Ijoovu 14

Ijoovu aa yịị kà ịrẹyị naa

1Ẹhẹ ọnị ọza vẹ ẹ yị nyị ọ ya, dị ọ rẹ vị ọnịrị akanya-akanya kẹnẹ nị. 2Ẹhẹ ẹyị ọza sị mẹ anka ododo ene e yi me ku di o su avọọ nị. Ọ ya viiri anka ụ̀mọ̀mọ́ ọza avọọ nị. 3Ẹngụ ọza ọnọnị ọ́ọ́ rụra hị́ ịrẹyị anị ịrẹyị, dị Ohomorihi ọ hyakụ hị́ vẹ ịnị ọkarẹyị? 4Ẹnẹ zụ sị ịsa ana nị hụụnị ẹvụvụ? Ẹ yị nyị. 5Avaba ẹkụhị ẹhẹ ọza vị ọnị Ohomorihi mẹ eto anị tịtẹ. Ọ yẹ ụhwẹ anị ya. Ịhị ẹkụhị ọọ gụ ẹ yị nyị ka ọ vara. 6Avọọ Ohomorihi ọ navọ aza dị ẹ̀ hine ayị ịnị ụkọrọ ọnị ẹ ya ka ẹhị mi pooro kẹnẹ.

7A zụ tụra ugugu ọchị ana ma eyi. Ẹyịyara ọ zụ varẹma vaa hara kwẹẹtẹ. 8Ẹpa anị ọ̀ọ daka bo, dị ugugu anị su nị, 9enyi o tu ọ ẹngụ aa ha anka avị ohwoohu avọọ nị. 10Ama ọza òọ su, anị ọ ta hụụnị ẹhẹ. Ịzị aza ene su vana daka hi? 11Usu ọ̀ọ sị ọza ọ mā ha kwẹẹtẹ anka enyi ini irehu ana wụ dị ẹ yị kụkụ sì avọọ nị. 12Avọọ ọza ene su ọ yị mẹ vaa ha kwẹẹtẹ pooro dị ẹhẹ kara ụpa nị. Ọ yị ma vana ha hụụnị ara anị.

13Ijoovu ka aa yẹ Ohomorihi ọ sị ọnị na tẹ̀ ịdaneku, ịjị ayị anị ọ sị nẹtẹ, dị ọ vaa tamayị anị. 14Aza òo su ọ́ọ́ vaa ịrẹma vẹ ịnị ẹhẹ? Aa vị avọọ yọ nị, ọnị aa jẹẹ zi ụmẹ ozoza ọnị akanya vaa sị ta. 15Ịjọnọọ Ohomorihi vaa hị́ ọnị dị ọnị tụ ọ ohi. Ụmẹ ọnọọ ayị anị vee hine tu ọnị ọnị sị ụvọta anị mẹ. 16Dị ọ sị eyi hụụnị ịvị ọnị ọnị mẹ̀, dị ọ sị eyi pe avaba ahụ ọnị ọnị ee hụ. 17Ohomorihi rẹ vaa jị eyi vee hụụnị ịnị avaba ebira odivi ọnị ọnị mẹ. Dị ọ nyịna wa kwooze saka-saka.

18Ama ịnị ẹhẹ, ataba nịnị vee zina, dị ịda zina hụrẹ udi ẹnịnị, 19dị enyi chị ịdị, dị orihi ọbanyị nyịna ezi na va ha. Dị Ohomorihi du avaba ịsa ọnị ẹyị ọza tụra eyi. 20Ka Ohomorihi o huuna ẹyị ọza, dị ọ vara ọza eyi dị ọ sị ọ nọ iroo dị anị ta saka-saka. 21Ọza ọnị anị ta ọ́ mā yẹ ịsị enee tu ezi anị, ọ̀ọ vị ụga a vị ụhị. 22Ọyịnẹngụ ọzọza aa chị ọ rị ene ree du ọ ayị nị.

Currently Selected:

Ijoovu 14: EBTP

Highlight

Copy

Compare