Imatiwu 25

Ụhịrẹyị ezwoorihi ẹẹwụ ana nọ ịnị ịrẹyị ọnẹẹ

(Irk 12.35-38; 13.25-28)

1 # Irk 12.35 Dị Ijeesu rẹ ka, “Ịhị ọnọọ, oze ana Ada ayị ẹbẹẹba aa zịị mẹ ịjọva vị ana va sị mẹẹ anka ezwoorihi ẹẹwụ ana sị ozotupa ẹnịnị, dị ẹyaa nọ ụgẹrị ọza ana aa nyị ọnẹẹ avọọ. 2Ẹẹhị ịnị ẹnịnị ệ yẹ ịrẹyị; ẹnị ẹẹhị ana vọ vị ọnụra. 3Ẹnị ana vị ọnụra ệ sị ozotupa, ama ẹ yị ká angwẹ za. 4Ẹ́nị ọyẹrẹyị ẹnị mẹ̀ sị ozotupa ẹnịnị, dị ẹ rẹ ká angwẹ tụ́ ini ijogo rị ụvọ nị. 5Ọva ọnẹẹ ọnọọ o yi jintu vẹ, dị ara ee hine ezwoorihi ẹnẹẹ, dị ẹ na sị sụ̀ nị. 6Ịjị agẹvịrahụ si tù, di e vene nowu ka: ‘Re! Ọva ọnẹẹ aa vẹ, wụsẹ jịnẹ nọ ẹhẹ, wa na gẹrị ọọ nịnị!’ 7Dị avaba ezwoorihi ẹnẹẹ kwẹẹtẹ, di e tenyi ozotupa ẹnịnị nị. 8Dị ọnụra ẹnẹẹ aa dá ịpẹẹ yị ọyẹrẹyị nịnị ka: ‘Aarịhịnị, ká angwẹ yị de, ka ịra ayị ee mi!’ 9Ama dị ọyẹrẹyị nịnị tụ́ ohi ka: ‘Eyiye de, ọ yị kụkụ vaa hụ ẹyịrị ẹwụ nịnị. Nọ ịzị a yàā ná a, dị ụ wa na hị́ nịnị!’ 10Di e si hu aa na nị. Ẹ màa naa hị́ angwẹ, dị ọza ana aa nyị ọnẹẹ vẹ nị. Dị ẹnị ene tenyi ẹngụ aanị saasa a ngụ eehi nọ ini ịrẹyị ọnẹẹ, di e gu oze nị. 11#Irk 13.25Ô kù chee, di ezwoorihi ọsa ẹnẹẹ vẹ nị. Dị ẹ ka: ‘Ọga, Ọga, na oze yị de!’ 12Dị ọva ọnẹẹ ọnọọ tụ́ wa ohi ka: ‘Ịzẹyịza m maa kà nị, mẹ yị yẹ wụ nịnị vụrụ-vụrụ.’ 13Agụvị avọọ, wee zí nịnị, agụvị ka wẹ yị yẹ ụmẹ oni Ozi ọza onigirima vaa sị vẹ nịnị.”

Ụhịrẹyị aza anaa sị ẹkẹhị yị

(Irk 19.11-27)

14 # Irk 19.11-27 “Oze ana Ada ayị ẹbẹẹba aa zịị mẹ ịjọva vị ana sị mẹẹ anka ọza ịnya aanị ana aa hụrẹ eehi. Ộ hị́ ezi ahụ anị, dị ọ kụ́ ogu chire wa ụvọ nị. 15Ọ́pa ọzọza mẹmẹ nyị ụkata, ọ sị sị yị wa nị. Ộ sị achuchu ẹẹhị yị ọza ọnya, ọ rẹ sị achuchu ẹẹva yị ọsa, dị ọ sị achuchu ọnya yị ọsa nị. Dị ọ kwẹẹtẹ, dị aa na nị. 16Ọza ana dọ achuchu ẹẹhị aanị, ộ sị na sẹ ohu, dị ọ rẹ rị ọgụ achuchu ẹẹhị tụ́ ọ nị. 17Ana dọ achuchu ẹẹva, ọnị ọ rẹ rị ọgụ achuchu ẹẹva tụ́ ọọ. 18Ama ana dọ achuchu ọnya aanị, ọ na chị ẹtẹ, dị ọ sị ẹkẹhị ọga anị chire e nị. 19Ịjị ọ da kù, dị ọga ezi ahụ ẹnẹẹ vẹ, dị ọ ka ọzọza ọ̀ọ kà enube nị. 20Ozi ahụ ana dọ achuchu ẹẹhị aanị, ộ vẹ dị ọ ka: ‘Ọga, wâ sị achuchu ẹẹhị mị, achuchu ẹẹhị ọsa ọnị mị rị tụ́ ọ yị.’ 21Dị ọga anị ka: ‘Akọrọ! Ozi ahụ obooro ana nyị ịzẹyịza ụ vị nị. Agụvị ka wâ nyị ịzẹyịza tụ́ ịnị ịsa oweyi, mị vaa sị wụụ mẹ ọga ịsa ọrụrụ-ọrụrụ. Wa vẹ, ẹwụrị ọga awụ ò duduu jẹ!’ 22Dị ozi ahụ ana dọ achuchu ẹẹva, ọnị rẹ vẹ, dị ọ ka: ‘Ọga, wâ sị achuchu ẹẹva mị; ma rẹ rị ọgụ achuchu ẹẹva ọsa tụ́ ọọ.’ 23Dị ọga anị ka: ‘Akọrọ! Ozi ahụ obooro ana nyị ịzẹyịza ụ vị nị. Agụvị ka wâ nyị ịzẹyịza tụ́ ịnị ịsa oweyi, mị rẹ vaa sị wụụ mẹ ọga ịsa ọrụrụ-ọrụrụ. Wa vẹ, ẹwụrị ọga awụ ò duduu jẹ!’ 24Dị ozi ahụ ana rẹ dọ achuchu ọnya, ọnị rẹ vẹ nị. Dị ọ ka: ‘Ọga, mâ yẹ ka ọza ọkatẹngụ ụ vị nị; ịzị u wè yi chire ịsa tụ́, ụụ̄ há ịsaa hụrẹ nị. Ịzị ụ wẹ̀ yị gara ịsa tụ́, ụụ̄ kụ́ ịsaa hụrẹ nị. 25Angwa ô hí mi, dị mị sị ẹkẹhị awụ ne chire ẹtẹ nị. Re, ịsa awụ yị.’ 26Dị ọga anị ka: ‘Ẹwụ ozi ahụ odivi ana vị onuworo aanị!’ Wâ yẹ ka ịzị mè yi chire ịsa tụ́, mịị̄ há ịsaa hụrẹ nị; dị mị rẹẹ̄ kụ́ ịsa ọnị mẹ̀ yị gara tịtẹ nị. 27Ụ́ yaanị sị ẹkẹhị amị na tụ́ ịnị ịbankị nị; m mẹ̀ yaanị vẹ aanị, dị mị yaanị na sị ọọ beri ẹtụra anị. 28Dọ ẹkẹhị ọnọọ hụrẹ ẹ ụvọ nịnị, dị ụ wa sị yị ọza ana nyị achuchu ẹẹwụ! 29#Imt 13.12; Ịmk 4.25; Irk 8.18Ọza ana àa nyị ịsa, a vaa sị ịsaa tụ́ ọọ yị nị, dị ọ̀ nyị hu avọọ. Ọza ẹnẹ ẹ̀ yị nyị ịsa, ọnị ọ̀ọ hyakụ nyị vị ana aa dọ ọ. 30#Imt 8.12; 22.13; Irk 13.28Ozi ahụ kẹnẹ-kẹnẹ ọnọnị, tụ́ ọ ụvọ tụ́ ẹhẹ ịnị ịrahụ ruma-ruma nịnị, ịzọọ ázaā yàa nowu, dị aa rị anyị nị.”

Ọkarẹyị ọdịrẹma

31 # Imt 16.27; Imt 19.28 “Ịhị Ozi ọza onigirima ọ̀ọ vẹ ini igirima anị beri avaba anggẹẹrị ọnịnị nịnị, ọ vaa yaayịtẹ ị́rẹsụ aga igirima anị. 32Dị avaba anẹhẹ wara gụ ịda anị, dị ọ gà wa hi ẹẹva, anka oseratẹmẹ mẹ̀ẹ̄ tọ̀ọ́ atẹmẹ ọnịrị ẹvụụ hi aha irenyi-irenyi avọọ. 33Dị ọ kụ́ atẹmẹ hi eyi ụvọrị anị, dị ọ rẹ kụ́ ẹvụ nịnị hi eyi ụvọha. 34Ịjọnọọ dị Ohinọyị kà a yị aza ene hi eyi ụvọrị anị ka: ‘Wa vẹ nịnị, ẹwụ nịnị ana Ada amị raà mẹ ka ò zé yị! Ngụ ịzị Ohomorihi yà aa mẹ ịjọva, oni o si tenyi tịtẹ wụ nịnị, ẹ́hẹ mè hụrẹ nyima. 35Agụvị ka ụ́ngwẹ màa kụ̀ mị, wâ dà ịsa mị nịnị. Ónyi màa kụ̀ mị, wa rẹ sị enyi yị mị hú nịnị. M mẹ̀ vị ọzọga vẹ, wê sì mi ọzọga nịnị. 36M mẹ̀ yà ịnị ahwaahụ, wâ sị ịta kú mi ẹngụ nịnị. Ẹ́ngụ mẹ̀ raa zị mị, wê sì mi ụkụ nịnị. M mẹ̀ yà ịnị ẹngwa, we re ve hee mi nịnị.’ 37Ịjọnọọ dị ọnịrẹyịzẹyịza nịnị tụ́ ọ ohi ka: ‘Ananyị yị, ịhị i re ka ụngwẹ aa kụ̀ wụ, dị ị dà ịsa wụ? Ịhị i re re ka enyi aa kụ̀ wụ, dị ị ká enyi wu hú? 38Ịhị i re re ka wa vị ọzọga vẹ oni i sì wu ọzọga? Ịhị i re ka wâ yà ịnị ahwaahụ, dị ị sị ịta kú wu ẹngụ? 39Ịhị i re ka ẹngụ aa zị wụ, à vị ka wâ yà ịnị ẹngwa, di i ve hee wu?’ 40Dị Ohinọyị vee tụ̀ ohi ka: ‘Ịzẹyịza, m maa kà a wụ nịnị nị, ụ mẹ̀ raà mẹẹ yị ene weyi hu ịnị ọhụva amị ẹnẹnị aanị, ẹmị ụ rẹ mẹẹ yị nịnị avọọ nị.’ 41Dị ọ va vara eyi, dị ọ kà a yị aza ene hi eyi ụvọha anị ka: ‘Hụụ ịda amị nịnị, ẹwụ nịnị aza oyivu! Waa nọ ịnị ịra ene è yi mē mi pooro, ana a kà tịtẹ yị Echu ọnịrị anggẹẹrị anị. 42Agụvị ka, ụ́ngwẹ màa kụ̀ mị, wẹ yị dà ịsa mị nịnị. Ónyi màa kụ̀ mị, wẹ yị ká enyi mị hú nịnị. 43M mẹ̀ vị ọzọga vẹ, we yi sì mi ọzọga nịnị. M mẹ̀ yà ịnị ahwaahụ, wẹ yị sị ịta kú mi ẹngụ nịnị. Ẹngụ ộ zị mị, mâ yà ịnị ẹngwa, we yi hee mi nịnị.’ 44Ịjọnọọ dị aza ẹnẹẹ ẹnị re tụ́ ohi ka: ‘Ananyị yị, ịhị i re ka ụngwẹ aa kụ̀ wụ, à vị ka enyi aa kụ̀ wụ, à vị ka dị ụ vị ọzọga vẹ, à vị ka dị ụ yà ịnị ahwaahụ, dị ẹngụ raa zị wụ, dị ụ rẹ yà ịnị ẹngwa, dị yẹ̀ yị mẹ ọgụvọ wụ?’ 45Ịjọnọọ dị Ohinọyị tụ́ wa ohi ka: ‘Ịzẹyịza mị kà wụ nịnị nị, ụ wẹ̀ yị mẹ mẹ̀ ẹ yị ene weyi hu ịnị aza ẹnẹnị aanị, ẹmị ụ wẹ̀ yị rẹ mẹ̀ ẹ yị nịnị avọọ nị.’ 46#Ịda 12.2Dị aa kụ́ aza ẹnẹẹ ne hi ịnị ụyọrị ẹnẹ ẹ̀ yị mā ta pooro zịna-zịna, ama dị ọnịrẹyịzẹyịza nịnị ẹnị aa nọ ịnị ẹhẹ ẹnẹ ẹ̀ yị mā ta pooro zịna-zịna.”

Currently Selected:

Imatiwu 25: EBTP

Highlight

Copy