Ijosuwa 4

Ịrẹta ẹwụrẹva ana sị tamayị ịvọpa Ẹnẹyịmavara ịnị irehu Ijodani.

1Ịjị avaba Anisirẹrị ra jịnẹ irehu Ijodani tu akẹnẹ anị, dị Ẹnẹyịmavara pe Ijosuwa ka ịrẹyị nị. 2Dị ọ ka, Ijosuwa ọ nyị ọnọrụ ọnyọọnya hụrẹ ịrẹsụ ẹwụrẹva Anisirẹrị nị. 3Dị ọ̀ kà a yị wa ka ẹ kụ ịrẹta ẹwụrẹva hụrẹ ịnị akakana irehu Ijodani ịzị ohirẹsụ irehi Ohomorihi jẹẹ. Ọ̀ kà yị wa ẹ kụ ịrẹta ẹnẹẹ za na ngụ ịzị ẹ vaa sụ dị eyi ọ nị. 4Ịzẹyịza, dị Ijosuwa nyị ọnọrụ ẹwụrẹva Anisirẹrị hụrẹ ịrẹsụ ọnyọọnya, dị ọ kụ wa gụ́, 5dị ọ kà yị wa ka ẹ na ịnị akakana irehu ịzị aza ana za apoti oto Ẹnẹyịmavara Ohomorihi ẹnịnị jẹẹ. Dị ọza ikonyi ikonya ẹnịnị ọ sị ịrẹta ọnyọọnya tụra ịza hụrẹ ịzọọ na ngụ ịzị ku udi tụ. Ịrẹta ọzọza vaa jẹẹ yị udi ịrẹsụ anị. 6Ịrẹta ẹnẹẹ vị apọtẹrẹwa ọnị ẹnịnị vaa sị tamayị ịvọpa ana mẹ ịzọọ pooro-pooro-pooro. Dị ezi ịrẹma e re e dị ẹ họ̀ wa ịsị ẹ vị uruvo ana aa si kụ ịrẹta ẹnẹẹ gụ tụ́ ịzọọ. 7Ịjọnọọ ẹnịnị vaa kà zụ wa Ẹnẹyịmavara mẹmẹ za enyi ịnị irehu Ijodani jẹẹ ọvịdị apoti oto anị. Dị a sị ọ jịnẹ irehu ịrẹsụ ẹtẹ ọyịwụ. Ịrẹta ẹnẹẹ Anisirẹrị nịnị vaa sị tamayị ụmẹ ọnọọ pooro zịna-zịna nị. 8Ịzẹyịza dị anọrụ ẹnẹẹ mẹ ịsị Ijosuwa ka yị wa nị. Dị ẹ kụ́ ịrẹta ẹwurẹẹva hụụnị akakana irehu Ijodani nị. Ịrẹta ọnyọọnya vị ana a jẹẹ yị ịrẹsụ ọnyọọnya ịnị ẹtẹ Isirẹrị anka Ẹnẹyịmavara mẹ mẹ̀ ọda yị Ijosuwa. Dị ẹ kụ́ ịrẹta ẹnẹẹ nọ ịzị ẹ sụ̀ ịrahụ ọnọọ nị. Dị ẹ da aha yọ ka a sị tamayị ịsa ana mẹ ịzọọ nị. 9Dị Ijosuwa rẹ kụ́ ịrẹta ẹwụrẹva gụ ịnị akakana irehu Ijodani ịzị ohirẹsụ irehi Ohomorihi ana za apoti oto jẹẹ ụmẹ ọnọọ nị. Ịrẹta ẹnẹẹ yị hị́ ịzọọ pooro vee tu ajịnị. 10Ẹnị ohirẹsụ irehi Ohomorihi ana za apoti oto ọnọọ vị ana saasa ọda Ẹnẹyịmavara ọnị Imosiisi ka yị Ijosuwa. Ẹnịnị vị ana a jẹẹ ịnị akakana irehu pooro dị avaba Anisirẹrị jịnẹ irehu ọnọọ ne tu akẹnẹ anị. 11Ịjị avaba aza raa jịnẹ ta, dị ẹnịnị ana za apoti oto vaa jịnẹ tụ akẹnẹ irehu nị. 12Ọkụrẹkụ ẹnịnị ana vị ezi Irubẹnị, ọnịvị Igadi ne beri Ịmanasẹ ẹ ku Anisirẹrị jịnẹ Ijodani anka Imosiisi mẹ vịdị ka yị wa. 13Ẹnị ọkụrẹkụ ẹnẹẹ vị ẹhụ akahị oze ẹbẹẹva ene tenyi ẹngụ ịrẹkụ. Dị ẹ jịnẹ tu akẹnẹ tụ́ inozi Ijeriko, Dị Ẹnẹyịmavara jẹẹ wa ịrẹma nị. 14Ịhị ọnọọ, Ẹnẹyịmavara kà Ijosuwa hịrẹ eyi avaba Anisirẹrị nị. Dị ẹnịnị vana sị ụbanyị yọ anka ẹ mẹẹ sị ịrẹsụ Imosiisi nị. 15Aza ana sị apoti oto mẹ yị jẹẹ ịnị irehu, dị Ẹnẹyịmavara kà yị Ijosuwa ka 16Ọ hị́ aza ana za apoti oto ka ẹnịnị ẹ jịnẹ tu ẹhẹ hụụnị irehu. 17Avọọ Ijosuwa mẹ mẹ̀ ọda yị wa nị. 18Obobooro ọnị ohirẹsụ ẹnẹẹ jịnẹ tụ ẹhẹ dị irehu ọnọọ vana kụ́ ọhaara dị o hi na ka abobo anị anka ọ mẹ vịdị ya nị. 19Ẹkụhị ọnị Ezi Anisirẹrị maanị sị jịnẹ irehu Ijodani vị ẹkụhị ẹẹwụ ịnị ụhwẹ ịpaapa ịrayị ẹnịnị. Ụhwẹ ọnọọ aa sị tamayị ụmẹ ọnị ẹ sị jịnẹ hụrẹ Ijipiti nị. Ẹ mẹ jịnẹ Ijodani, dị ẹ kụ́ udi tụ́ Igirigari, eyi ịzị ọyị zị vẹ Ijeriko. 20Igirigari ịzọọ Ijosuwa ya kụ ịrẹta ẹwụrẹva ẹnẹ ẹ kụ hụrẹ Ijodani gụ jẹẹ nị. 21Dị ọ kà yị Anisirẹrị ka ezi ịrẹma-ịrẹma ẹnịnị vaa họ̀ wa use ka ịsị ịrẹta ẹnẹẹ jị yị 22Dị ẹnịnị ẹ kà yị wa ka ịzọọ Ẹnẹyịmavara ya mẹ̀ ka Anisirẹrị nịnị ẹ jịnẹ ịrẹhụ Ijodani ịnị ẹtẹ ọyịwụ nị. 23Ẹnẹyịmavara Ohomorihi ẹnịnị va ana mẹ ka enyi ọ wụ, eyi ẹnịnị. Dị irehu vavọọ wụ pooro dị avaba aza jịnẹ tụ akẹnẹ anka ọ mẹ rẹ vịdị mẹ̀ ịnị okuha ovivi yị wa. 24Ẹnẹyịmavara ana vị Ohomorihi ẹnịnị ọ vavọọ mẹ̀ ẹ agụvị dị anẹkụra ana vọ ẹ yẹ ụkata anị, dị Anisirẹrị ẹ zụ́ nyị angwahi anị pooro zịna-zịna.

Currently Selected:

Ijosuwa 4: EBTP

Highlight

Copy

Compare