Ijoovu 16

Ijoovu

Ijoovu ka ọnị ẹ yị rị ịvị 1Ijoovu ọ tụ Erihwazi ohi dị ọ ka: 2ọnị ọ vịdị raa wụ ẹngụ ịrẹyị ọnị ọ ka aanị. Ẹ yị nyị ịrẹyị ẹnịnị ana sị ayị anị nẹtẹ vụrụ-vụrụ. 3Sị ẹ maanị aa sị ọ kụ ịrẹka dị ẹ yị jị oboruhu? 4Ijoovu ka ọnị ọ̀ọ ya udi anị ọnị ọ rẹ zụ tụ ọ ohuvọ. 5Ama àa vị ọnị yọ nị, ọnị aa tụ ọ ọtụtụrụma dị ọnị ka ịrẹyị ana vaa sị ayị nẹtẹ.

6Ọ kà ọnị ọ̀ọ kụ ịrẹka ọnị ọ yị kụ ịrẹka, ịsa anaa zị ọnị vana yị chị ọnị rị. 7Ijoovu ka Ohomorihi ộ sị ọnị mẹ sẹkẹ-sẹkẹ, di o re vu ovwoovu anị ẹtẹ nị. 8Ọnịvị anị Ohomorihi vị nị, ọ raa jị ọnị ẹngwa, dị ọnị kwọrọ na za agịga nị. Ọsọnị ọ mẹ ka aza ẹẹ kà a ka ọnị ọ rị ịvị nị.

9Ohomorihi vi ana sị eyi ayamụkụ re ọnị. Ộ sị ọyịkụ-ọyịkụ gara ọnị chẹkẹ va ha nị. 10Aza vị anaa sị ọnị mẹ enyinyi. Dị ẹ ọkọnị aza ana kara ọnị aa nya ọnị arịhwọtọ nị. 11Ohomorihi ọ raa sị ọnị chire aza edivi ụvọ. 12Ọnị aa ra ẹhẹ ẹngụ anị ẹngwọọrọ-ẹngwọọrọ, dị Ohomorihi sị ụvọ hi ọnị ọrọkọ, dị ọ mẹ̀ ọnị ẹsẹvẹsẹvẹ nị. Dị ee be ọnị nị. 13Di e ne ọpa hi ọnị eyi ẹnyị eyi ọsa nị, dị ọpa ẹnẹẹ ha a ịnẹ, dị ọ tọ ọ ụnava ịnị akaha nị. Ohomorihi ẹ yị hyakụ vayị anị. 14Ệ yị za ụvọ jẹẹ vụrụ-vụrụ ọ maa tọ ọnị ụnava. Di ọ kụ chire ọnị anka isoja avọọ nị.

15Ijoovu ka ọnị ọ zị ẹngụ, dị ọnị chire awuru anaa sị zị ẹngụ, dị ọnị yaatẹ tụ ịnị edudu nị. 16Ọnị ọ jị òrèrè pooro dị eyi anị ee vi, di eyi anị wu guugu nị. 17Ama ọnị ẹ yị mẹ̀ ebira odivi ọnyọọnyị. Ayị ọnyara ọnị a sị mẹ̀ aduwa hi Ohomorihi.

18Ijoovu ka ọnị ọ daka su, asị ẹtẹ sị irenu ku oku odivi anaa mẹ̀ ọnị. 19#Ijov 19.25Ohomorihi ana ya ẹbẹẹba ene sere ọnị ọ vị onivenu anị nị. 20Ọnị aa jị òrèrè hi Ohomorihi ẹngụ agụvị ọta anị nịnị anaa sị ọnị mẹ̀ isiya. 21Ijoovu ka ọnị e si ọza ana dụ ụyụvọ anị ịda Ohomorihi anka ọta avọọ. 22Ịrayị ẹhẹ anị ẹyị nyị ọ ya, dị ọnị o su dị ọ ta.

Currently Selected:

Ijoovu 16: EBTP

Highlight

Copy

Compare