Ijeremaya 39
39
Ịrẹkụ mẹmẹ rị Ijerusarẹmị.
1Ịnị ụhwẹ ẹẹwụ ịrayị ọhụhịịna ọnị Ịzẹdẹkaya rị ohinọyị Ijuda, Inebukadineza, ohinọyị Ịbabịrọnị ọnịrị isoja anị ệ kụ́ ịrẹkụ va ngụ Ijerusarẹmị. 2Ịnị ana tụ ọ ẹkụhị ịhịịna ịnị ụhwẹ ọhụna ịrayị ẹwụrọnya ọnị Ịzẹdẹkaya rị ohinọyị, dị ẹ chaka ọvọ ana a jị kara Ijerusarẹmị nị. 3Ịjị ụvọ sị kara Anijerusarẹmị, dị avaba ezida ohinọyị Ịbabịrọnị ngụ eehi, dị ẹ́ yaatụ oze ịnị akakana ana aā zị ngụ ịnị ẹkụra nị. Aza ẹnẹnị ẹ vavọọ ngụ eehi nị: Inagari-Ịsarẹza, Ịsamịga-Inebo, Isasekimi, Inagari-Ịsarẹza ọsa beri ẹnị ọdọvịdị ịdị ohinọyị Ịbabịrọnị ana vọ. 4Ịjị Ịzẹdẹkaya ọnịrị isoja anị nịnị ré wa, dị e zwe ịrahụ nị. Ẹnịnị ê zwè zị oze ịnị ụbazị ohinọyị, dị ẹ́ na parahu zị oze ọbanyị ana kụ ọvọ ẹẹva gẹ nị. Ẹnịnị ê zwè aa nọ inoze Ijodani (ẹtẹ Araba). 5Ama dị isoja Anibabironi dụ wa, dị ẹ za Ịzẹdẹkaya ịnị orere ẹtẹ Ijeriko nị. Ẹnịnị ệ sị ọ ne tu Inebukadineza ẹkụra ana aā hị́ Iribira ịnị ẹtẹ Ihamati. Dị Inebukadineza mẹ̀ ọkarẹyị yị Ịzẹdẹkaya ịzọọ nị. 6Ẹtẹ Iribira ịzọọ, ohinọyị Ịbabịrọnị yà, dị ọ́ wụ̀ avaba ezi Ịzẹdẹkaya ẹnịrị ọdọvịdị Anijuda nịnị eyi Izedekaya nị. 7Ịrẹma ọnọọ, dị ọ ka à tụ Ịzẹdẹkaya eyi, dị à sị ẹba sụ́ ọ, dị à sị ọ aa nọ Ịbabịrọnị nị. 8Anibabironi nịnị ệ rị irehi ohinọyị Ijuda ọnịrị irehi aza ana vọ ịra, dị ẹnịnị wú ọvọ ana jị kara Ijerusarẹmị và hi ẹtẹ nị. 9Ọdịrẹma anị, â nyị ọnọrụ ana aā hị́ Inebuzaradani ana vị ohirẹsụ isoja Anibabironi. Ộ kụ aza ana vọ hí Ijerusarẹmị beri aza ene zwe ne tu ọ ne hi Ịbabịrọnị, dị ẹ vị ọrịhị tụ ịzọọ nị. 10Ộ navọ onosiye nịnị ẹnẹ ẹ̀ yị nyị ịsa vụrụ-vụrụ hi Ijerusarẹmị. Dị ọ sị ụbazị ene e chire ọchị ịvayịnị hi yị wa nị. Ộ rẹ sị ẹtẹ yị wa bẹẹ.
 hụrẹ Ijeremaya ụvọ.
11Ama ohinọyị Inebukadineza ộ mẹ̀ ọda yị Inebuzaradani ka ọ̀ kà a ka: 12È ne si Ijeremaya, dị ẹ̀ sị ụvọ ozoza za a. Ọ kà asị a mẹ̀ ẹ ịrẹyị, ama ịsị oo họ̀ use anị kẹnẹ, ọ̀ mẹẹ yị ọ. 13Ijeremaya ka, ịzẹyịza, â nyị ọdọvịdị ẹẹva ọnị udi ẹnịnị kà hịrẹ. Ịrẹha ẹnịnị ọ rị Inebusazibani ọnịrị Inegari-Ịsarẹza nị. Inebuzaradani ọnịrị wa beri avaba ẹnị ezida ohinọyị Ịbabịrọnị ana vọ, 14ệ va sị ọnị hụụnị ohweje ịdị ohinọyị. Ẹnịnị ệ sị ọnị chire Igidarịya ụvọ ka ò si eyi pe ọnị. Ẹ ka, Igidarịya ò re ka ọnị ọọ ngụ eehi ịnị ẹngwọọrọ. Ịzẹyịza, dị ọnịrị aza ana vọ yà ịzọọ nị. 15Ẹnẹyịmavara ộ kà a yị Ijeremaya a mẹ yị gu oze hi ọ tụ ịnị ẹngwa ịnị ohweje idi ohinọyị ka: 16Ọ̀ na kà a yị ọnọrụ ana aā hị́ Ebedi-Ịmẹrẹkị ana vị Anetiyopiya ka; Ẹnẹyịmavara Ochẹtẹẹngụ, Ohomorihi Anisirẹrị nịnị ka: Ré; ọnị vaa mẹ avaba ịrẹyị ọnị ọnị ka ịnị ịpa Ijerusarẹmị. Ịrẹyị ọhịmị ọ vaa vị nị, ẹ́ yị vaa vị ọyịza. Ọ kà, eyi awụ ọ vaa vị ịhị ọnọọ nị. 17Ẹnẹyịmavara kà, ama, ọnị vaa dọ ụ ha. Ọza ẹ́ yị vaa sị ụ chire aza ọnị wee hí angwa anị aanị ụvọ. 18Ka, ịzẹyịza ọnị vaa dọ ụ ha. Ịrẹkụ ẹ́ yị vaa rị ụ. Ọ kà ụ vaa ha agụvị ka waa sị ayị tụra ọnị.
Currently Selected:
Ijeremaya 39: EBTP
Highlight
Copy
Compare
Share
Want to have your highlights saved across all your devices? Sign up or sign in
Ebira First Bible © Bible Society of Nigeria, 2014.
