Ijoovu 1

Ẹngụ ọza ọnị Ijoovu ọnịrị ovwoovu anị vị

1Â nyị ụmẹ ọnya ịnị ẹtẹ Uzi ana a nyị ọnọrụ ọnya aanị ọnị ịrẹha anị rị Ijoovu. Ọza anaā mẹ̀ ebira ana vọrọ dị ẹ̀ yị mā mẹ ịrẹyị ọhịmị ọ vị nị, ka oo hí angwa Ohomorihi ẹ̀ yị mẹ̀ ebira odivi. 2Ezi anị vị ẹẹwụ, ịhịmba vị anọrụ dị ẹẹta ana vọ vị anẹẹ nị. 3Ô nyị atẹmẹ akawụ-akawụ oze ẹẹta tụra akahị, dị ịnyaakụmị anị vị akawụ rị akahị, dị ụnọ vị ẹvarẹwụ, dị ịkẹrịkẹtẹ anị ẹnị rẹ vị ẹvarẹwụ nị. Avọọ ezi ahụ anị mẹ gụ duu kẹnẹ nị. Opisa ọbanyị ọnị eyi yẹ tụ ịnị ẹtẹ ọnọọ ọ vị nị. 4Ezi anị anọrụ vị anaā vabẹ na ịda ẹngụ na jẹrị ẹngụ twẹngụ-twẹngụ. Ụmẹ ọnị ẹ̀ẹ vavọọ aa rị ịsa ịda ẹngụ, dị ẹ sị ezi anẹẹ ẹnịnị beri ẹngụ. 5Ịhị ẹnịnị ẹ̀ sị mẹ ta, dị Ijoovu kwẹẹtẹ ẹnẹnẹ eyinẹhẹ anị dị ọ mẹ̀ ịsọvọ ịrẹsụ ọzịnya-ọzịnya ẹnịnị. Ọ kà ọza ọ yị yẹ ẹnịnị ẹẹ mẹ̀ ebira ana zụ du Ẹnẹyịmavara ayị.

Echu ô du Ijoovu

6 # Oyn 6.2 Â nyị ẹkụhị ọnya aanị ọnị anggẹẹrị nịnị kụ ẹngụ gụ ọvịdị Ẹnẹyịmavara, dị Echu odu ọza ọnị rẹ nọ nị. 7Ẹnẹyịmavara ộ họ̀ Echu ka ịzị ọ hụrẹ aa ve? Dị Echu ka ọnị aa va chii va hịrẹ re ẹtẹ zịịzị nị. 8Dị Ẹnẹyịmavara họ̀ ọ use ka o meme re Ijoovu kẹ? Ijoovu vị ọnịrẹyịzẹyịza ana nyị angwahi anị. Ọ yị mā mẹ̀ ebira odivi.

9 # Ẹtẹ 12.10 Dị Echu tụ ọ ohi ka, indee! Ijoovu wáá vavọọ hí angwa awụ kẹnẹ nị? 10Wee sere ọnịrị aza anị ne beri ogu ọnị ọ nyị. Dị ụ mẹ ka ẹhẹ anị oo zee yọ nị. Dị ọ ka Ẹnẹyịmavara ò re ogu ọnị Ijoovu nyị aanị. 11Ẹnẹyịmavara ọ̀ọ dọ Ijoovu avaba ogu ọnị nyị aanị, Ijoovu vị anaa ya eyi anị ka ọhịmị anị. 12Dị Ẹnẹyịmavara kà ooho! Echu ọ na mẹ ogu Ijoovu o me zee eyi, ama asị ọ sị ụvọ kanyị ọ. Dị Echu hụrị ịzọọ aa na nị.

Echu ô du Ijoovu ẹhẹ ha

13Ẹkụhị ọnya dị ezi Ijoovu kụ ẹngụ gụ aa rị ịsa ịdị ẹnẹbẹnị ẹnịnị nị. 14Ẹ yị nyịnyịnyị dị ọnya ịnị ọnụtụ Ijoovu vẹ tu ọ dị ọ ka, ẹnị maa sị ụnọ anị kụ́ ịrụkụ dị ịkẹrịkẹtẹ anị ẹnị aa rị avị, 15anako nịnị hụrị ẹkụra Isabi ngụ tu ẹnị nị. Ẹnịnị ẹ ra wụ anụkọrọ ene hi ịzọọ dị ẹ kụ avaba ịsụpa anị nị. Ọnị ịnya kẹnẹ ọ ha ka ọnị ọ va ka enube yị ọ nị. 16Ịrẹyị anị ọ yị ta a ka, dị ozi ahụ anị ọsa sị enube vẹ ka yị ọ nị. Ọ kà Ohomorihi ộ tụ ịra hụrẹ ẹbẹẹba va wụ̀ avaba atẹmẹ anị ọnịrị ezi ahụ anị ene hi ịzọọ. Ọnị ịnya kẹnẹ ọ ha ka ọnị ọ va ka enube yị ọ nị. 17Ịrẹyị anị ọ yị ta a ka, dị ozi ahụ anị ọhụta sị enube ọsa vẹ tu ọ nị. Dị ọ ka Anako irenu oze ẹẹta ệ hụrị ẹkụra Ikaridi va wụ ezi ahụ anị dị ẹ kụ ịnyaakụmị anị. Ọnị ịnya kẹnẹ ọ ha ka ọnị ọ va ka enube yị ọ nị. 18Ịrẹyị anị ọ yị ta a ka, dị ozi ahụ anị ọhụna ọnị rẹ sị enube ọsa vẹ tu ọ nị. Ọ kà ezi anị vị ene hi ịdị ẹnẹbẹnị ẹnịnị aa jẹrị ẹngụ ẹnịnị, 19dị opomi tụ́ hụrẹ ịnị ụnọmị ve ziizi avaba irehi. Dị ịrẹha ne va ku ẹtẹ dị wụ̀ avaba ezi anị nị. Ọnị ịnya kẹnẹ ọ ha ka ọnị ọ va ka enube yị ọ nị. 20Dị Ijoovu kwẹẹtẹ ịnị ayodu dị ọ ha awuru anị hi ẹngụ, dị ọ kụ ịrẹsụ anị, dị ọ vaku ẹtẹ aa hẹkẹ Ohomorihi nị. 21Dị Ijoovu ka, ahwaahụ a ma ọnị nị. Ahwaahụ ọnị rẹ sị su nị. Ẹnẹyịmavara ana sị ịsa ẹnẹnị yị ọnị, ọ rẹ sị ịsa anị nị. Ọnị ọ kụ ọ avọ 22Ịnị avaba ene tu Ijoovu aanị, ọ yị rẹ vaa ka ọhịmị Ohomorihi dị ọ va rị ịvị.

Currently Selected:

Ijoovu 1: EBTP

Highlight

Copy

Compare