịkụ anị vị ana sị mẹ anka ịra anaa rị ọsa avọọ.

Dị avaba ịda nịnị sụ̀ atịtọ ọvịdị anị nị.

7Ẹnẹyịmavara vị anaā mẹ̀ ọyịza.

Ọnị e sere aza ene zwe na rị ọ ịnị ụmẹ akanya nị.

Ọ̀ tẹsị aza ene zwe na vaka a nị.

8Ẹnẹyịmavara vi ene vee vu ọnịvị anị ẹtẹ anka ọhaara enyi mẹẹ̄ kụ ịsa avọọ.

Dị ọ sị ọnịvị anị nịnị na gẹrẹ usu.

9Sị ụ waa gẹ eyi Ẹnẹyịmavaraa mẹ?

Ọ vaa wụ̀ wụ kwooze nị.

Ẹ yị nyị ọza ana va eyi ịraazị ka para ụpẹ ọnya hu.

10Ọnịvị Ẹnẹyịmavara sị mẹẹ anka aza ọnị eche hu ẹtẹ tịtẹ avọọ.

Ị vaa rị ịra anka igegenechi ọnịrị avị ọyịwụ̀ mẹẹ rị ịra avọọ.

11Â nyị ọdọvịdị ọnya ịnị ẹtẹ Asiriya anaa mẹ̀ eto odivi-odivi.

Aa gẹ eyi ọhịmị tu Ẹnẹyịmavara.

12Ama dị Ẹnẹyịmavara kà, ịzị ẹ̀ daka nyị ụkata na za, dị ẹ rụrụ nee tu, ọnị e vu wa ẹtẹ, dị ayị ẹnịnị hi. Ọnị ộ vịdị sị ụya rị Anijuda ama ọnị ọ yị kụkụ vaa sị ụya rị wa. 13Ọnị vaa hụrẹ ọkẹẹkẹrẹ, dị ọnị jị ịchẹkẹchẹkẹ Ánasiriya hụrẹ wa ẹngụ dị ẹ nyị ẹngụ ẹnịnị. 14Ịsị Ẹnẹyịmavara raà mẹ̀ ọda ka Anasiriya nịnị na yị: Ẹnịnị ẹ yị vaa nyị ezi ana vaa dọ wa ịrẹsụ. Ọnị vaa gara ọnyọọnọkụmị ene hị́ ịnị irehi ori ẹnịnị va ha. Ọnị aa chị ụsị ẹnịnị agụvị ka ẹ vọrọ ka ẹ ra vụrụ-vụrụ. 15#Ayị 52.7Dị ọ ka, Anijuda e kana eyi, dị e re ọnụtụ ana vaa ka enube ọyịza yị wa. Ọnụtụ ọnọọ vaa nọ̀ ọ ka ẹ raà nyị ẹbẹẹba ọnịvị ẹnịnị. Ẹnịnị ẹ kwẹẹtẹ, dị ẹẹ rị eche, dị ẹ mẹ̀ ịsa ọnị ẹ kà ẹnị vaa mẹ̀ yị Ohomorihi. Ọnịvị ẹnịnị ẹ yị kụkụ vaa zụ nyị ẹbẹẹba ẹnịnị. Avaba ọnịvị ẹnịnị saka-saka ẹ sị vara oku.

Currently Selected:

Ịnahụmị 1: EBTP

Highlight

Copy

Compare