Ireevi 16

Ẹkụhị ọbanyị ana aā sịị vagu ịvị yị aza.

1Ẹnẹyịmavara ộ kà a yị Imosiisi ịrẹma ọnị ezi Eerọnị ẹyịva ana zị oze ẹnẹ ẹ̀ yị vọrọ kà pe Ohomorihi wusu ka, 2#Ihib 6.19Ọ̀ kà a yị ọyịnyara anị Eerọnị ka, à sị ọ sị avaba ụmẹ ngụ aha ọnịnị ịzị a sị ịta jị, agụvị ka ịzọọ ọnị yaā sị ẹngụụ zụ̀ ịnị eguhi, akẹbẹẹba oku apoti oto nị. Ẹ̀ yị saasa ịrẹyị ọnọnị vị ọnị aa wụ̀ ọ nị. 3#Ihib 9.7Ama ọ̀ọ vaa ngụ aha ọnịnị ọnọnị, áa nyị ka ọ̀ vịdị sị ozi ụnọ ọnya mẹ̀ ịsọvọ ịvị da, dị ọ̀ rẹ sị ịdẹba ọnya mẹ̀ ịsọvọ ana aā rị ịra. 4Ẹnẹyịmavara kà, dị Eerọnị ộ va ngụ aha ọnịnị ene hu aanị, áa nyị ka ọ̀ hụ enyi, dị ọ̀ kụ ẹnya ohirẹsụ irehi Ohomorihi hi ẹngụ: ò chire awuru ọgọdọ hwẹkẹ-hwẹkẹ anị, dị ọ̀ vụ́ aaruchi oweyi tụ ọ, ọ̀ sị obo sụ ọtẹ, dị ọ̀ jị ubobo anị. 5Avaba Anisirẹrị nịnị vaa kụụ gụ, dị ẹ sị ịdẹ ẹẹva va yị Eerọnị dị ẹ sị mẹ̀ ịsọvọ ịvị; dị ẹ sị ịdẹba ọnya mẹ̀ ịsọvọ ana aa rị ịra. 6Eerọnị vị a sị ụnọ ọnyaa mẹ̀ ịsọvọ ịvịị yị ẹngụ anị, dị ọ sị pa ka à vagu ọnị ọnịrị aza anị. 7Dị ọ va sị ịdẹ ẹẹva ẹnẹẹ tụ ọvịdị Ẹnẹyịmavara enoze irehi Ẹnẹyịmavara. 8Eerọnị vaa sị ịrẹta ẹẹva jị osisi yị ịdẹ ẹyịva ẹnẹnị. A vaa tọ̀ ọnya ịrẹwaa yị Ẹnẹyịmavara, dị ọsa vị ịsa ụnọmị Azazeri. 9Ọ vaa sị ịdẹ ọnị osisi ọ̀ọ za ka ọ̀ vị Ẹnẹyịmavara dị ọ sị mẹ̀ ịsọvọ ịvị 10Ama ọ vaa sị ịdẹ ọnị osisii za ka ọ̀ vị Azazerii vẹ ọvịdị Ẹnẹyịmavara ireyi-ireyi dị à sị pa ẹvagu, dị a va dụ ọ na ngụ ụnọmị ne tu Azarẹrị. 11Ịjị Eerọnị ọ̀ọ raa sị ụnọ ọnọọ vẹ ọ̀yị mẹ̀ ịsọvọ ịvị yị ẹngụ anị, dị ọ́ raa pà ẹvagu yị ẹngụ anị ọnịrị aza anị nị, ọ vaa wụ̀ ọ. 12Ọ vaa sị ịchacha ana a sịị̄ nyị ịra, dị ọ ká akịna hi ọ ohihi hụụnị ụta ana ya ọvịdị Ẹnẹyịmavara vaka eturare ozoza ụvọ ẹẹva ohihi-ohihi, dị ọ kụ wa ngụ aha ọnịnị ene hu aanị. 13Ọ vaa yà ọvịdị Ẹnẹyịmavara ịzọọ, dị ọ và eturare ọnọọ hi ịnị ịra, dị areyi anị ọ̀ chaka ku ịrẹhụ ayamva ana yà ịrẹsụ apoti oto ụ vị dị a sị o su agụvị ka oo re e. 14Ọ vaa ká ụnọ ọnọọ, dị ọ jị igege ngụ ọ dị o che e sẹ ọvịdị ịrẹhụ ayamva ọnọọ; dị ọ varẹma sị igege mí ọ ụpẹ ịhịmba ọvịdị apoti oto ọnọọ. 15#Ihib 9.12Ịrẹma ọnọọ, Eerọnị vaa wụ̀ ịdẹ ana aza sị va mẹ̀ ịsọvọ ịvị ẹnịnị aanị, dị ọ sị anị ngụ aha ọnịnị ene hu aanị, òo tu ịzọọ, dị ọ mẹ ịdẹ ọnọọ anka ọ́ mẹ mẹ ụnọ ọnọnị: o vee che e sẹ ịrẹhụ ayamva, dị o re che e sẹ ẹtẹ ọvịdị apoti oto ọnọọ. 16Aanị ọ́ mẹ vaa mẹẹ mẹ̀ ịsa vọrọ ka à mẹ dị à sị nyịna ịdọtị Anisirẹrị nịnị ọnịrị ịdọtị ịvị ẹnịnị hụrị aha ọnịnị ene hu aanị nị. Aanị ọ mẹ vaa mẹ ajẹngụ Ohomorihi nị, agụvị ka ịnị akakana udi ẹnẹ ẹ̀ yị nị á dà a tụ nị. 17É yị nyị ọza ana vaa yà ịnị ajẹngụ ụmẹ ọnị Eerọnị ọ̀ọ sị ngụ aha ọnịnị ene hu aa naa pa ẹvagu pooro dị ọ̀ jịnẹ vẹ. Avọọ ọ maa mẹ̀ ido yị ẹngụ anị ọnịrị aza anị beri avaba ịragụ Anisirẹrị nịnị. 18Ọ vaa jịnẹ tụ ẹhẹ ọgọnịị nọ ịnị ụta ana á yaa mẹ̀ ịsọvọ ana aā rị ịra, dị ọ na mẹ̀ ịsa avọrọ ka a mẹ dị à kụ ịdọtị anị kwooze. Aa nyị ka ọ̀ ká ụnọ ọnịrị ịdẹ ọnị ọ́ wụ, dị ọ và a ku ọpanyị ụta ịsọvọ ọnọọ ịnị ọgọgọ ẹyịna. 19Ọ vaa sị igege anịị che ẹnẹẹ sẹ ụta ọnọọ ụpẹ ịhịmba. Aanị ọ mẹ vaa mẹẹ nyịna ịvị Anisirẹrị nịnị hụụnị anị, dị ọ mẹ̀ ẹ ka ọ̀ nị nị.

Ẹvụ anaa za ẹnya ịvị aza

20Ịjị Eerọnị ọ̀ọ raa mẹ avaba ịsa vọrọ ka a mẹ dị aha ọnịnị ene hu, avaba ajẹngụ Ẹnẹyịmavara ọnịrị ụta ịsọvọ ọnọnị ẹ̀ nị, ọ vaa sị ẹvụ ana á nyị ka ọ̀ vị Azazeri aanị vẹ ọvịdị Ẹnẹyịmavara ireyi-ireyi. 21Eerọnị vaa sị ụvọ anị ẹyịvaa tụra ẹvụ ọnọọ ịrẹsụ, dị ọ dọ irenu avaba ịsị edivi, ọnịrị ịvị ana Anisirẹrị nịnị mẹ̀ akamawụ ẹnịnịị kụ ọ ịrẹsụ, dị o chí ẹnya anị hi ẹvụ ọnọọ ịrẹsụ. Ọ̀ọ vavọọ sị ọ mẹ, dị ọ va dụ ẹvụ ọnọnị na ngụ ụnọmị. Á nyị ọza ana a nyị ka ọ̀ vavọọ dụ ẹvụ ọnọọ nị. 22Ẹvụ ọnọọ vaa za avaba ẹnya ịvị ẹnịnị naa ngụ ịzị ọza ẹ̀ yị ra vụrụ-vụrụ; dị ọ navọ ẹvụ ọnọọ ka ọ̀ na ngụ ụnọmị. 23#Ezk 44.19Eerọnị vaa ngụ ịnị ajẹngụ Ẹnẹyịmavara, dị ọ ngwa ẹnya ohirẹsụ irehi Ohomorihi ọnị o ku hi ẹngụ dị ọ va ngụ aha ọnịnị ene hu, dị ọ navọ wa hi ẹtẹ ịzọọ. 24Ọ vaa ya aha ọnịnịị hụ enyi, dị ọ va kụ ẹnya ọnị ụvọta hi ẹngụ, ịrẹma ọnọọ, ọ vaa jịnẹẹ tụ ẹhẹ, dị ọ na mẹ̀ ịsọvọ ana aā rị ịra yị ẹngụ anị ọnịrị yị aza ana vọ; dị à sị vagu ịvị ọnị ụvọta ọnịrị ịvị aza ana vọ. 25Ụhị ịsụpa ana a sị mẹ̀ ịsọvọ aanị vị ana a vaa rị ịra ịrẹsụ ụta. 26Aa nyị ka ọza ana dụ ẹvụ ọnọnị ngụ ụnọmị na yị Azazeri aanị ọ̀ nyịna ịta anị, dị ọ̀ hụ enyi dị ọ̀ vavẹ va ngụ udi ẹnịnị. 27#Ihib 13.11Ụnọ ọnịrị ẹvụ ana wụ mẹ̀ ịsọvọ ịvị, ana a sị ẹnịnị ngụ aha ọnịnị ene hu aanị, vị ana a vaa sịị jịnẹẹ tụ ẹhẹ hụrị udi, dị ana rị wa ịra. Ịtụmpaha anị ọnịrị uye, vaka iruvu anị vị ana a vaa rị ịra bemi. 28Ọza ana na rị wa ịra vaa nyịna ịta anị, dị ọ hụ enyi, dị ọ̀ va vavẹ va ngụ udi ẹnịnị. 29#Ire 23.26-32; Ịrị 29.7-11Ọda ẹnẹnị vị ọnị ụ vaa saasa nịnị pooro zịna-zịna ka: ịhị ẹ tụ ọ ẹkụhị ẹẹwụ ịnị ụhwẹ ịhịmba, ẹwụ nịnị Anisirẹrị ọnịrị anẹkụra ọsa ana ra vahụra wụ nịnị vaa za awẹ, dị ụ wẹ́ yị mẹ̀ ụkọrọ ọnyọọnyị nịnị. 30Ẹkụhị ọnọnị a vaa mẹ̀ ịsa vọrọ ka à mẹ dị à sị nyịna ịvị awụ nịnị kwooze, dị wa nị nịnị ọvịdị Ẹnẹyịmavara. 31Ẹkụhị ụhwọtụ, ẹkụhị ọnọọ vaa vịị yị wụ nịnị ka wa sị tụ́ ụhwọ́, dị wa za awẹ nịnị nị. Ọda ọ vị̀ yị wụ nịnị pooro zịna-zịna nị. 32Ohirẹsụ irehi Ohomorihi ọbanyị ana a nyị jẹẹ ẹtẹẹtẹrẹ ka ọ̀ dọ ada anị ịrẹsụ, ọ vaa mẹ̀ ịsa vọrọ ka à mẹ dị a sị nyịna ịvị kwooze ọ vaa kụ ẹnya ohirẹsụ irehi Ohomorihi hi ẹngụ, 33dị ọ mẹ̀ ịsa vọrọ ka à mẹ dị à sị nyịna aha ọnịnị ene hu, avaba aha ana vọ ịnị ajẹngụ Ẹnẹyịmavara, ụta ịsọvọ, ohirẹsụ irehi Ohomorihi ọnịrị avaba aza ana vọ. 34Ọda ẹnẹnị vị ọnị ụ vaa saasa nịnị pooro zịna-zịna. Ido ọnọnị vị ọnị a vaa mẹ ụpẹ ọnya ịnị ịrayị, dị à sị nyịna ịvị Anisirẹrị nịnị kwooze. Ẹnẹyịmavara mẹ mẹ̀ ẹ ọda yị Imosiisi gẹdẹ-gẹdẹ, avọọ a mẹ mẹ̀ ẹ nị.

Currently Selected:

Ireevi 16: EBTP

Highlight

Copy