Ijeremaya 50
50
Ẹkụra ana aā hị́ Ịbabịrọnị.
1 #
Ayị 13.1—14.23; 47.1-15 Ijeremaya ka, ịrẹyị ọnị Ẹnẹyịmavara kà yị ọnị ịnị ịpa ẹkụra ana aā hị́ Ịbabịrọnị ọnịrị Anẹkụra ọnọọ yị. 2Ọ kà, ọnị ọ̀ na ka enube ọnọnị yị ẹkụra-ẹkụra, ọnị ọ̀ nọ̀ọ enube ọnọnị o. Ọ kà ọnị ọ̀ sị asịyẹ jẹẹ dị ọnị ọ̀ nọ̀ọ enube ọnọnị. Asị ọnị sị tẹ̀ vụrụ-vụrụ. Ịbabịrọnị ọ sị sẹ ẹdụ ọ! Asị ori ẹnịnị ana aā hị́ Imaduki gara ha. Asị ụhị mẹ nyị ori Anibabironi nịnị. Asị ịsị ẹnẹ ẹ́ bẹ vene ịsị irenyi-irenyi hi ẹtẹ chaka va ha. 3Ẹkụra ọnyara ọ́ raa kụ́ ịrẹkụ hụrị eyi ẹbẹẹba e vee tu Ịbabịrọnị. Ọ vaa tụ ọ osusu. Aza ẹnịrị ịsụpa vee zwèe hụ ịzọọ. Ẹ́ ma vana nyị ọza ana vaa ra ịzọọ. 4Ẹnẹyịmavara kà, ịjị ụmẹ ọnọọ oo tu, Anisirẹrị nịnị ẹnịrị Anijuda nịnị vaa jị òrèrè, dị eyee sì ọnị, Ohomorihi ẹnịnị. 5Ẹnịnị vee họ̀ use ka ịzị ẹ vị oze, dị ẹnịnị và tụra a. Ẹnịnị vaa vẹ vee wo oto yị ọnị, ka ọnị ẹnị vanaa saasa pooro zịna-zịna nị. Ẹnịnị ẹ́ yị vee hi ayị oto ọnọọ paa. 6Ẹnẹyịmavara kà aza anị vị ana sị mẹẹ anka atẹmẹ ọnị oseratẹmẹ ẹnịnị navọ ka è vu hi ịnị ataba avọọ. Ẹnịnị aa ngwọ zịịzị hụrị ataba ẹnyị naa ngụ ịnị ọsa. Ẹnịnị ẹ yị kụkụ yẹ ịzị ẹ vị eehi ẹnịnị. 7Avaba aza ene ré wa vị ana kwẹẹtẹ tu wa. Ọnịvị ẹnịnị ka, ịsa tụra ịsa ọnị ẹnị ẹẹ mẹ wa booro aanị, ẹnị ẹ́ yị rị ịvị, agụvị ka Anisirẹrị nịnị ẹ mẹ̀ ebira odivi hi Ẹnẹyịmavara nị. Ẹnẹyịmavara ọnọnị ọọ̄ sị ẹngwọọrọ yị wa nị. Ọnị ohiku Anisirẹrị vịdị sị ayị tụra nị. 8#Ẹtẹ 18.4Ẹnẹyịmavara kà, ẹwụ nịnị Anisirẹrị, zwè hụrị Ịbabịrọnị nịnị. Zwè hụrị ẹkụra ọnọọ nịnị. Vị ọnịpaapa anaa hụụ ịzọọ nịnị o. 9Ọ kà ọnị vaa na tụ ẹkụra-ẹkụra ana nyị ụkata hị́ eyi ẹbẹẹba ịrẹyị ka, ẹ̀ kụ́ ịrẹkụ ve tu Ịbabịrọnị. Ẹnịnị vee tò o tụra ẹngụ, dị ẹ kụ́ ịrẹkụ ve tu ọ. Eyi ẹbẹẹba a vaa hụrẹẹ vẹ vaa za wa nị, ọpa ẹnịnị vị ene vee ne anka aza ana yara kụ ịrẹkụ ẹtẹẹtẹrẹ, ẹnẹ ẹ yị ma jị avosusu varẹma nọ eehi avọọ. 10Ẹnẹyịmavara kà avọọ á mẹ vaa kụ́ Anibabironi nịnị ẹnya, dị ẹnya hụ aza ana va kụ wa ẹnya nị. 11Ọ kà, ẹwụ nịnị Anibabironi, waa na kụ aza anị ẹnya nịnị. Waa jẹ dị wee hine ayị nịnị nị. Waa ngwọọ zịịzị nịnị anka ụnọ ana aa sịị chị́ apaapa avọọ, dị wee nowu nịnị anka umaata avọọ nị, 12ama ẹkụra awụ nịnị ana maanị banyị aanị vị ana a vaa mẹ ụhịị nyị, dị ụhị nyị ọ ẹtẹẹtẹrẹ. Ịbabịrọnị ọ vanaa tụ ọkụmịị hu kere-kere ịnị avaba ẹkụra nị. Vị́ ọ́ vanaa vara ẹtẹ ẹnẹẹ yị nyị enyi dị ọ́ vị ọ̀yị wụ nị. 13Ẹnẹyịmavara kà, agụvị ayị anaa kụ ọnị, ọza ẹ́ yị ma vanaa rá Ịbabịrọnị. Vị́ á vaa jị ọ eburuu tịtẹ nị. Avaba aza anaa zị avọọ vị ọnị ọ́ vaa zaa zizi, dị o hi wa irenu. 14Ọ kà, ẹwụ nịnị ana kụ́ ọkịta ọ tenyi ẹngụ ịrẹkụ, di wa tara kara Ịbabịrọnị nịnị. We ne avaba ọpa awụ nịnịị hi Ịbabịrọnị nịnị, agụvị ka ẹnịnị ẹ sị ebira odivi mẹ hi ọnị Ẹnẹyịmavara. 15We nowu ịrẹkụụ kara Ịbabịrọnị nịnị. Ịbabịrọnị ọ sị dọ booro aanị. Asị ọvọ anị gara ha saka-saka. Ẹnẹyịmavara kà vị ọnị aa họ̀ oponu ịrẹsụ Anibabironi nịnị aanị nị. Agụvị avọọ ẹwụ nịnị ọnịvị ẹnịnị, waa họ̀ oponu ịrẹsụ ẹnịnị nịnị, dụ wa mẹ wa anka ẹnị mẹ rẹ vịdị aza ana vọ. 16Asị ụ kụkụ zẹẹ ka è chire ịsa tụ ẹkụra ọnọọ nịnị, dị asị ụ kụkụ zẹẹ ka à kụ ịsa ọyịna gụ ịzọọ nịnị. Avaba azọga ene hi ịzọọ vee hí angwa ọkụrẹkụ enee pe wa kụ̀ ịrẹkụ, dị ẹnịnị varẹma aa nọ eehi ẹnịnị. 17Ẹnẹyịmavara kà Anisirẹrị nịnị vị ana sị mẹẹ anka atẹmẹ ọnị idu nịnị dụ, dị ẹ gara hi ozi avọọ. Ịpaapa, ohinọyị Asiriya ọ vịdị kwẹẹtẹ tu wa nị, dị Inebukadineza, ohinọyị Ịbabịrọnị ọnị kụkụ va sị anyị ngụ wa na za ẹchụkụ nị. 18Avọọ, Ẹnẹyịmavara Ochẹtẹẹngụ ka, ọnị Ohomorihi Anisirẹrị nịnị vaa sị ụyaa rị Inebukadineza ọnịrị ẹkụra anị, anka ọnị mẹ sị ụya rị ohinọyị Asiriya. 19Ẹnẹyịmavara kà, ọnị vanaa kụ Anisirẹrị nịnị vaavẹ ịnị ẹtẹ ẹnịnị. Ẹnịnị vaa kụ́ ịsọyịrị tụ ịrẹsụ ataba Ịkamẹrị ọnịrị ịnị ẹtẹ Ịbasanị, dị ẹyaa rị ọ. Ẹnịnị vee re avaba ịsị eyee sì ịrẹsụ ataba Ehwireemi ọnịrị hụrị ẹtẹ Anigiriyadi. 20Ọ kà ịjị ụmẹ ọnọọ oo tu, ọza é yi me vene re ebira odivi ọnyọọnyị ịnị ẹtẹ Isirẹrị ọnịrị ẹtẹ Ijuda, agụvị ka ọnị vagu ebira odivi avaba aza ọnị ọnị navọ tịtẹ. 21Ẹnẹyịmavara kà, ẹwụ nịnị ẹkụra-ẹkụra ọ̀ kwẹẹtẹ tụ Animeratayimi nịnị ẹnịrị Anipekodi nịnị. Wụ wa, di u we vú wa ẹtẹ nịnị. Ọ kà, wa mẹ avaba ịsị ọnị kà yị wụ nịnị o. 22Ọ kà, ọnị ộ wụ́ owu ịrẹkụ ẹkụra ọnọọ. Ọnị ộ wụ a mee nowu agụvị ka ee du ịsa a ha ẹtẹẹtẹrẹ ịzọọ. 23Ịbabịrọnị vị ana sị mẹẹ ịhama ana a sị gara avaba ẹhẹ ha rugurugu, booro aanị a rẹ sị ọnị gara ha. Ịsị e tu ẹkụra ọnọọ ộ zizi avaba ẹkụra-ẹkụra nịnị. 24Ẹnẹyịmavara kà, ẹwụ nịnị Anibabironi, ịrẹpa ọnị ọnị và ee zi wu nịnị, o sị wụ nịnị za dị ụ va yẹ nịnị. Ê re wu nịnị, asị ụ nịnị za, agụvị ka waa kụ̀ hịrẹ ọnị nịnị. 25Ọ kà ọnị ọ raa na oze ịzị ọnị kụ ẹnya ịrẹkụ anị hi. Ayị maa kụ ọnị, ọnị ọ raa kụ ẹnya ịrẹkụ anị hi ẹhẹ, agụvị ka ọnị Ẹnẹyịmavara Ochẹtẹẹngụ Ochẹtẹngụ, ọnị ọọ nyị ụkọrọ ọnị ọnị ee sì ka ọnị ọ̀ mẹ ẹtẹ Ịbabịrọnị. 26Ọ kà wa zị oze ụvọnị-ụvọnị kwẹẹtẹ tu ọ nịnị. Gara oze irehi ịzị ẹ kụ ẹnya ẹnịnị tẹ hi. Gú ẹnya ẹnịnị jẹẹ, á mẹẹ gu ịsọyịrị jẹẹ avọọ, dị we du wa ha nịnị saka-saka, asị a nyị ịsị ụ vọ tịtẹ yị wa nịnị vụrụ-vụrụ. 27Wụ avaba isoja ẹnịnị và ha. Anibabironi nịnị ẹ sị da, ka ụmẹ o si tu ka ẹnịnị ẹ̀ rị ụya. 28Ijeremaya ka, wụ́ nịnị, aza ene zwè hụrị Ịbabịrọnị va tẹ, maa kà a, Ananyị yị Ohomorihi ayị mẹmẹ aa họ̀ oponu ịsị Anibabironi nịnị vịdị va mẹ ịnị Irehi anị. 29#Ẹtẹ 18.6Hị́ aza anaā sịị ọkịtaa kụ̀ ịrẹkụ ka ẹ̀ kwẹẹtẹ tu Anibabironi nịnị; Kàa ka ẹnịnị ẹ̀ ta kara wa, asị ẹ́ zẹẹ ka ọza ọnyọọnyị ò zwè. Sị wa ụta avaba ịsị ẹ vịdị mẹ. Mẹ wa anka ẹnị mẹ rẹ vịdị mẹ aza ana vọ, agụvị ka ẹnịnị ệ sị ẹngụ tụ ẹba, dị ẹ sị eyi wụ ọnị Ẹnẹyịmavara, Ohomorihi Anisirẹrị nịnị. 30Avọọ, ọnị Ẹnẹyịmavara kà, Ezwọọmụha ẹnịnị vị ana vaa wụ̀ vàa hi ẹtẹ ịnị orere ẹnịnị, dị ee vu avaba isoja ẹnịnị ẹtẹ ịhị ọnọọ. 31Ọ kà, ẹwụ nịnị Anibabironi, wa raa sị ẹngụ awụ nịnị tụ ẹba baaba, agụvị avọọ, ọnị Ẹnẹyịmavara Ochẹtẹẹngụ Ochẹtẹngụ, ọ́ raa kwẹẹtẹ tu wu nịnị. Ụmẹ ọnị o i tu ka ọnị ọ̀ sị ụya rị wụ nịnị. 32Ẹkụra awụ nịnị ana maanị aa sị ẹngụ anịị tụ ẹba aanị vaa vangga, dị ọ sẹ ẹdụ. Ẹ́ yị nyị ọza ana vaa sị ọ kwẹẹtẹ. Ọnị vaa jị ịraa dá ẹkụra-ẹkụra ene hi ịnị anị, dị ịra ọnọọ vu avaba ịsa ana kara a ẹtẹ. 33Ẹnẹyịmavara Ochẹtẹẹngụ ka, aa mẹ ẹvaya yị Anisirẹrị nịnị ọnịrị Anijuda nịnị. Aza ana za wa vị ana si eyi pe wa gegede. Ẹnịnị ẹ́ yị zẹẹ ka ẹnị ẹ̀ hụrẹ wa ụvọ. 34Ama ọza ana vaa dọ waa ha, ọọ kata Ẹnẹyịmavara Ochẹtẹẹngụ ịrẹha anị rị nị. Ọnị ụvọta vaa hụvị ịrẹyị ẹnịnịị kwẹẹtẹ, dị ọ mẹ ka avaba anẹhẹ ẹ̀ nyị ẹngwọọrọ. Ama ọ vaa kụ ẹngụkataa tu Anibabironi nịnị. 35Ẹnẹyịmavara kà, avaba Anibabironi ọnịrị aza ana ra hi Ịbabịrọnị vị ene vee súu ha. Ọdọvịdị ẹnịnị ọnịrị aza ana yẹ ịrẹyị hi ịzọọ vị ene vee súu ha. 36Ọnịsẹ nịnị enee che irechee yị wa vị ene vee súu ha. Ẹnịnị ẹẹ da vị ọnụra kẹnẹ. Isoja ẹnịnị vị ene vee súu ha. Ẹnịnị ee divi baaba chẹngụ. 37Ọ kà, è vu avaba umaata ẹnịnị ọnịrị ụkẹkẹ ịrẹkụ ẹnịnị ẹtẹ. À wụ̀ avaba isoja ọzọga ẹnẹ ẹ na kụ hụrị aha ọsa vẹ va ha, ẹnịnị ẹẹ da vị ọkụmị kẹnẹ. È du avaba ogu ẹnịnị ha beri avaba ịsa ẹnẹ ẹ sị ụkata-ụkata na kụ hụrị aha ọsa avọọ. 38Ọyị vaa jị ẹkụra ẹnịnị, dị avaba irehu ẹnịnị wụ. Ịbabịrọnị vị ẹtẹ ọnị ori edivi-edivi hi. Ori ẹnẹẹ ẹ́ sị wa tụ́ ụra. 39#Ẹtẹ 18.2Avọọ, uye ịnị avị ẹnịrị akatapooro beri inomi ana aā hi igongo (ọgọdọbẹ) ẹ vanaa ra ịnị anị nị. Ẹ́ ma vanaa nyị aza, ọza ẹ́ yị ma vana ra ịzọọ paa. 40#Oyn 19.24,25Ẹnẹyịmavara kà, Ịbabịrọnị vị ana vaa yà anka Isodọmị ọnịrị Igomora mẹ yà ụmẹ ọnị ọnị sị vu wa ẹtẹ beri ẹkụra-ẹkụra ana kara wa avọọ. Ọza ẹ́ yị ma vana ra ịzọọ. 41Ré, aza ẹẹ hụrị eyi ẹbẹẹba aa vẹ. Ẹkụra ọbanyị ọnya ọnịrị ohinọyị ọrụrụ-ọrụrụ hụrị aha ẹnẹẹnẹ ee tenyi ẹngụ ịrẹkụ. 42Ẹnịnị ẹẹ kụ ọpa ọnịrị ọha rị ụvọ. Aza edivi ẹ́ vị̀ nị, ẹnịnị ẹ́ yị ma vayị ọza vụrụ-vụrụ. Ẹnịnị ẹ̀ẹ tụra umaata ẹnịnị aa vẹ dị ụ wụ́ wa ịrẹyị nị, vị ọ sị mẹẹ anka enyi ini òkū anaa jị ayị avọọ nị. Ẹnịnị ẹ sị ẹngụ tenyi aa vẹ wụ nịnị ịrẹkụ, ẹwụ nịnị Anibabironi. 43Ịjị ohinọyị Ịbabịrọnị wụ́ ịrẹyị aza ẹnẹnị, ụvọ anị ee wusu za ẹngụ. Ẹngụkata ọọ sụ̀ ọ ẹngụ, dị ee rimanya anka ọnẹẹ anaa barẹẹ avọọ nị. 44Ẹnẹyịmavara kà ọnị vaa vẹ anka idu ana jịnẹ hụụnị iruku Ijodani aa vẹ ịzị ịsụpa yaa rị avị ohwoohu avọọ, dị ọnị vaa dụ Anibabironi nịnị hụrị ẹkụra ẹnịnị obonobono. Ịjọnọọ, ọza ọnị ọnị ọọ nyị vaa rị ohinọyị tụ ẹkụra ọnọọ. Ọ kà, ene e zụ sị juwe anị da? Ẹnẹ ka ọnị ọ zụ hị́ ọnị ịrẹkụ kẹ? Yere ohinọyị ana zụ gẹ ọnị ịrẹvụ kẹ? 45Agụvị avọọ, Ẹnẹyịmavara kà wa wụ́ nịnị ịsị ọnị ee sì ka ọnị ọ̀ mẹ Ịbabịrọnị ọnịrị aza ana ra hi ịzọọ. Ezi ẹnịnị vị ana a vaa kụụ hara ẹtẹ ne nee hu, di angwa ee hi ọzọza. 46Ịjị ụvọ oo ku Anibabironi nịnị avaba ẹhẹ vee zizi aza ee me nowu. Avaba anẹkụra ana vọ vaa wụ́ owu ẹnịnị.
Currently Selected:
Ijeremaya 50: EBTP
Highlight
Copy
Compare
Share
Want to have your highlights saved across all your devices? Sign up or sign in
Ebira First Bible © Bible Society of Nigeria, 2014.
