Ijoovu 30

Ijoovu aa za ịrẹyị anị ẹtẹ

1Ijoovu ka booro aanị, ezwọọmụha vị ana aa sị ọnị mẹ̀ isiya. Ezi ana ada ẹnịnị ẹ̀ yị ya irezi ọnị ọnị kụ sere atẹmẹ anị. 2Ezi ana ahịka ẹ yị nyị ịsị ẹ vị. Ẹnịnị ẹ yị zụ mẹ̀ ụkọrọ ọnyọọnyị yị ọnị. 3Aza ọnị ụya rè hé ehe hi ẹngụ ene e yi re ịsa rị, dị ahịka ẹ yaa ngụ avị ịrahụ na tụ̀ ẹpọchị ọyịwụ mẹ̀ ụngwẹ nị. 4Dị ẹ̀ ka avị ọnị ẹ ya rị, dị ẹ rẹ tọ ụwọọwọ ọnị ẹ yaa sị ka ịra. 5Aza dụ wa hụụnị ẹkụra, dị a sị owu dụ wa jịnẹ anka o rere a dụ ohi avọọ nị. 6Dị ẹ ra hi ini ụtẹha ọnịrị ụsị ene hi iruvo ịrẹta. 7Di e yee na owu anka ịkẹrịkẹtẹ ana ya aha ene noze avọọ nị. Dị ẹ hana ngụ ẹngụ hi iruvo ikizi. 8Ijoovu ka ọnụra ẹ vị nị. Ẹ yị nyị ịsa ẹ vị ini ọza. Â ra dụ wa hụụnị ẹkụra. 9Aza ẹnẹẹ e vee nyi ọnị unyi aanị nị. Ọnị ọ sị ọchị isiya ẹnịnị bẹẹ. 10Ẹnịnị ẹ nyị ịhyẹrẹ anị, dị ẹ da ẹtẹ tịtẹ yị ọnị, a vị ka ẹ va jị atẹ kụ ọnị. 11Ijoovu ka agụvị ka Ohomorihi ọ ra tụ ọnị ọkụmị, dị ẹ ya kà chire ọnị o me zee wa eyi nị. 12Ẹnịnị vị ana sị ka ọnị ụhwẹ, dị ẹ tụ ọnị echi. Dị ẹ va ịrẹpa zi ọnị ka ọnị ọ hyẹdụ. 13Ka ẹ yẹ ka ọnị ẹ yị nyị ọnọgụvọ, dị ẹ da jị ọnị ịsavọ ọnị hụra tụ ẹtẹ, dị akanya o tu ọnị. 14Ẹ vẹ ịrẹvụ anị eyivọnịvọnị, dị wuva ku ọnị ịjị ọnị sị hyẹdụ nị. 15Ijoovu ka angwa e hi ọnị booro aanị, avaba ụbanyị anị ọ ta anka ahị avọọ. Avaba ogu anị ộ ta anka ahị mẹẹ̄ kụ eguhi avọọ.

16Ọ kà ọnị e vee su aanị nọ; ụya anị vị ana banyị hu avọọ. 17Ịrahụ-ịrahụ vị ọnị avaba ẹchụkụ anị aa chị ọnị rị, dị ọnị ẹ yị nyị ụhwọtụ vụrụ-vụrụ. 18Ijoovu ka Ohomorihi sị ụvọ ngụ ọrọkọ awuru anị dị ọ sị ụkata-ụkata sima a hi ọnị ẹngụ nị. 19Dị o ne ọnị ngụ ịnị ụdọ, dị ọnị ka ẹvụvụ tụ ịzọọ nị.

20Ọnị ọ hị́ Ohomorihi ama e yi tu ọnị ohi. Ọnị ọ mẹ̀ aduwa, e yi tu ọnị ohi. 21Ijoovu ka Ohomorihi aa chamayị yị ọnị, dị ọ sị avaba ụkata anị asị sị ụya rị ọnị nị. 22Ọ kà Ohomorihi ọ navọ ọnị ka ọọ sị ọnị zịịzị, dị a sị ọnị jesi kara ẹngụ ịnị opomi ana tụ nị. 23Ọ kà ọnị ọ yẹ ka Ohomorihi aa sị ọnị na yị usu ịzị avaba ọza vaa nọ. 24Ịzẹyịza, ẹ yị nyị ọza anaā va eyi ịrazị ka onuruwa ụmẹ ọnị ẹ yaa sụ ùnè ịsa. 25Ọnị o jị òrèrè beri onosiye nịnịị ọnịrị aza anaa rị ụya. 26Ọyịza ọnị ee zi eyi nị, dị ahịka odivi ọ vaa vẹ nị. Etohweyi ọnị ee zi nị ama dị ahịka etohozi ọ vaa vẹ nị. 27Ijoovu ka ayịhụrịnẹ ọ sị ọnị mẹ sẹkẹ-sẹkẹ. Ẹkụhị ẹngụkata ọ ve ịrẹsụ anị. 28Ọnịrị ayodu aa jịnẹ zị nị; ọnị ọ jẹẹ ịnị orere dị ọnị aa da ịpẹ nị. 29Ama dị ahịka eyi ọta avoko ọnịrị ọgọdọbẹ aza ee si re ọnị nị. 30Ijoovu ka ụpẹngụ anị ọ ta mine. Ẹngụ anị ọ ta jịnẹ ịra yị ovanggoro. 31Avaba ahẹ amị vị ayodu ọnịrị orere kẹnẹ.

Currently Selected:

Ijoovu 30: EBTP

Highlight

Copy

Compare