Imika 1

Ohomorihi vaa mẹ̀ ọkarẹyị yị Anịsamarịya

1 # 2 Ohi 15.32-38; 2 Ịtọ 27.1-7; 2 Ohi 16.1-20; 2 Ịtọ 28.1-27; 2 Ohi 18.1—20.21; 2 Ịtọ 29.1—32.33 Â nyị ụmẹ ọnya aanị, ịnị ụmẹ ọnọọ Ijotami ọnịrị Ahazi ne beri Ihezekaya vavọọ vị ohinọyị tù ẹngụ tù ẹngụ tụ́ Ijuda nị. Ịnị ụmẹ ọnọọ Ẹnẹyịmavara mẹ ka Imika ana vị Animoreseti ò re ẹtẹ. Ini etore ọnọọ, dị Ẹnẹyịmavara pè e kà ịrẹyị nị. Ẹtẹ ọnị Imika re vị ịrẹyị ene vee tù Ịsamarịya ọnịrị Ijerusarẹmị.

Orere ana a jị yị Ịsamarịya ọnịrị Ijerusarẹmị

2Batọ nịnị o, avaba ẹwụ nịnị anẹhẹ;

avaba ẹwụ nịnị ene hi ẹhẹ ò batọ dị ọ̀ wụ́ ịrẹyị.

Ẹnẹyịmavara Ohomorihi vaa dọ ivenu ịsa ọn ị ụ mẹ̀.

Batọ! Ọ vaa ka ịrẹyị hụrị ini eehi anị ịnị ihinẹba.

3Ẹnẹyịmavara ọ sị hụrẹ ịzị ọ yà aa vẹ.

O vee chii vẹ dị ọ̀ vaa zị ụsẹ ịrẹsụ ataba nịnị.

4Ịjọnọọ, dị ataba nā ahẹtẹ anị

anka ụsụ ana yà ịnị ịra avọọ;

dị ẹ yaa va hi ẹte hi inoze

anka enyi ene ee sii chi ataba avọọ nị.

5Avaba ịsa ẹnẹnị ệ mẹ̀ tụ́ ezi Ijekọvụ agụvị ka ệ mẹ̀ ebira odivi ọnịrị akamawụ hi Ohomorihi. Ẹnẹ nyị ohuvọ akamawụ Isirẹrị? Aa vị aza ene hi Ịsamarịya! Ẹnẹ rị ịvị ori ọyị hẹkẹ ịnị ẹtẹ Ijuda? Aa vị aza ene hi Ijerusarẹmị!

6Ẹnẹyịmavara kà Anịsamarịya vị ọnị ọnị vaa vara itutuu tụ́ ịnị avị ịzị aza aa dà aarẹ tụ́. Ọ kà ọnị vaa jị ẹkụra ọnọọ eburu, dị ọnị kụ́ eburu anị na và hi ini ozi. Ọ kà ẹkụra ọnọọ vị ọnị ọnị vaa tụ́ ahwaahụ. 7Ẹnẹyịmavara kà avaba ori ẹnịnị vị ọnị ọnị vaa chaka rugu-rugu. Dị ọnị sị ịra rị avaba ịsa ana a kụ́ na yị ọsẹrẹka nịnị ene hi ini irehi ori ẹnẹẹ. Ọ kà avaba ori ẹnịnị vị ọnị ọnị vaa garaa ha. Anịsamarịya vị ana kụ́ ogu ẹnẹẹ̄ sịị hẹkẹ ori. Aza ẹnẹsa rẹ vaa dọ wa, dị ẹnị rẹ sị naa hẹkẹ ori ẹnịnị. 8Di Imika ka ọnị vaa hụ agụvị ịrẹyị ọnọnị dị ọnị aa tụ́ orere boro-boro. Ọ kà ọnị aa ngụ ọ zịịzị, dị ọnị ẹ yị sị adava tụ́ ahụ. Ọ kà ọnị ẹ yị hyakụ aa sị ịtaa kú ẹngụ. Ọ kà ọnị vee nowu anka irezi enyi, dị ọnị ee ti anka ogugu avọọ. 9Ịrẹyị ene tù Anịsamarịya vị ana sị mẹẹ anka ikenebe arụmada ẹnẹ ẹ yị mā vị avọọ nị. Ẹngụ ịrẹyị ọnọọ ee vee tu Ijuda aanị nị. Ẹngụkata ọnọọ ọ sị ngụ tù aza anị ene hi Ijerusarẹmị.

Ọnịvị aa gụrị Ijerusarẹmị

10Asị a kà ịrẹyị ọnọọ Igati. Asị a nyị ọza ene sụ́ ùnè. Aza ene hi ẹtẹ Ịbẹtị-Irihwira ana vị ẹkụra edudu ee muna ẹtẹ ana sị zụ ka ayị ẹnịnị ô du. 11Aza ana ya Isahwiri ẹ sị ahwaahụ ọnịrị ụhị kụ̀ra hụrẹ ẹkụra ẹnịnị nọ ẹkụra ọsa ịnị. Aza ana ra Ịzaananị jịnẹ hụụnị ẹkụra ẹnịnị vụrụ-vụrụ. Ẹ̀ẹ wụ́ ka aza ene hi Ịbẹtị-Ẹzẹrị aa jị òrèrè, ẹ yẹ ka ẹnịnị e yi kụkụ re aha tẹ̀ ịzọọ avọọ nị. 12Aza ene hi Imaroti ee zi ka ẹnị vee re ọyịza. Dị ahịka ịrẹyị odivi Ẹnẹyịmavara kụ́ tù wa nị. Ộ kụ́ ịrẹyị odivi ngụ eehi ve tù Ijerusarẹmị. 13Ẹwụ nịnị ene hi Irakisi, kuru umaata za ịkẹkẹ anị nịnị Wâ hama Anisirẹrị mẹ̀ ebira odivi ana mẹ ka Ijerusarẹmị ộ akamawụ. 14Ẹwụ nịnị ana ra Ijuda kụ́ Imoreseti-Igati nyiyooka. Ohinọyị Isirẹrị nịnị ẹ yị vaa mẹ̀ ọgụvọ yị ẹkụra Achizibi. 15Ẹnẹyịmavara kà ọnị vaa mẹ ka ọnịvị aza ene hi Imaresa ẹ̀ kụ́ ịrẹkụ va hụ́ wa dị ẹ dọ wa ẹtẹ. Aza ẹbanyị Anisirẹrị vi ene vee zwe na tẹ̀ ịnị ụtẹha Adurami. 16Ọ kà a kụ́ ịrẹsụ ẹnịnị ana sị zụ̀ ka ẹ yaa zị ẹngụ ezi ẹnịnị ene e sì ịrẹyị anị. Ẹnịnị ẹ kụ́ ịrẹsụ ẹnịnị hwoohworo anka ụba avọọ. Avaba ezi ẹnịnị vị ọnị ịrẹkụ vaa kụ́ụ nọ aha ọsa.

Currently Selected:

Imika 1: EBTP

Highlight

Copy

Compare