Ijosuwa 11

Anisirẹrị nịnị ệ rị avaba ohinọyị Aneyi ẹbẹẹba.

1Â nyị ọnọrụ ọnya aanị ọnị ịrẹha anị rị Ijabini ana vị ohinọyị Ịhazọ. Ịjị ọ wụ́ Ijosuwa mẹmẹ aa mẹrị ẹtẹ vẹ, dị ọ tụ́ eyiha-eyiha hị́ Ijowabi ohinọyị Ịmadọnị ọnịrị ohinọyị Isimironi ne beri ohinọyị Akisahwi. 2Avọọ ọ mẹ rẹ hị́ avaba ohinọyị nịnị ana hi ịrẹsụ ataba eyi ẹbẹẹba nị. Ọ hị́ ohinọyị Anaraba eyi ụvẹtẹ Ichinereti, ohinọyị uruvo ataba eyi ịzị ọyịị̄ ngụ ẹtẹ ọnịrị ohinọyị Inahwoti Ịdọọ. 3Ọ hị́ Anikenaani eyi ẹnyị ọsa, Anamọrị, Anihiti, Aniperizi Anijebusi ịrẹsụ ataba, ọnịrị Anihivi akẹtẹ Ihamọnị ịnị ẹtẹ Imizipa. 4Ịjị avaba ohinọyị ẹnẹẹ wụ́ enube ọnọọ, dị ẹ ku isoja hị́ ẹhẹ. Ẹnyị vị ana sị ahụ dị ọrụrụ-ọrụrụ ẹnịnị sị umaata ọnịrị ịkẹkẹ ịrẹkụ nị. Ọkọnị isoja vị ana gụ pọmị anka ààrẹ ụtọ ókụ̄. 5Dị avaba ohinọyị ẹnẹẹ va isoja ẹnịnị bẹ, dị ẹ kụ udi gụrị enyi Imeromi, dị ẹ ku ee zi isoja Anisirẹrị nịnị nị. 6Dị Ẹnẹyịmavara kà asị Ijosuwa hí angwa ẹnịnị agụvị ka ọnị a za wa chire Anisirẹrị ịnị ụvọ eyinẹhẹ anị, Anisirẹrị ẹ wụ̀ wa ha, dị ẹ tụ umaata ẹnịnị ọkụmị, dị ẹ rị ịkẹkẹ ịrẹkụ ẹnịnị ịra vaa ha. 7Dị Ijosuwa ọnịrị isoja anị na sụ wa avavoo ịzị e hi ọgụrị enyi Imeromi nị. 8Ịzẹyịza, dị Ẹnẹyịmavara za isoja ẹnẹẹ chire Anisirẹrị ụvọ, Ẹnịnị e huuna wa, dị ẹ dụ wa na ngụ oze Ịsịdọnị ọbanyị ọnịrị oze Imisirehwoti-Imayimi, huu na ngụ inozi Imizipe; va nyị ọza ana ha ịnị ẹnịnị vụrụ-vụrụ. 9Dị Ijosuwa mẹ̀ ịsa ọnị Ẹnẹyịmavara kà yị ọ nị. Dị ọ tụ umaata ẹnịnị ọkụmị va hi ẹtẹ, dị ọ rị ịkẹkẹ ịrẹkụ ẹnịnị ịra va ha nị. 10Ịnị ụmẹ ọnọọ, Ijosuwa sị vara eyi dị rị Ịhazọ, dị ọ sị ụ̀hwọ̀ wụ̀ ohinọyị ẹkụra ọnọọ nị. Ịhazọ ọ vị ohirẹsụ ẹkụra ana vọ nị. 11Ẹ yị nyị ọza ọnịrị ịsa ana nyị ụhwẹ ana ha ịnị ẹtẹ Ịhazọ. Ijosuwa vị ana rị ẹkụra ọnọọ ịra saka-saka. 12Avaba ẹkụra ẹbanyị-ẹbanyị ẹnịnị ẹnịrị ohinọyị ẹnịnị vị ọnị Ijosuwa vú ẹtẹ anka Imosiisi ọnụtụ Ẹnẹyịmavara mẹ vịdị ka tịtẹ. Ẹ yị nyị ịsa ana vọ ọnị Ijosuwa ẹ yị mẹ. 13Anisirẹrị nịnị ẹ yị rị ẹkụra ana sị ụvụ da jẹẹ ịra, ẹ vị Ịhazọ kẹnẹ ọnị Ijosuwa rị ịra. 14Anisirẹrị nịnị vị ana wụ̀ avaba aza ene hi ịnị ẹkụra ẹnẹẹ bemi-bemi va ha, dị ẹ kụ avaba ogu ẹnịnị ọnịrị ịsụpa ẹnịnị mẹ ẹnịnị nị. 15Ẹnẹyịmavara mẹ mẹ̀ ọda yị Imosiisi, avọọ ọnị mẹ rẹ mẹ̀ yị Ijosuwa, dị Ijosuwa vavọọ saasa a nị. Avaba ọda Ẹnẹyịmavara vị ọnị ọ sị ahụ ku. 16Avọọ Ijosuwa mẹ dọ avaba ẹkụra ene hi ịrẹsụ ataba ọnịrị avaba Ịnẹgẹvị beri Igoseni ọnịrị inozi beri Araba huu na ngụ ịnị ataba ọnịrị inozi ẹtẹ Isirẹrị nị. 17Hụrị ịnị ataba Iharaki na ngụ Ịsẹyị huu ne tu Ịbaarị-Igadi inozi Ịrẹbanọnị ụvẹtẹ ataba Ihamọnị. Ijosuwa ộ za ohinọyị ẹnịnị dị ọ wụ̀ wa ha nị. 18Ijosuwa ọ sị ụmẹ ọgọdọ pe ohinọyị ẹnẹẹ kụ ịrẹkụ di o vee huna wa. 19Ẹ yị nyị anẹkụra ọnịrị Anisirẹrị dọ yị ẹngụ ẹyị vị Anihivi ana ra Igibiyọnị. Avaba Anẹkụra ana vọ vị Anisirẹrị sị ịrẹkụ dọ wa ẹtẹ. 20#Ọda 7.16Ẹnẹyịmavara ụvọta ọ mẹ ayị anẹkụra ana vọ katẹngụ ka ẹ gẹ ịrẹkụ tu Anisirẹrị agụvị a wụ̀ wa ha bemi-bemi, dị asị Ẹnẹyịmavara vayị ẹnịnị anka ọ̀ mẹ vịdị raà mẹ ọda yị Imosiisi. 21Ịnị ụmẹ ọnọọ Ijosuwa ộ na ne vu ajịmasị anọrụ ana aā hị́ Anakimi ana ra ịnị ẹkụra ene hi ịrẹsụ ataba anka Ihebirọnị, Idebiri, Anabi beri avaba ẹkụra ana vọ ịnị ẹtẹ Ijuda ọnịrị Isirẹrị. Ijosuwa vị ana wụ̀ avaba ẹnịnị bemi-bemi ẹnịrị ẹkụra ẹnịnị, 22Ẹ yị nyị Anakimi ana vọ ẹtẹ tịtẹ ịnị avaba ẹtẹ Isirẹrị. Aza chee ẹnịnị ana vọ vị ana ra Igaza, ọnịrị Igati, beri Asidodi. 23Ijosuwa ộ dọ avaba ẹtẹ anka Ẹnẹyịmavara mẹ ọda yị Imosiisi. Dị Ijosuwa sị ẹtẹ ọnọọ yị Anisirẹrị ka ọ vị ẹẹnịnị nị. Dị ọ ga yị wa ịrẹsụ. Agụvị avọọ ẹnịnị tụ́ ụhwọ́ hụụnị ịrẹkụ ọyị kụ nị.

Currently Selected:

Ijosuwa 11: EBTP

Highlight

Copy

Compare