Ijoovu 3

Ijoovu ộ rị angụ hi Ẹnẹyịmavara

1 # Ijer 20.14-18 Ịrẹma ẹkụhị ịhịmba ẹnẹẹ Ijoovu ha irenu dị ọ tụ ozirenu hi ẹkụhị ana sị ma a nị.

Ijoovu

2Ọ kà, 3Asị o zoza yị ịrahụ ọnị ọnyị anị sị dọ ịrẹẹ anị ọnịrị ẹkụhị anaa sị ma ọnị. 4Ẹkụhị ọnọọ ọ vara etohozi. Asị Ohomorihi za a ịrịka vaka ẹkụhị ana vọ. Etohozi ọ za a rị. 5Etohozi ruma-ruma ọnịrị eguhi o vu ọ hi ẹngụ. Ịhị ọnọọ o chire ọza angwa. 6A sị ịrahụ ọnọọ hụụnị ụmẹ ene hi ịnị ịrayị. Asị a vana za ịrịka beri ẹkụhị ene hi ịnị ụhwẹ ịnị ịrayị. 7Ịrahụ ọnọọ o tụ osusu. Asị a nyị ọza ene re ayohine ịhị ọnọọ. 8Ọmahọ̀nọ nịnị ẹ sị ọchị ịsẹ tụ ozirenu hi ẹkụhị ọnọọ. 9Asị ụhwẹ àzị̀ umeyọnị ịrahụ ọnọọ za ẹtẹ. Asị o tụra eyi ẹtohweyi eyi, 10agụvị ka e yi ụvọ gu ọnyị anị ịhị ozi ka asị a ma ọnị va tụ ịnị ẹhẹ akanya.

11Aa yẹ ọnị ọ yaanị su tu ọnyị anị ịnẹ, a vị á mẹ ma ọnị kẹnẹ. 12Sị ẹ vẹ dị ọnyị anị zẹ ka ọnị ọ yara da? Sị ẹ vẹ dị ọ hyakụ ka ọnị ịrẹva kẹ? 13Ọnị ọ̀ọ yaanị su a mẹ ma ọnị kẹnẹ, ọ yaanị sị rọ ọnị ẹngụ booro aanị. Ọnị yaanị aa tụ́ ụhwọ́ ini eku aanị. 14Ọnị yaanị ne ree tu ohinọyị nịnị, ọnịrị anajuwe ẹkụra nịnị ẹnị irehi ẹnịnị sị vara eburu aanị. 15Aza ana vịdị vi opisa ene gu igooru ọnịrị isiriva gwaa-gwaa hi ini eehi ẹnịnị. 16Ijoovu ka sị ẹ vẹ dị ọza e yi ne ọnị anka ozi ene su tụ ọnyị anị, ene è yi re ẹhẹ vụrụ-vụrụ avọọ? 17Usu ọ vị ẹhị ebira odivi aza edivi nị. Usu ọ rẹ ụhwọtụ yị aza ọnị ọ sị ngwẹngụ nị. 18Anịnẹngwa ene su ẹẹ nyị ẹngwọọrọ, ẹnịnị ẹ yị kụkụ wụ́ owu ọga anịnẹngwa. 19Usu anaā sịị opisa ọnị ọọ̄ sị ọnụzọngwa nị. Usu ọọ̄ dọ ọrịhị ha hụụnị ụvọ ọga anị nị.

20Ijoovu ka sị ẹ vẹ dị Ohomorihi navọ ọnị tụ ịnị ẹhẹ ụyụya dị ẹ yị dọ ọnị ụhwẹ? 21#Ẹtẹ 9.6Ọnị o si usu hụụnị ọza ene e si ẹkẹhị ọnị e yi re. 22Ẹ yị nyị ịsị nẹngụ hine ọnị ayị hụụnị ka ọnị o su. 23Sị ẹ vẹ dị Ohomorihi navọ ọnị tụ ẹhẹ ẹnẹ ẹ yị nyị ịrẹma, dị ahịka ayodu kẹnẹ ọnị ee re nị. 24Ijoovu ka ọnịrị orere ọ vị pooro nị, ọnị ẹ yị zụ rị ịsa. 25Ịsa ọnị ee hí angwa anị ọ ngụ tu ọnị aanị nị. 26Ọnị ẹ yị nyị ẹngwọọrọ, ọnị ẹ yị nyị ayọnẹtẹ. Ọnịrị akanya-akanya pooro kẹnẹ yọ nị.

Currently Selected:

Ijoovu 3: EBTP

Highlight

Copy

Compare