Ijoovu 18

Ịrẹyị Ibiridadi ọhụva

1Ibiridadi ana vị Anisuhi ộ tụ Ijoovu ohi ka, 2ịzị ọ vaa maanị kụ́ ịrẹka naa tu? Ọ jẹẹ, ọ sị ụtọ pe ẹtẹ, dị ẹnị ẹ kà ịrẹyị yọ. 3Sị ẹ vị di e ro ka ẹyịrị imaaru ọ nyị ịrẹyọyẹ ọnyọọnya nị? Sị ẹ vẹ di a sị eyi ọnụra re ẹnị? 4Ẹngụ anị kẹnẹ aa sị ọyịha tọ ụnava nị. Aza wáá vaa hụvị agụvị ọyịkụ awụ hụụnị ẹhẹ nị? Vị́ Ohomorihi wáá vaa hụvị agụvị awụ kụ ataba nịnị hụrị udi ẹnịnị nị? 5#Ijov 21.17Éyiye de, ịsa odivi ọ vaa za ẹhẹ aza edivi ẹtẹ nị. Vị́ ọ́ vaa sịị mẹẹ ịra enee mi avọọ nị. 6Ẹhẹ aza edivi vaa sịị mẹẹ anka ịra ene mi ini eehi avọọ nị. Ọ́ rẹ sị mẹẹ ozotupa ana si gẹ ene mi avọọ nị. 7Ahụ ọnị aza edivi ee hu gaa-gaa vaa tụ ọkụmị. Ajuwe ẹngụ ẹnịnị ọ́ vaa gụ wa hyẹdụ nị. 8Ẹnị ụvọta ẹ va jị ahụ ngụ ịrẹpa dị ọ za wa nị. Ẹnị e vee nye ahụ ngụ usi ana a chị nị. 9Ịrẹpa ọ sị wa za ịnị ibezi ahụ. Ịrẹpa ọ sị wa za. 10Á raa sị obo jị oze zi wa, ẹnịnị ẹ́ yị yẹ. Á sị ịrẹpa va tụ oze anaā zị.

11Ịsị ẹẹ kụ ayịhụrịnẹẹ tu ọza vị anaā kara ọza ọhịmị okiri-okiri; ịzị ee hu ahụ zị kẹnẹ, vị ẹnẹẹ̄ dị waa zị. 12Ọza ọhịmị ộ vịdị nyị ogu da, ama ụngwẹ kụkụ aa kụ ọ booro aanị. Ẹ yị zụ mẹ ka ẹ yị rị ụya. 13Ụkụ anaā wụ̀ ọza ộ gara ku ọ ẹngụ, dị ọ mẹ ka ụvọ anị ọnịrị ahụ ẹ̀ vụ̀ nị. 14Iswọọza ộ sị wa hụụnị eehi ẹnẹ ẹ ra dị e ro ka ẹ yị nyị ịsị ẹ zụ mẹ ẹnị anka aza mẹẹ̄ sị oku naa tụ ịnị ụsị avọọ. 15Èe reè che ohuru sẹ irehi anị, dị à sị kụ ịdọtị hụụnị anị nị, ọza ẹnẹsa ọ zụ na ra ịnị anị booro aanị. 16Ẹ̀pa ẹnịnị ọnịrị avọ́ vị ana vaa wụ̀. 17Ịzị ẹ ngụrẹyị na za ini eehi ọnịrị ẹhẹ ộ ta. Ọza ẹ yị ma vana tamayị ẹnịnị paa. 18Vị́ a vaa dụ wa hụụnị ẹhẹ ọnọnị, dị a dụ wa hụụnị ẹtohweyi na và hi ịnị ịrahụ nị. 19Ẹnịnị ẹ yị nyị ezi à vị aazị tụ ịpa anda ẹnịnị, ẹ yị nyị ọza ana vọ tụ ịzị ọ vịdị ra. 20Hụrẹ eyi ọnị ọyịị̄ zịị vẹ na ngụ eyi ọnị ọọ̄ zị naa ngụ ẹtẹ, avaba aza ana wụ ịsị ẹ mẹ tù wa, vị ọnị ọ za zizi, di o hi wa irenu ẹtẹẹtẹrẹ. 21Ịzẹyịza, aanị ọ mẹẹ̄ yàa yị aza ọhịmị nị. Aanị ọ mẹẹ̄ yàa yị aza ẹnẹ ẹ̀ yị hị́ ịrẹyị Ohomorihi ịrẹyị nị.

Currently Selected:

Ijoovu 18: EBTP

Highlight

Copy

Compare