Ireevi 14

Á mẹmẹẹ hụ aza ọnị ụkụ za ụpẹngụ enyi ụkụ.

1Ẹnẹyịmavara ộ kà a yị Imosiisi ka, 2#Imt 8.4; Ịmk 1.44; Irk 5.14; 17.14Ịsị a vaa mẹ ọza ọnị ụkụ za ụpẹngụ dị ọ́ ta yị, ịhị áa vaa kà a ka ụkụ anị ọ́ọ tá yị: Ọda ọ́ vị nị. Ịjị ọza ọ̀ọ va ka ịrẹyị anị yị ohirẹsụ irehi Ohomorihi, 3ohirẹsụ irehi Ohomorihi ọnọnị vaa jịnẹ tụ ẹhẹ hụụ ịzị aza ra hi, dị ọ na zama ụkụ za ọnọọ re, ọ̀ọ ta, 4ohirẹsụ irehi Ohomorihi vaa kà a ka à hụ agụvị ọza ọnị ụkụ ọnọnị za aanị, dị à sị inomi ireyi-ireyi ẹẹva, ana wụra mẹ̀ ịsọvọ ọchị isida, owu ovivi, ọnịrị avị ana aā hị́ ihisopu; 5dị ọ kà a ka à wụ inomi ọnọọ ọnya, dị à jị ọ hi ini ụnọkọ ana á sị ụmọpa mẹ ana a dà enyi ini okuha hi. 6Ọ vaa sị inomi ireyi-ireyi ana vọ aanị, beri ọchị isida, owu ovivi, ọnịrị avị ana aā ihisopu aanị, dị ọ jị wa ngụ inomi ana a wụ̀ aanị. 7O vee che ọnọọ sẹ ọza ana nyị ka à nyịna ịdọtị ụkụ ana za a aanị kwooze, dị ọ̀ va ka a ka ụkụ anị ọọ tá. Ọ̀ọ sị ọsọnị mẹ, dị ọ hụrẹ inomi ana vọ aanị ụvọ dị ọ hira na ngụ avị. 8Ọza ana nyị ka à mẹ ido ụkụ ana za a aanị vanaa nyịna ịta anị, dị ọ kụ́ ẹyị anị, dị ọ hụ enyi, ọ̀ọ sị enyi hụ, ọ kụkụ vaa nị. Ịrẹma ọnọọ, ọ vaa vẹ vaa ra beri aza ana vọ ịzị e hi, ama ọ vaa vịdịị yà ịrẹma ajẹngụ anịị mẹ ẹkụhị ịhịmba da. 9Ịhị ẹ tụ ọ ẹkụhị ịhịmba, ọ vaa varẹma kụ ẹyịrẹsụ anị ọnịrị ịrẹwa anị, ẹyị ịnị ẹgọgọ anị ọnịrị avaba ẹyị ịnị ẹngụ anị ana vọ. Dị ọ vana nyịna ịta anị, dị o hú enyi. Ọ̀ọ sị ẹnẹnị mẹ, ọ vaa nị ọgọnị. 10Ịhị ẹ tụ ọ ẹkụhị ịhịnta, ọ vaa sị ezi atẹmẹ ẹẹva ọnọrụ-ọnọrụ ọnịrị ozi atẹmẹ ọnẹẹ ikonya. Ịrayị ọnya ezi atẹmẹ ẹnẹẹ vaa vị nị; à sị a nyị ịsị ẹ zị wa. Ọ rẹ vaa sị ayị ọyị kwọ ikirogirami ẹẹta ana a sị angwẹ hura, ọnịrị angwẹ orivi ijongo ọnya. 11Ohirẹsụ irehi Ohomorihi vaa sị ọza ọnọnị ọnịrị ịsị ịsọvọ ẹnẹnịị nọ enoze irehi Ohomorihi. 12Dị ohirẹsụ irehi Ohomorihi ọnọọ sị atẹmẹ ẹnẹẹ ọnya ana vị ọnọrụ, dị ọ sị mẹ̀ ịsọvọ ka ộ rị ịvị, ọ vaa sị angwẹ ijongo ọnyara beri ọ, dị o mí wa hi Ẹnẹyịmavara ọ̀yị mẹ ẹyịza ụnarenyi yọ. 13Ọ vaa wụ̀ ozi atẹmẹ ọnọọ ịzị ẹ yaā wụ ịsị ịsọvọ ịvị ọnịrị ịsị ịsọvọ ana aā rị ịra, aha ana a nyị ka à yaa mẹ̀ ẹ; ịsị a sị mẹ̀ ịsọvọ agụvị ka ọza ộ rị ịvị, vị ohirẹsụ irehi Ohomorihi anka ịsị ịsọvọ ịvị avọọ. Ịsa Ohomorihi ịnya kẹnẹ ọ vị nị. 14Ohirẹsụ irehi Ohomorihi vaa sị ịsụpa ọnọnị, dị ọ sị igege da a, dị ọ sị da ẹtẹẹtẹ ụtọ ụvọrị ọza ana a kà ụkụ anị ọọ tá aanị. Ọ rẹ vaa sị ọnọọ da a igege ọbanyị ụvọrị ọnịrị igege ọbanyị ahụ ụvọrị anị. 15Dị ohirẹsụ irehi Ohomorihi vaa ka angwẹ orivi ọnọnị hi ịnị ụvọta ụvọha ọnị ụvọta, 16dị o jị igege ụvọrị anị ngụ angwẹ ọnọọ, dị o che e sẹ ẹtẹ ụpẹ ịhịmba ọvịdị Ẹnẹyịmavara. 17Ọ vaa sị angwẹ ana ya ịnị ụvọta anị aanị, dị ọ sị dá ẹtẹẹtẹ ụtọ ụvọrị ọza ana nyị ka à nọ̀ọ ka ụkụ anị ọọ tá aanị, ọ rẹ vaa sị angwẹ ọnọọ da igege ọbanyị ụvọrị ọnịrị igege ọbanyị ahụ ụvọrị anị ịrẹsụ ọnị ọ́ vịdị sị dá aha ẹnẹnị. 18Ohirẹsụ irehi Ohomorihi ọnọnị vaa và angwẹ ana vọ tụ ịnị ụvọta anịị hi ọza ana nyị ka à nyịna ịdọtị anị aanịị ịrẹsụ. Aanị a mẹ vaa mẹ avaba ido ẹnẹnị, dị à vaa kà a ka ụkụ ọza ọnọnị ọ́ọ tá nị. 19Ohirẹsụ irehi Ohomorihi vaa mẹ̀ ịsọvọ ịvị yị ọza ọnọnị dị ọ̀ mẹ avaba ịsị a vọrọ ka à mẹ dị ọza ọnọnị ọ̀ nị. Ịrẹma ọnọọ, ọ vaa wụ̀ ịsụpa ịsọvọ ana aā rị avaba anị ịra, 20dị ọ vaa sị ịsọvọ ana aā rị ịra aanị ọnịrị ịsọvọ ịsọyịrị vẹ ịrẹsụ ụta ịsọvọ. Aanị ohirẹsụ irehi Ohomorihi mẹ mẹ vaa mẹ avaba ịsị avọrọ ka à mẹ dị ọza ọ̀ nịị yị ọ, dị ọza ọnọọ nị nị. 21Ama ọza ọnọọ ọ̀ọ vị oniruwa, dị ẹ̀ yị vavọọ nyị ịsa ana vọrọ ka ọ̀ọ vị oniruwa, dị ẹ̀ yị vavọọ nyị ịsa ana vọrọ ka ọ̀ sị vẹ nị, ọ vaa sị ozi atẹmẹ ọnọrụ ọnyaa vẹ ọ̀yị m ẹ ịsọvọ ene si sí ụta varẹma, dị à sị mẹ ẹyịza ụnarenyi yị Ẹnẹyịmavara, ohirẹsụ irehi Ohomorihi ọ nyị nị. Ọnị a vaa sị mẹ̀ ịsaa sịị mẹ ka ọ̀ nị nị. Ọ vaa si ayị ọ̀yị kwọ ikirogirami ọnya ana a sị angwẹ orivi hùra, ọ̀ yị mẹ̀ ịsọvọ ịsọyịrị, dị ọ rẹ sị angwẹ orivi ijonggo ọnya beri ọ. 22Ọ rẹ vaa sị arivadi ẹẹva ọnịrị arekuku ẹẹva, anka ọpa ọnị ọ zụ mẹ, ọnya vị ana a vaa sịị mẹ̀ ịsọvọ ịvị, dị a sị ọnya mẹ̀ ịsọvọ ana aā rị ịra. 23Ịhị ẹ tụ ọ ẹkụhị ịhịnta ana a mẹ ịsị ana aā mẹ ọ̀yị nyịna a, ọ vaa kụ ịsị ẹnẹnịị vee tu ohirẹsụ irehi Ohomorihi enoze irehi Ohomorihi. 24Ohirẹsụ irehi Ohomorihi vaa sị ozi atẹmẹ ọnọọ ọnịrị angwẹ orivi dị ọ sị wa mẹ ẹyịza ụnarenyi yị Ẹnẹyịmavara, ohirẹsụ irehi Ohomorihi ọ nyị nị. 25Ọ vaa wụ̀ ozi atẹmẹ ọnọọ, dị ọ sị igege dá anị dị ọ sị da ẹtẹẹtẹ ụtọ ụvọrị ọza ọnọnị, dị ọ rẹ sị dá igege ọbanyị ụvọrị ọnịrị igege ọbanyị ahụ ụvọha anị. 26Ohirẹsụ irehi Ohomorihi ọnọnị vaa ká angwẹ ọnọnịị hi ịnị ụvọta ụvọha ọnị ụvọta, 27dị ọ jị igege ụvọrị anị ngụ ọ, dị o che e sẹ ẹtẹ ụpẹ ịhịmba ọvịdị Ẹnẹyịmavara. 28Ọ vaa sị angwẹ ọnọọ dá aha ọnyọọnya ọnị ọ vịdị sị da; ẹtẹẹtẹ ụtọ ụvọrị ọza ọnọnị, igege ọbanyị ụvọrị ọnịrị igege ọbanyị ahụ ụvọrị anị. 29Angwẹ ana vọ tụ ịnị ụvọta anị vị ọnị ọ vaa vàa hi ọza ọnọọ ịrẹsụ. Aanị ọ mẹ vaa mẹẹ mẹ avaba ịsị a vọrọ ka à mẹ dị ọza ọnọnị ọ̀ nị nị. 30Ịjọnọọ ọ vaa sị arivadi ọnya à vị arekuku ọnya 31dị ọ sị mẹ̀ ịsọvọ ịvị, dị ọ sị ọsa mẹ̀ ịsọvọ ana aa rị ịra beri ịsọvọ ịsọyịrị. Aanị ohirẹsụ irehi Ohomorihi mẹ vaa mẹẹ mẹ avaba ịsị a vọrọ ka à mẹ dị ọza ọnọọ ọ̀ nị nị, 32Ọda ẹnẹnị a mẹ yị ọza ọnị ụkụ ọbanyị za, dị ẹ̀ yị nyị ụkata ọ̀ yị mẹ avaba ịsị a vọrọ ka ọ̀ mẹ dị à sị nyịna ẹ yị.

A mẹmẹ nyịna irehi ana chị uru

33Ẹnẹyịmavara ộ kà a yị Imosiisi ọnịrị Eerọnị ka, 34Ịjị waa na sị ngụ ẹtẹ Ikanaani, ọnị ọnị ọnyọọnyị ịnị ẹtẹ ọnọọ ọ̀ọ chị́ uru nị. 35Ọza ana nyị irehi ọnọọ vanaa kà a yị ohirẹsụ irehi Ohomorihi ka irehi anị o si nyima aa chị́ uru. 36Ohirẹsụ irehi Ohomorihi vaa kà a ka à kụ avaba ẹnya ene hi ini irehi ọnọọ tụ ẹhẹ, dị ọnị ọ̀ va na zama uru anaa chịị hi ọ aanị re; ẹ̀ yị vavọọ, avaba ẹnya ẹnẹẹ áa kà a ka ẹ́ yị kụkụ nị nị. Àa sị ọ kụ́ hi ẹhẹ, dị ọ va ngụ ịnị eehi ọnọọ ne re e. 37Ọ vaa zama uru anaa chịị hi ini irehi ọnọọ aanị re; òo re ka ugene irehi ọnọọ aà dà aha ẹnyị vị ẹrẹẹrẹ à vị ovivi, dị aa rị ugene ọnọọ ngụ ọ ịnẹ nị, 38dị ohirẹsụ irehi Ohomorihi ọnọọ jịnẹ tụ ẹhẹ hụụnị irehi ọnọọ, dị o gù oze hi ọ mẹ ẹkụhị ịhịmba. 39Ịhị ẹ tụ ọ ẹkụhị ịhịmba, ohirẹsụ irehi Ohomorihi ọnọnị vaa varẹma vaavẹ vaa zama a re. Àa vị uru ọnọnị sị gara hi irehi ọnọọ, 40Ọ vaa mẹ ọda ka à tụ ịrẹta ẹnẹẹ ọnị uru chị hi ịnị anị dị è ne ne wa va hi ịzị è yị zoza ịrẹma ẹkụra. 41Ịrẹma ọnọọ, dị ọ kà a ka à hara avaba ugene ịnịnẹ irehi ọnọọ bemi-bemi, dị a na va avaba ịsị a hara hụụnị anị aanị i ịzị è yi zoza ịrẹma ẹkụra. 42Ẹ vaa kụ ịrẹta ọsaa dọ ịrẹta ẹnẹ ẹ́ tù kwooze aanị ịrẹsụ aha ẹnịnị, dị ẹ varẹma sị ịsa ọwọọwa sisi irehi ọnọọ. 43Ịrẹma ana sị ịrẹta ana chị uru aanị hu kwooze, dị a sị ugene anị hara, dị a varẹma sị ọ sisi, irehi ọnọọ ọ̀ọ varẹma vanaa chi uru, 44Ohirẹsụ irehi Ohomorihi ve nee re e, uru ọnọọ ọ̀ọ sị gara hi ọ, vị irehi ọnọọ ẹ̀ yị kụkụ nị avọọ nị. 45E vee wú irehi ọnọọ hi ẹtẹ, dị a kụ́ ịrẹta anị, ọchị anị ọnịrị avaba ịsị e si sisi ọ na va ha ịrẹma ẹkụra ịzị ẹ̀ yị nị. 46Ọza tụra ọza ana àa ngụ irehi ọnọọ ụmẹ ene e sị gu oze hi ọ, ẹ́ yị kụkụ nị pooro dị oruva ò tù. 47Ọza tụra ọza ana àa hụtẹtẹ ini irehi ọnọọ à vị ka vị ọ́ yaa ịzọọ rị ịsa nị, vanaa nyịna ịta anị. 48Ama, ịrẹma ana a raa varẹma sisi irehi ọnọọ, ohirẹsụ irehi Ohomorihi ọ̀ọ vavẹ vaa zama a re, dị o re ka ẹ yị kụkụ nyị uru ịnị anị nị, ọ vaa nọ̀ọ ka irehi ọnọọ ọ́ọ nị, agụvị ka uru ana vịdị chị́ hi ọ ọ́ọ ta saka-saka. 49Àa vaa nyịna irehi ọnọọ, ohirẹsụ irehi Ohomorihi vaa sị inomii ẹẹva, beri ọchị isida, owu ovivi ọnịrị avị Ihisopu, 50Ọ vaa wụ̀ inomi ọnọọ ọnya, dị ọ jị ọ hi ịnị ụnọkọ ana a sị ụmọpa mẹ, dị a dà enyi ini okuha hi ọ. 51Dị ọ sị ọchị isida ọnọnị vaka avị ihisopu, owu ovivi ọnịrị inomi ana yara ọnya ana vọ aanị, dị ọ jị wa ngụ inomi ana a jị va hi ini enyi aanị. Ọ̀ọ sị wa jị ngụ ọ, dị o che e sẹ irehi ọnọọ ụpẹ ịhịmba. 52Avọọ ọ́ mẹ vaa sị inomi ọnọọ beri enyi ozoza, inomi ana yara, ọchị isida, avị ihisopu ọnịrị owu ovivi ọnọnịị nyịna irehi ọnọọ nị. 53Ọ̀ọ vavọọ sị ọ mẹ, ọ vaa hụrẹ inomi ọnọọ ụvọ ka ò hira hụụnị ẹkụra dị ọ̀ọ ngụ avịị na. Aanị ọ́ mẹ vaa mẹẹ mẹ avaba ịsị a vọrọ ka à mẹ dị à sị mẹ ka irehi ọnọọ ọ̀ nị, dị ọ kụkụ nị nị. 54Ọda ana á mẹ ịnị ịrẹyị ụkụ ọbanyị yị: â mẹ̀ ẹ yị ụkụ ẹngụhụ, 55dị a mẹ̀ ẹ yị ịta à vị irehi ana chị́ uru nị, 56dị a rẹ mẹẹ yị ịtahụ à vị ikenebe ọnịrị ẹngụ ọza ọ̀ọ hụ́ nị. 57Ọda ẹnẹnị ẹ vaa mẹ ka à kà a ka ịsa ọ́ọ nị à vị ẹ́ yị nị nị.

Currently Selected:

Ireevi 14: EBTP

Highlight

Copy