Ijeremaya 4
4
Aa hị́ Anisirẹrị nịnị ka è ro ịnẹ varẹma.
1Ẹnẹyịmavara kà, ẹwụ nịnị Anisirẹrị ọ và ka ọnị vẹ, ọ ka wàa mẹ ịzẹyịza hi ọnị nịnị, dị ụ va ori awụ nịnị ha nị, agụvị ka ọnị ọọ nyị ịhyẹrẹ ori. 2Dị Ijeremaya ka wàa sị ịrẹha anị hị́ eku nịnị tụ ịrẹsụ ịzẹyịza ọnịrị ịsa ana vọrọ nịnị, ọ vaa mẹ ka ò zé yị ẹkụra awụ nịnị, dị avaba aza kụkụ aa sị ọ mẹ ụbanyị. 3#Iho 10.12Ẹnẹyịmavara ộ kà a yị Anijuda ẹnịrị Anijerusarẹmị nịnị ka, ne huru ẹtẹ awụ nịnị ọnị ọza ẹ yị vana kụ ụrụkụ tụ aanị, dị asị ụ ne chire uhu awụ nịnị ọyịza-ọyịza ọnọnị va hụra ikeyi. 4Ọ kà, ẹwụ nịnị Anijuda ọnịrị Anijerusarẹmị ọ̀ hụụnị ebira odivi, dị wa sị ẹngụ awụ nịnị tụ irenyi yị ọnị nịnị, ọ ka ẹ̀ yị vị avọọ ọnị va hụ agụvị ebira odivi awụ nịnị nyị ọyịkụ hi wụ nịnị anka ịra anaa rị ọnị ọza è yi zụ mi avọọ.
Ọkarẹyị ana a vaa mẹ yị Anijuda nịnị
5Ẹnẹyịmavara kà, nọ̀ọ ẹtẹ Ijuda ọnịrị Ijerusarẹmị ka, è hú ịkakanchị ngụ avaba ẹkụra zịịzị, è na owu tụ ẹba dị ẹ̀ kà a ka, à kụ ẹngụ gụ dị aa nọ ịnị ẹkụra ana a jị ọvọ kara. 6Tana ụvọ hi oze yị ka, asị a nyị ọza ana jẹẹ, ọzọza oo zwe dị ọ na tẹ̀. Ka Ẹnẹyịmavara ọ raa kụ ẹngụkata hụrị oze eyi ẹbẹẹba aa vẹ, ọnị o ve sii vu ẹkụra ẹtẹ divi-divi. 7Ịsị ee du ẹkụra ha ọ sị jịnẹ tụ ẹhẹ aa vẹ, anka idu ana jịnẹ hụrị aha ọyị tẹ anị avọọ. Ee vee du Ijudaa ha. Avaba ẹkụra ene hi Ijuda vị ọnị vee vú ẹtẹ dị ẹ yi nyị ọza ana kụkụ ra ịnị anị. 8Avọọ, va ẹngụ hi nịnị, waa jị òrèrè dị waa ka ẹgọ nịnị, agụvị ka Ẹnẹyịmavara maa kụ ayị hi Anijuda, ẹẹ yị vaa va o. 9Ẹnẹyịmavara kà ịhị ọnọọ, ohinọyị nịnị ẹnịrị ẹnị ọdọvịdị vị ana ayị vaa hụrẹ ịnẹ. O vee hi ẹnị ohirẹsụ irehi Ohomorihi ẹnịrị ọnịsẹ nịnị eyi. 10Ijeremaya ka, dị ọnị ka, tee! Ananyị yị Ohomorihi vị ụ vene aza ẹnẹnị saka-saka nọ. Waa kà a yị wa ka ẹngwọọrọ ọ vaa vị yị wa nị, ama ẹnị a vaa sị ịrẹkụ wụ vaa ha anị nị ọ. 11Ụmẹ aa vẹ ana a vaa kà a yị Anijerusarẹmị ka aa nyị ahị ịrịịra ana tụ́ hụụnị ụnọmị aa ka wáa vẹ. Ẹ yị vị ahị ana vaa kụ ẹchịchị kwooze kẹnẹ ọ́ vaa vị. 12Ahị ọnọọ vaa nyị ụkata ẹtẹẹtẹrẹ. Ẹnẹyịmavara ọ vaa tụ ọ nị. Ẹnẹyịmavara ụvọta aa mẹ̀ ọkarẹyị yị aza anị nị. 13Ijeremaya ka, ré, ọnịvị awụ nịnị aa vẹ anka eguhi avọọ. Ụkẹkẹ ịrẹkụ anị vị ana sị mẹẹ anka okoruwa avọọ, umaata anị ẹẹ rẹ́ huni ukokoro. Ọ kà, ọ mẹ ya! Ẹnị e sị vu o! Ẹnịnị ọọ ta. 14Ẹwụ nịnị Anijerusarẹmị, hụụnị ebira odivi awụ nịnị dị wa ha. Ịzị ụ maanị vaa sị ịrẹyị odivi tụ ịnị ayị nee tu nịnị? 15Ijeremaya ka, aza ẹẹ ya ẹtẹ Ịdaanị, ịrẹsụ ataba Ehwireemi aa kà a ịrẹyị odivi ene vee tu wu nịnị. 16Ẹnẹyịmavara kà, kà a yị Anijerusarẹmị ọnịrị avaba anẹkụra ana kara wa ka ọnịvị nịnị ẹ raa kụ ịrẹkụ aa vẹ. Ẹkụra ene noze ẹ hụrẹ aa vẹ nị. Ẹẹ hụ agụvị avaba ẹtẹ Ijuda ee nowu ịrẹkụ. 17Ọ kà, ẹnịnị vaa taa kara Ijerusarẹmị anka aza enee sere aarẹ avọọ nị, agụvị ka Anijerusarẹmị nịnị ẹ raa kụ̀ hịrẹ ọnị. 18Ebira ọnị ẹwụ nịnị Anijuda aa mẹ ọ kụ ọsọnị tu wu nịnị aanị nị. Ebira odivi awụ nịnị ọ kụ ụya ọngwọọngụ ọnọnị tu wu nịnị nị. Ọ sị ụ nịnị ta ụnava na za ayị.
Ijeremaya aa jị òrèrè agụvị aza anị.
19Ijeremaya ka, aa daa zị ọnị, ọnị ẹ yị kụkụ zụ zaa. Ayị anị ọ sị vazi, di ee ji bii-bii nị. Ọnị ẹ yị zụ sị irenu anị ku oku. Ọnị ộ wụ́ ịkakanchị ịrẹkụ; ọnị ộ wụ́ owu ịrẹkụ. 20Ịrẹyị odivi ẹnyị aa mẹ vaa tụra ọsa. Asị avaba ẹkụra gara ha. Obonobono a va gara avaba ajẹngụ ọnịrị irehi ẹnịị va ha nị. 21Ọ kà, ịzị ọnị vaa maanị sị eyi re ịrẹkụ ọnọnị nee tu? Ịzị ọnị vaa maanị wụ ịkakanchị ịrẹkụ ịrẹyị naa za? 22Ẹnẹyịmavara kà, aza anị vị ọnụra; ẹnịnị ẹ yị yẹ ọnị. Ezi ẹnẹ ẹ yị nyị ịrẹyọyẹ ẹ vị nị; ịrẹyị é me ye wa. Ẹnịnị ẹẹ yẹ ọbọ ọyị mẹ̀ ebira odivi, ama ẹnịnị ẹ maa yara mẹ ọyịza.
Evu-ẹtẹ ana vẹ ọnị Ijeremaya re.
23Ijeremaya ka ọnị ô ré ẹtẹ, ẹtẹ vana tịtẹ juguu kẹnẹ, dị ọ rẹ vị osusu nị. Ọnị ô ré ẹbẹẹba, ẹ yị kụkụ nyị ẹtohweyi. 24Ọnị ô ré ataba nịnị, e yee zizi, dị ẹ yaa wọrọ ọba nị. 25Ọnị ô ré ẹtẹ, ẹ yị kụkụ nyị aza; avaba inomi ene hi ẹbẹẹba ẹ kụ hira si hu. 26Ẹnẹyịmavara maa kụ ayị, ẹtẹ ana vịdị maanị zoza, ọ kụkụ sị vara ụnọmị; avaba ẹkụra anị ẹ sị jị eburu. 27Ẹnẹyịmavara ộ vịdị sị ọ ka ka, ọnị vaa jị avaba ẹhẹ eburu, ama ọnị e yi vee vu avaba anị ẹtẹ saka-saka. 28Ọ kà, avaba anẹhẹ vaa va ẹngụụ hi, dị ẹbẹẹba hozi, agụvị ka ọnị Ẹnẹyịmavara ọ sị ịrẹyị ka, ọnị ẹ yị vaa vara a. Ịsị ọnị ka ọnị aa mẹ, ọnị ẹ yị vaa và ịnị anị. 29Ịjị ẹ̀ẹ wụ̀ isoja nịnị ịrẹka kẹnẹ, avaba aza ene hi ịnị ẹkụra vaa kụ echi. Aza ẹnyị vee zwe naa tẹ̀ ịnị iruku, dị ẹnyị aa hịrẹ ataba. Avaba ẹkụra vaa tụ osusu, dị ẹ yị kụkụ nyị ọza ịnị anị. 30Sị ụ kụkụ aa mẹ, ẹwụ ana a sị gara ha aanị? Ọvị ịsị ụ kụkụ aa mẹ, dị ụ sị ịta ovivi akàaka ọnịrị igooru kụ hi ẹngụ, dị ụ kụ ịsa sisi eyi bẹẹ? Ọvị ọọhẹ kẹnẹ ụ kụkụ aa mẹ nị. Onyeehi awụ nịnị ẹ sị ụ hụrẹ ụvọ. Ẹnịnị vị ene kuku ee si u usu. 31Ijeremaya ka ọnị ộ wụ̀ aza mee nowu anka ọnẹẹ anaa vaa ma ozi ịpaapa anị, ọnị ịrẹẹ aa zị avọọ. Anijerusarẹmị nịnị ẹ vavọọ ee nowu, ẹ maa vụrịị tụ́ ụhwẹ nị. Ẹẹ tana ụvọ, dị ẹ vaku ẹtẹ ọvịdị ọwọza nịnị nị. Ẹ ka, ẹwụ aa za ẹnị aanị nị. Ẹnị ẹ sị da!
Currently Selected:
Ijeremaya 4: EBTP
Highlight
Copy
Compare
Share
Want to have your highlights saved across all your devices? Sign up or sign in
Ebira First Bible © Bible Society of Nigeria, 2014.
