Ijoovu 35

Erihu aa yịị kà ịrẹyị

1Dị Erihu kà 2Ijoovu wèè ro ka ịsa vọrọ ọ vị ka ọ yà eyi Ohomorihi dị ọ jị ịhị yị ẹngụ anị? 3Òo kà a ka sị vị aha ọnị ọnị va rị? Sị ọnị sị dahi hu ka ọnị ọ yaanị mẹ̀ ịvị? 4Mee tụ́ ẹwụrị ọta awụ nịnị ohi.

5Kana eyi ihinẹba di u we re. Re ịzị eguhi nịnị nẹba na za. 6#Ijov 22.2,3Wàa mẹ̀ ebira odivi, ọnọọ ẹ yị zama Ohomorihi. Wàa mẹ ịrẹyị ẹnẹ ẹ yị vọrọ, dị ọ rụrụ pooro nị, vị ọ́ọ́ zụ zama Ohomorihi nị? 7Wàa mẹ̀ ebira ọyịza, ọgụvọ ịsị ụ sị mẹ yị Ohomorihi? Ẹ yị nyị ịsị Ohomorihi ee sìi hụụnị ụvọ awụ. 8Aza anka ẹwụ, ịrẹyị ọhịmị awụ aa zama nị. Ọyịza ọnị ụ rẹ mẹ, ẹnị ẹ rị aha anị nị.

9Ịjị ayịchama àa dẹngụ, dị aza ee nowu. Eyee nowu ka à va dọ ẹnị ha. 10Ama ẹnịnị ẹ́ ma kà a ka, ịzị Ohomorihi amị ana tụ mị yà, Ohomorihi ana sị ọyịtureyi yị wa ịnị ụmẹ ọnị ịrahụ ruma-ruma sị za wa. 11Ẹnịnị e yi si Ohomorihi ana sị ịrẹyọyẹ yị, dị ọ mẹ ka ya yẹ ịrẹyị hu ịsụpa ọnịrị inomi nịnị. 12Ẹnịnị vaa jị òrèrè ka à va gụ ẹnị ụvọ, ama Ohomorihi e yi tụ́ ohi, agụvị ka ẹ yaa sị ẹngụụ tụ ẹba, dị ẹ rẹ yaa mẹ̀ ebira odivi nị. 13Ịzẹyịza, Ohomorihi ẹ́ ma wụ orere kẹnẹ-kẹnẹ, Ohomorihi Ochẹtẹẹngụ.

14Àa vị aanị yọ, Ijoovu, ú meme ro o ka Ohomorihi ve tu ẹwụ ana ka we yi re e ohi. Ụ ka wa raà sị ịrẹyị awụ tụ ọvịdị anị, vị́ ụ jẹẹ ee zi ọ nị. 15Ví u wee ro o ka Ohomorihi ẹ́ ma sị ụya rị ọza, di u ro ka vị ẹ̀ yị ma si eyi nọ ịnị ịvị nị. 16Ịrẹka ọọhẹ kẹnẹ ụ waa kụ nị, Ijoovu. Aza ee re e ka, wẹ yị yẹ ịsị ụ waa kà.

Currently Selected:

Ijoovu 35: EBTP

Highlight

Copy

Compare