Ireevi 5

Ịvị ana aā hụ ụvị anịị mẹ̀ ịsọvọ

1Ọza ọ̀ọ mẹ̀ ịvị agụvị ka â hị́ ọ ka ọ̀ va dọ ivenu ịnị orere, dị ó yi ka ọnị ẹ́ ị kà ịrẹyị nị, ọza ọnọọ vaa rị ụya anị. 2Ọza òo nyeeyi sị ẹngụ kanyị ịsa ẹnẹ ẹ yị ịnị jị oze ịnị ịrẹyị ahẹkẹ, ọ̀ọ vị oku ịsụpa à vị uye ịnị avị ẹnẹ ẹ̀ yị nị, ọ̀ọ daka vị ka ọza ẹ́ yị yẹ, ọnị ụvọta ẹ́ yị kụkụ nị, ọ́ rẹ sị ịvị rị bẹẹ. 3Ọza òo nyeeyi sị ẹngụ kanyị ịsa ịnị ẹngụ ọza, ịsa tụra ịsa ọnị ọọ vị, dị ọ vị ịsa ẹnẹ ẹ yị nị jị oze ịnị ịrẹyị ahẹkẹ nị, ịjị ọọ yẹ ịsị ọnị mẹ kẹnẹ, ọ sị ịvị rị. 4Ọza ọọ na hị́ eku kẹnẹ-kẹnẹ ka ọnị vaa mẹ ịrẹyị ọnyọọnyị, ọọ vị ọyịza ọọ vị odivi, ịjị ọọ maanị yẹ ịsị ọnị mẹ kẹnẹ, ọ sị ịvị rị. 5Ụmẹ ọnị ọza ọ̀ọ sị rị ịvị ẹngụ ịrẹyị ẹnẹnị, ọza ọnọọ ọ̀ na dọ irenu anị ka ọnị ọọ maanị mẹ̀ ịvị. 6Ọ vaa sị atẹmẹ ọnya avị ẹvụ vaa mẹ̀ ịsọvọ ịvị anịị hi Ẹnẹyịmavara. Ohirẹsụ irehi Ohomorihi vaa sị ịsụpa ọnọọ mẹ̀ ịsọvọ yị ọza ọnọọ, dị a vagu ịvị ọnị ọ mẹ. 7Ama ọza ọnọọ ẹ̀ yị zụ sị ozi atẹmẹ à vị ẹvụ, ọ vaa sị arivadi ẹẹva à vị arekuku ẹẹva vaa mẹ̀ ịsọvọ ịvị anịị yị Ẹnẹyịmavara. A vaa sị ọnyara mẹ̀ ịsọvọ ịvị anị, dị a sị ọsa mẹ̀ ịsọvọ ana aa rị ịra. 8Ọ vaa kụ wa ve tu ohirẹsụ irehi Ohomorihi, ana vaa vịdịị sị ọnya ịnị inomi ẹnẹẹ ị ọ sị mẹ ịsọvọọ yọ agụvị ịvị anị. Ọ́ vaa jị ọ ọrọkọ nị. Ẹ́ yị vaa tụ̀ ọ ịrẹsụ. 9O vee che anya anị ẹnyị sẹ akaakaha ụta ịsọvọ, dị ọ va ana vọ hi iruvo ụta ọnọọ. Ịsọvọ ana a sị vagu ịvị ọsọnị vị nị. 10Ohirẹsụ irehi Ohomorihi vaa sị ọhụva mẹ̀ ịsọvọ ana a rị ịra anka a mẹ mẹ ọda anị. Aanị ọ mẹ vaa mẹ̀ ịsọvọ agụvị ịvị ọnị ọza ọnọọ mẹ dị a vagu ọ nị. 11Ọza ọnọọ ẹ̀ yị zụ sị arivadi ẹẹva à vị arekuku ẹẹva, ọ vaa sị ayị ọyị kwọ ikirogirami ọnyara vaa mẹ̀ ịsọvọ ịvị anị. Ẹ́ yị vaa sị angwẹ à vị eturare ọnyọọnyị tụ ọ, agụvị ka ịsị ịsọvọ ịvị ọ vị nị. 12Ọ vaa sị ayị vee tu ohirẹsụ irehi Ohomorihi, dị ohirẹsụ irehi Ohomorihi ọnọọ ka ayị uvoku ọnyara ana sị zụ ka a raà sị avaba anị va yị Ẹnẹyịmavara, dị ọ rị ọ ịra ịrẹsụ ụta ịsọvọ. Ịsọvọ ana a sịị vagu ịvị ọsọnị vị nị. 13Aanị ohirẹsụ irehi Ohomorihi mẹ vaa mẹ̀ ịsọvọ agụvị ịvị ọza ọnọọ, dị à vagu ọ nị. Avaba ayị ọnọọ ana vọ vị ó ohirẹsụ irehi Ohomorihi anka á mẹẹ̄ mẹ̀ ịsọvọ ana a sị ayị mẹ avọọ.

A mẹmẹẹ̄ mẹ̀ ịsọvọ ọza ọ̀ọ rị ịvị

(Ire 7.1-10)

14Ẹnẹyịmavara ộ kà a yị Imosiisi ka: 15Ọza oo nyeeyi, dị ẹ yị sị ịsa ana vị Ẹnẹyịmavara va yọ nị, ọ sị ịvị mẹ. Ọza ọnọọ vaa sị ịdẹba à vị ẹvụ ẹnẹ ẹ̀ yị tụ ọkụmị vaa mẹ̀ ịsọvọ ọyị sị ụta varẹma yị Ẹnẹyịmavara. Ịsa a sịị̄ ngọ ịsa ịnị irehi Ohomorihi a vaa sị ngọ ọ, dị a yẹ ọpa ọnị ọ vị nị. 16O vee si ụta ịsa ana vọrọ ka ọ̀ si vẹ dị ẹ yị sị ọ vẹ avọọ, dị o sí achehi ẹẹhị anị vaka a. Ọ vaa sị ọ vaa yị ohirẹsụ irehi Ohomorihi, dị ohirẹsụ irehi Ohomorihi sị ịsụpa ọnị ọ sị vẹ, mẹ̀ ịsọvọ yị ọ agụvị ịvị anị, dị a vagu ọ. 17Ọza ọnyọọnyị òo nyeeyi jịnẹ ọda Ẹnẹyịmavara, ọza ọnọọ ọọ mẹ̀ ịvị, ọ vaa rị ụya anị. 18Ọ vaa sị ịdẹba à vị ẹvụ ẹnẹ ẹ̀ yị tụ ọkụmị vee tu ohirẹsụ irehi Ohomorihi ọyị mẹ̀ ịsọvọ oyi sí ụta varẹma yọ. Ịsa a sịị ngọ ịsa ịnị irehi Ohomorihi a vaa sị ngọ ọ, dị a yẹ ọpa ọnị ọ vị nị. Ohirẹsụ irehi Ohomorihi ọnọọ vaa mẹ̀ ịsọvọ yị ọza ọnọọ agụvị ịvị anị, dị a vagu ọ 19Ịsọvọ oyi sí ụta varẹma agụvị ịvị ọnị ọ mẹ hi Ẹnẹyịmavara ọ vị nị.

Currently Selected:

Ireevi 5: EBTP

Highlight

Copy