Arụwẹ 1

Arụwẹ Ịpaapa

Ayodu ọnịrị Ịrịnya Ijerusarẹmị

Ọnịsẹ kà:

1Oogwoo, Ijerusarẹmị ana vịdị maanị nyị aza a maanị tụ osusu aanị nịị!

Ẹkụra ọnị avaba anẹhẹ vịdị maanị sị ụbanyị yị ọ kụkụ tịtẹ goo anka osoku aanị nịị!

Ẹkụra ana vịdị ya ọvịdị ẹkụra ana vọ, ọ kụkụ vị ọrịhị anẹkụra ana vọ aanị nị.

2Avaba ịrahụ vị ọnị Anijerusarẹmị aa jị òrèrè dị eyi ẹnịnị vị ẹgọ-ẹgọ.

Ịnị avaba aza ẹnị ẹnịrịị vịdị vị ọta ẹ́ yị va nyị ikonya ana va sị wa ayị nẹtẹ.

Avaba aza ọnị ọnịrịị vịdị zee vi ene vene e, dị ẹ varẹma kụkụ kwẹẹtẹ tu wa nị.

3A sị Anijuda nịnị dụ hụrẹ ẹkụra ẹnịnị. Ẹyaa rị ụya. Ẹnịnị ẹ sị vara ọrịhị.

Ẹnịnị vị ana kụkụ ra ẹkụra ọsa ịzị ẹnịnị ẹ̀ yị nyị ẹtẹ tụ.

Aza anaa dụ wa vị ana kara wa okiri-okiri, ẹnịnị ẹ yị re oze zwè zị.

4Avaba oze Ijerusarẹmị aa zị ẹngụ ka ẹ yị ọza ana aa zị ẹnị.

Avaba Oze ovwoovu ọbanyị anaā zịị ngụ ẹkụra vi osusu

Ẹ yị nyị ọza ana kụkụ a vẹ ịnị irehi Ohomorihi vaa mẹ ahẹkẹ ẹkụhị eche.

Ezi ẹnyẹnẹẹ anaā jị ahẹ ịnị irehi Ohomorihi kụkụ e sụ ùnè,

dị ohirẹsụ irehi Ohomorihi nịnị eè rimanya nị.

Ijerusarẹmị aa ba arụwẹ ọngwọọngụ.

5Ẹnẹyịmavara ộ sị ụya rị Anijuda nịnị agụvị ebira odivi ẹnịnị,

dị ọnịvị ẹnịnị nyị ẹbẹẹba ẹnịnị dị ẹyaa mẹ ọda tụra wa ịrẹsụ nị.

A kụ ezi ẹnịnị za ọrịhị ne hi ụnọngụ-ụnọngụ.

6Ụbanyị Anijerusarẹmị ịyẹẹyẹ ọ sị vara ịtọpa.

Ẹnị ọdọvịdị ẹnịnị vana kụkụ sị mẹ̀ ẹ anka ùnè ọnị ụngwẹ sị tụ ọkụmị avọọ.

Ẹ́nịnị kụkụ sị mẹẹ uye ọnị ozube aa dụ dị echi sị ọ ha avọọ nị.

7Anijerusarẹmị maa rị ụya, ẹ kụkụ aa tamayị ẹhẹ ọyịza-ọyịza ene ẹnị ra ịyẹẹyẹ.

Ịjị ụvọ ọnịvị ẹnịnị ku wa, ẹnịnị e yi re ọza va gụ wa ụvọ,

dị ọnịvị ẹnịnị kụkụ è nyị wa unyi nị.

8Anijerusarẹmị nịnị ẹ sị tẹ agụvị ebira odivi-odivi ẹnẹ yaa mẹ̀.

Ẹ yị kụkụ nyị ụbanyị vụrụ-vụrụ. Asị iruvo ẹnịnị re.

Eyee rimanya, ụhị maa nyị wa ẹ kụkụ à sị eyi tẹ̀.

9Ebira odivi ẹnịnị vana aza ee re chapaa, ama ẹnịnị é yi rò ịrẹyị ka sẹ vaa vị ọvavịrẹma anị kẹ.

Agụvị avọọ ẹ maanị hyẹdụ divi-divi nị. Ẹ́ yị nyị ọza anaa sị wa ayị nẹtẹ vụrụ-vụrụ.

Ụvọ ọnịvị ẹnịnị o ku wa, dị ẹ kụkụ e nowu ka Ẹnẹyịmavara ọ̀ vayị ẹnịnị nị.

10Ọnịvị ẹnịnị ẹ raà kụ avaba ogu ẹnịnị.

Ẹnịnị ê re ọnịvị ẹnịnị maa ngụ ịnị irehi Ohomorihi,

ịzị Ẹnẹyịmavara kà ọọ vị aha eenyisi yị aza ẹnẹ yị vị Aniju ka ẹ̀ ngụ.

11Avaba Anijerusarẹmị aà jị òrèrè ọngwọọngụ e mee si ịsọyịrị;

Ẹ kụkụ aa sị ogu ẹnịnị na dọ ịsọyịrị agụvị asị ụngwẹ wụ̀ ẹnị.

Dị Anijerusarẹmị kụkụ a jị òrèrè, dị ẹ yaa hị́ Ẹnẹyịmavara kà ọ̀ navọ ò re ụya ọnị ẹnị aa rị aanị nị.

12Ẹ yaa hị́ avaba aza anaa parahu ẹ maa jị òrèrè. Ẹ ka, “Ọzọza o re ịsị Ẹnẹyịmavara sị ẹnị mẹ̀.

Ẹ yị nyị ọza ana maanị rị ẹngụ ụya ọnị ẹnị rị aanị da”.

Ẹnẹyịmavara vị ana sị ọyịkụ-ọyịkụ sị sị ụya rị ẹnị.

13Ohomorihi ọ raà ka ịra ku ẹnị hụrị ẹbẹẹba, ẹngụ ẹnịnị ọ ta jịnẹ ịra gogogo.

Ịrẹpa ọnị Ohomorihi va zi ẹnị, ọ sị ẹnị za nya ẹtẹ,

dị ọ navọ ẹnị ka ẹnị ẹ̀ maanị rị ụya nị.

14O re avaba ịvị ọnị ẹnị mẹ̀, dị ọ sụ́ ọ vabẹ nị;

Dị ọ sị ọọ gẹ ẹnị ọrọkọ, dị ẹnya sị ngụ ẹnị nị.

Ẹnẹyịmavara ộ sị ẹnị chire ọnịvị ẹnịnị ụvọ. Ẹ yị hyakụ nyị ịsị ẹnị zụ pe wa mẹ vụrụ-vụrụ.

15Ẹnẹyịmavara ô nyị isoja ayị ana kata hu kere-kere unyi;

dị ọ tụ isoja hụrị aha ọsa dị e ve vu ezwọọmụha ayị ẹtẹ nị.

Ệ kwọrọ avaba aza ayị và ha anka a mẹẹ kwọrọ asẹ ịnị ụkọ avọọ.

16Ịsị ẹ vị iruvo ọnị maa sịị jị òrèrè dị ẹgọ ee si ịnị eyi amị yị.

Ẹ yị nyị ọza ana zụ sị ayị amị nẹtẹ vụrụ-vụrụ. Ẹ yị nyị ọza ana zụ hụ́ mị ayọvị.

Ụvọ ọnịvị ayị ọ sị kara ayị; ẹ sị yị tụ avosusu.

17Anịzayọnị nịnị aa da ịpẹ ka à gụ ẹnị ụvọ, ama e yi re ọza gụ wa ụvọ.

Ẹnẹyịmavara ọ raa hị́ ọnịvị ẹnịnị ana kara wa ịrẹkụ tụ wa.

Dị ẹ kụkụ aa sị Anijerusarẹmị mẹ enyinyi nị.

18Ịsị Ẹnẹyịmavara mẹ̀ vana vọrọ, agụvị ka ẹnị ẹ rẹẹ yị saasa ịrẹyị Anị nị.

Ama re ụya ọnị ẹ yaa rị aanị.

A raà kụ ezi ọnọrụ ẹnịnị ọnịrị ezi anẹẹ ẹnịnị za ọrịhị ne hi ẹkụra ọsa.

19Ệ hị́ aza ene vịdị sì ịrẹyị ẹnịnị, ama di e vene wa nị.

Ohirẹsụ irehi Ohomorihi nịnị ọnịrị azọkụ nịnị e wusu hi ịnị ẹkụra

é mee si ịsọyịrị ọyị za ayị zu.

20Tee! Ẹnẹyịmavara navọ we re ẹngụkata ọnịrị ụya ọnị yaa rị aanị.

Ayị ayị o si du chuku-chuku ịsị ebira odivi sị yị mẹ̀.

Aà wụ̀ aza ha ịnị ubooro, wàa va yà ịnị eehi usu rẹ sị ngụ tu wu.

21Wụ́ ị maa jị òrèrè, ama ẹ yị nyị ọza ana vọrọ ka ọ sị ayị amị nẹtẹ.

Avaba ọnịvị ayị ẹ raà wụ́ ẹngụkata ọnị Ẹnẹyịmavaraene kụ tu yị dị ẹ yaa jẹ ka ọ yara mẹ nị.

Ẹnẹyịmavara sị ẹkụhị ọnị ụ wo oto vẹ, dị ọnịvị ayị nịnị ẹnị ẹ rẹ maanị rị ụya ọnọnị.

22Ẹnẹyịmavara ọ̀ navọ ọnịvị ayị ẹ̀ rị ụya avaba ebira odivi ẹnịnị. À sị ụya rị wa anka ị maa rị ụya ebira odivi aanị. Ẹnị aa jị òrèrè ọngwọọngụ agụvị ụya ọnị ẹnị aa rị, dị ẹngụ aa zị ẹnị tụ ịnị ịhị nị.

Currently Selected:

Arụwẹ 1: EBTP

Highlight

Copy

Compare