Ijeremaya 33
33
Ẹnẹyịmavara rẹ ka aa nyị ọyịtureyi
1Ijeremaya ka, ọnị mẹ yị yà ịnị ẹngwa ini ohweje ịdị ohinọyị, Ẹnẹyịmavara ộ rẹ kà ịrẹyị yị ọnị ụpẹ ọhụva. 2Ẹnẹyịmavara ana tụ́ ẹhẹ ọnọnị, dị ọ sị ọ hi ẹtẹ aha anị ọ́ mẹ sị ọ mẹ; ịrẹha anị ọ rị Ẹnẹyịmavara nị; ọ ka, 3wa hị́ ọnị ka ọnị vee tu u ohi, dị ọnị ka ịsị ẹbanyị-ẹbanyị ọnị ọza ẹ̀ yị yẹ́ iruvo anịị yị ụ. Ịsa ọnị wẹ yị yẹ. 4Ẹnẹyịmavara Ohomorihi Anisirẹrị nịnị ka, a vaa chaka irehi ene hi Ijerusarẹmị aanị ẹnịrị irehi ohinọyị Ijuda nịnị agụvị ịrẹkụ ana a kụ ve tu wa dị a họ̀ kara wa aanị, aza ẹnyị me vee sì ka ẹnị ẹ̀ gẹ Anibabironi nịnị ịrẹvụ. 5Anibabironi nịnị vaa wụ̀ aza vaa hi ẹtẹ vẹẹrẹ. Ẹnẹyịmavara kà aza ẹnẹẹ vị ọnị ọnị vịdị sị ọyịkụ-ọyịkụ wụ. Ọ kà ọnị vaa sị eyi kwooze yị Anijerusarẹmị agụvị ebira odivi ẹnịnị. 6Tizọ-tizọọ, Ẹnẹyịmavara kà ọnị vanaa sị Ijerusarẹmị ọnịrị aza anị ẹngụụ nịya. Ọnị vaa mẹ ka ò zee yị wa eyi ụvọnị-ụvọnị, dị ọnị ee sere wa. 7Ọ kà, ọnị varẹma vaa mẹ ize yị Anijuda ọnịrị Anisirẹrị nịnị dị ọnị kụ wa varẹma kwẹẹtẹ anka ẹ́ mẹ vịdị ya ịpaapa. 8Ẹnẹyịmavara kà ọnị vee nyee avaba ịvị ebira odivi ẹnẹ ẹ mẹ hi ọnị kwooze. Ọnị vaa vaa gu ịvị ẹnẹ ẹ rị agụvị ebira odivi ẹnẹ ẹ mẹ dị ẹ rẹ kụ̀ hịrẹ ọnịị yị wa. 9Ọ kà Ijerusarẹmị vaa vị ayohine ọnịrị ụbanyịị yị ọnị, dị ọnị aa sị waa mẹ eyi. Avaba anẹhẹ vee hí angwa, dị ẹyaa dá ẹgahị ịjị ẹnịnị ẹẹ wụ́ ịrẹyị ịsị ọyịza ọnịrị ize ọnị mẹ yị Anijerusarẹmị ẹnẹnị. 10Ẹnẹyịmavara kà, aza aa kà a ka ịzị ẹnị ọ sị tụ osusu, ẹ́ yị kụkụ nyị aza à vị ịsụpa ịnị anị vụrụ-vụrụ. Ịzẹyịza yọ nị, ẹkụra ene hi Ijuda ẹnịrị oze Ijerusarẹmị kụkụ vị osusu; ẹ́ yị nyị aza, ẹ́ yị nyị ịsụpa ịzọọ. Ama ịzị ẹnị ọnọnị ọnyọọnya ụ vanaa wụ ka, 11#1 Ịtọ 16.34; 2 Ịtọ 5.13; 7.3; Ẹzị 3.11; Ahẹ 100.5; 106.1; 107.1; 118.1; 136.1aza ee nowu ẹ mee hine ayị dị ẹyaa jẹ ịrajẹ ụ vaa wụ̀ aza maa jẹ dị ẹyaa mẹ aahẹ agụvị ka ẹ yaa nyị ẹngụ. Ụ vaa wụ̀ aza maa jị ahẹ, ẹnịnị ẹẹ sị ẹyịza a vaa kụ avọ ịnị irehi Ohomorihi; dị ẹ ka, aza ẹẹ ku Ẹnẹyịmavara Ochẹtẹẹngụ avọ agụvị ka Ẹnẹyịmavara oo zoza, vị oo sì ịrẹyị ọza pooro nị. Ẹnẹyịmavara kà ọnị vaa me ka ò zee yị ẹkụra ọnọnị anka ịyẹẹyẹ. 12Ẹnẹyịmavara Ochẹtẹẹngụ ka, ịzị ẹnaanị ana sị mẹẹ anka ẹtẹ ọyịwụ, dị ẹ̀ yị nyị aza à vị ịsụpa aanị, ọ vanaa nyị avị ohwoohu ịzị oseratẹmẹ nịnị zụ kụ atẹmẹ ẹnịnị ve hi. 13Ẹnẹyịmavara kà, oseratẹmẹ nịnị vaa yà ẹkụra ene hi ịrẹsụ ataba ọnịrị iruvo ataba dị ẹyaa za atẹmẹ ẹnịị ịrịka. E vee hi eyi ụvẹtẹ Ijuda ọnịrị okokooro Ịbẹnjamịnị dị ẹyaa za atẹmẹ ẹnịnị ịrịka. Ẹnịnị vee hi ẹkụra eweyi-eweyi ana kara Ijerusarẹmị ọnịrị ịnị ẹkụra ẹbanyị-ẹbanyị ene hi Ijuda dị ẹyaa za atẹmẹ ẹnịnị ịrịka. 14#Ijer 23.5,6Ẹnẹyịmavara kà, re, ụmẹ aa vẹ ọnị ọnị vaa mẹ avaba ịsa ọnị ọnị ka ọnị vaa mẹẹ yị Anijuda ẹnịrị Anisirẹrị nịnị aanịị yị wa. 15Ọ kà ụmẹ ọnọọ, ọnị vaa sị ozi Idevidi ọnyara ana vị ọnịzẹyịzaa rị ohinọyị. Ohinọyị vaa mẹ ịsị ana vọrọ dị ọ vị ịzẹyịza avaba aha ịnị ẹkụra. 16Ọ kà ụmẹ ọnọọ, a vaa dọ Anijuda ọnịrị Anijerusarẹmị nịnịị ha, dị ẹ kuku hi ịnị ẹngwọọrọ. Ijerusarẹmị á kụkụ vaa hị́ Ẹnẹyịmavara ọ dọ yị ha nị. 17#2 Ịsa 7.12-16; 1 Ohi 2.4; 1 Ịtọ 17.11-14Ẹnẹyịmavara kà, ezi Idevidi ẹ vaa rị ohinọyị Isirẹrị pooro nị. 18#Ịrị 3.5-10Anireevi ẹnị ẹ rẹ vaa vị ohirẹsụ irehi Ohomorihi pooro, dị ẹyaa hẹkẹ ọnị nị. Ẹnị ẹ vaa rị ịsa ịsọvọ ịra dị ẹyaa mẹ ịsọvọọ hi ọnị nị. 19Ijeremaya ka Ẹnẹyịmavara ộ kà a yị ọnị ka: 20Ọza ọ̀ọ zụ kụ ọda ọnị ọnị mẹ yị ọọdụ ọnịrị ịrahụ kwooze, ka asị ẹnịnị zụ vẹ ịnị ụmẹ ẹnịnị. 21Ịjọnọọ a vaa zụ kụ ịzẹzẹ ọnị ọnị zẹẹ yị Idevidi ozi ahụ anị kwooze dị ezi anị ẹ́ yị kụkụ rị ohinọyị nị. Ịjọnọọ á rẹ vaa zụụ kụ ịzẹzẹ ọnị ọnị zẹẹ yị Anireevi kwooze ka, asị ẹ́ kụkụ vị ohirẹsụ irehi Ohomorihi nị. 22Ẹnẹyịmavara kà, ọza ẹ̀ yị mẹ zụ zá ụzọmị ene hi ẹbẹẹba ịrịka, dị ọza ẹ̀ yi rẹ zụ ngọ ààrẹ ụtọ ókụ̄ avọọ, avọọ gẹdẹ-gẹdẹ ọnị mẹ vaa mẹ ka ezi Idevidi ọnịrị Anireevi ana vị ohirẹsụ irehi Ohomorihi ka ẹ̀ rụrụ dị ọza ẹ́ yị zụ zá wa ịrịka nị. 23Ijeremaya ka Ẹnẹyịmavara ộ kà a yị ọnị ka, 24Ọnị ọ́ọ́ si ụtọ pe ẹtẹ dị ọnị ọ wụ̀ aza maa kà a ka Ẹnẹyịmavara o re yị Anisirẹrị ọnịrị Anijuda, ovwoovu ẹyịva ọnị ọ nyị tịtẹ? Agụvị avọọ dị ẹ kụkụ aa sị eyii wụ̀ wa dị ẹnịnị sị eyi ẹkụra ọyịvụrụ rẹ wa nị. 25Ẹnẹyịmavara kà, ọnị ọ raa zẹẹ ịzẹzẹ beri ọọdụ ọnịrị ịrahụ, dị ọnị raa mẹ ọda ana avaba ịsa ene hi ẹhẹ ọnịrị ẹbẹẹba aa saasa nị. 26Avọọ gẹdẹ-gẹdẹ ọnị mẹ vaa sị ụvọ za ịzẹzẹ ọnị zẹẹ beri ezi Ijekọvụ ọnị Idevidi ana vị ozi ahụ anị nị. Ọnị vaa nyị ọnya ịnị ezi Idevidi ana vaa rị ohinọyị tụra ezi Abụrahamị, Ayiziiki ọnịrị Ijekọvụ ịrẹsụ. Ọ kà ọnị vaa vayị aza anị dị ọnị varẹma mẹ ka ò zee yị wa.
Currently Selected:
Ijeremaya 33: EBTP
Highlight
Copy
Compare
Share
Want to have your highlights saved across all your devices? Sign up or sign in
Ebira First Bible © Bible Society of Nigeria, 2014.
