Ijosuwa 6

Ijeriko ọ sị hyẹdụ

1Ụmẹ ọnọọ, oze ovwoovu ẹkụra Ijeriko vị ana a hụvị Anisirẹrị nịnị chire nganganga. Ẹ yị nyị ọza ana zụ ngụ ịnị ẹkụra, ẹ yị rẹ nyị ọza ana zụ jịnẹ tụ ẹhẹ. 2Ama Ẹnẹyịmavara ọ kà a yị Ijosuwa ka, ọnị ọ ra sị Ijeriko ọnịrị ohinọyị anị ne beri ọkụrẹkụ ọkarị-ọkarị ẹnịnị chire wa ụvọ. 3Ọ kà, avaba ọkụrẹkụ Anisirẹrị nịnị ẹ zị ụsẹ jesi kara Ijeriko ụpẹ ọnyara ịnị ẹkụhị. Dị ẹ vavọọ mẹ ẹkụhị ịhịnọnyị. 4Ọ kà a Ijosuwa ọ ka yị ohirẹsụ irehi Ohomorihi ịhịmba ka ọzọza ọ sị ọpanyị ịdẹba rị ụvọ tụ ọvịdị apoti oto; ịhị ẹ tụ ọ ẹkụhị ịhịmba dị ẹnịnị ẹ zị ụsẹ jesi kara Ijeriko ụpẹ ịhịmba, dị ohirẹsụ irehi Ohomorihi nịnị ee hu ọpanyị ẹnịnị. 5Ịjị ẹnịnị ẹ̀ẹ wụ ka ohirẹsụ irehi Ohomorihi nịnị e hu ọpanyị dị ẹ tụra a ẹtẹ nị, dị avaba aza ẹ na owu, dị ẹtẹ ọ sụ hyụụ ịjọnọọ ọvọ Ijeriko ve wu va hi ẹtẹ, dị avaba aza kụkụ a ngụ eehi tu wa. 6Dị Ijosuwa ana vị ozi Inuni hị́ ẹnị ohirẹsụ irehi Ohomorihi nịnị gụ, dị ọ ka ẹnịnị ẹ sị apoti oto Ẹnẹyịmavara nị, dị ọ nyị ẹnị ịhịmba ka ọzọza ọ sị ọpanyị ịdẹba dị ẹ dọ ọvịdị nị. 7Dị ọ ka ẹ yị aza ana vọ ka, ẹnịnị ẹ nị zị ụsẹ kara Ijeriko, ama ẹnịnị ana kụ ẹnya ịrẹkụ ẹ dọ ọvịdị apoti oto Ẹnẹyịmavara. 8Ijosuwa mẹ vavọọ sị ọ ka yị aza ẹnẹnị, dị ẹnị ohirẹsụ irehi Ohomorihi ịhịmba ana kụ ọpanyị ịdẹba ịhịmba rị ụvọ dọ ọvịdị apoti oto Ẹnẹyịmavara, dị e yee hu ọpanyị ẹnịnị nị. 9Ẹnịnị ana kụ ẹnya ịrẹkụ rị ụvọ vị ene hi ọvịdị ọnịrị ịrẹma ẹnịnị ohirẹsụ irehi Ohomorihi, dị ohirẹsụ irehi Ohomorihi nịnị e yi hu ọpanyị ẹnịnị pooro kẹnẹ nị. 10Ijosuwa ọ vịdị sị ọ ka yị aza ana vọ ka, asị e na owu, dị asị a wụ wa ịrẹyị vụrụ-vụrụ ọ ka, asị ịrẹyị ikonyara hụrẹ wa irenu, ẹ yị vị ịhị ọnị ọ́ ka yị wa ka ẹ na owu dị ẹnịnị ẹ ve na owu. 11Avọọ a mẹ sị apoti oto Ẹnẹyịmavara jesi kara Ijeriko ụpẹ ọnya ịhị ọnọọ nị. Dị ọzọza và nọ udi anị dị ọ na sụ ịrahụ nị. 12Ijosuwa ọ kwẹẹtẹ ẹnẹnẹ viri-viri ịnị eyinẹhẹ anị, dị ẹnị ohirẹsụ irehi Ohomorihi nịnị rẹ sị apoti oto Ẹnẹyịmavara nị. 13Dị ẹnị ohirẹsụ irehi Ohomorihi ịhịmba ana kụ ọpanyị ịdẹba rị ụvọ rẹ dọ ọvịdị apoti oto Ẹnẹyịmavara, dị ẹ yee hi hu ọpanyị ẹnịnị nị. Aza ana kụ ẹnya ịrẹkụ rị ụvọ vị ene re hi ọvịdị ẹnị ene e hu ọpanyị, dị ẹ rẹ hi ịrẹma apoti oto Ẹnẹyịmavara. Dị ohirẹsụ irehi Ohomorihi nịnị vavọọ e hu ọpanyị ọnọọ na nị. 14Ịnị eyinẹhẹ anị dị e re jesi kara Ijeriko ụpẹ ọnyara, dị ẹ va varẹma nọ udi ẹnịnị nị. Avọọ ẹ mẹ mẹ̀ ẹ ẹkụhị ịhịnọnyị nị. 15Ịhyẹgwịhịmba anị dị ẹnịnị jintu kwẹẹtẹ etumeyọnị ịhị ọnọọ, dị ẹ jesi kara Ijeriko anka ẹ mẹ vịdị yị mẹ̀ ẹ nị. Dị ẹ vavọọ zị ọ ụpẹ ịhịmba ịhị ọnọọ nị. 16Ịnị ana gụ ọ ụpẹ ịhịmba, ẹnị ohirẹsụ irehi Ohomorihi nịnị e hu ọpanyị dị e tụra ẹtẹ kẹnẹ, dị Ijosuwa ka ẹ yị aza ẹnẹẹ ka, ẹ na owu tụ ẹba Ẹnẹyịmavara ọ ra sị Ijeriko chire wa ụvọ. 17Ijeriko ọnịrị avaba ịsa ene hi ịnị anị saka-saka vị ene ve du ha yị Ẹnẹyịmavara. Ịrahabị ana vị ọsẹrẹka ọnịrị avaba aza anị kẹnẹ a vaa navọ nị, agụvị ka ọ vịdị sị ọnụtụ ẹnịnị tẹ. 18Ọ kà, asị ẹ na sị ịsa ọnyị-ọnyị hụụnị avaba ịsa ana ka e du ha aanị, ka ẹyị vavọọ ẹnị nyẹmba vị ene ve vú ẹtẹ saka-saka, dị ẹ ra kụ ẹngụkata ve tu avaba Anisirẹrị. 19Ama ọ ka, avaba ịsa ana sị isiriva ọnịrị Igooru beri enyusẹ ozoza-ozoza ana vọ mẹ, vị Ohomorihi. Ẹnịnị e kụ wa na tụ́ ịnị irehi anị. 20#Ihib 11.30Ịjị ẹnịnị wụ ọpanyị ịrẹyị kẹnẹ, dị ọzọza ọ sị ọngwẹ tụ ẹbẹẹba na owu obooro-obooro ọnọọ dị ọvọ Ijeriko wu va hi ẹtẹ. Dị ẹnịnị ẹ ngụ ẹkụra tu wa dị ẹ rị wa nị. 21Avaba ịsa vị ene du ha saka-saka, anọrụ, anẹẹ, imaaru, atẹmẹ ọnịrị ịkẹrịkẹtẹ nịnị. Avaba anị bemi vị ene vú ẹtẹ. 22Dị Ijosuwa ka yị anọrụ ẹyịva ana aa vịdị tụ́ ne re ẹtẹ ọnọọ ka ẹ mẹ̀ ịsa ọnị ẹ hị́ eku anị yị ọsẹrẹka ọnọọ. Ẹnịnị ẹ ngụ ịnị eehi anị dị ẹ kụ́ ọnịrị aza jịnẹ tụ ẹhẹ nị. 23Ịzẹyịza dị ezwọọmụha ẹnẹẹ ngụ ịnị irehi anị dị ẹ sị ọnịrị ada anị ne beri ọnyị anị nị. Dị kụ́ ẹyịnyara anị anọrụ ọnịrị avaba anda ẹnịnị ana vọ, dị ẹ kụ wa ne hi ịzị Anisirẹrị nịnị kụ udi tụ nị. 24Anisirẹrị nịnị vị ana rị Ijeriko ọnịrị avaba ịsa ene hị́ ịnị anị ịra. Ịsa anị a sị isiriva ọnịrị igooru beri enyusẹ ozoza-ozoza ana vọ mẹ kẹnẹ ẹ kụ ne hị́ ịzị a kụ ịsa hi yị Ẹnẹyịmavara nị. 25#Ihib 11.31Ama Ijosuwa ọ navọ ka asị a nyị ịsa ẹ mẹ Ịrahabị ana vị ọsẹrẹka ọnịrị avaba aza ada anị ọnị ọnịrị ra ịnị irehi anị; ka ọ sị ọnụtụ ọnị Ijosuwa tụ were ne re Ijeriko tẹ ẹ sị ha nị. Ịrahabị vị ana vị ana ra ịnị akakana Anisirẹrị nịnị va ngụ ajịnị. 26#1 Ohi 16.34Ụmẹ ọnọọ Ijosuwa chi hi wa dị ọ ka, asị Ẹnẹyịmavara vana zẹ ka o zoza yị ọza tụra ọza ana vana kwẹẹtẹ ka ọnị a tenyi Ijeriko da nị. Ozi ọzọkụ ọza ọnọọ ọ va sị ka ẹtẹ, dị ọ sị ozi ọdịrẹma anị vu ịrẹsụ nị. 27Avọọ Ẹnẹyịmavara mẹ ya pe Ijosuwa dị ọ ngụrẹyị tụ avaba ẹkụra nị.

Currently Selected:

Ijosuwa 6: EBTP

Highlight

Copy

Compare