Ijeremaya 19
19
Ụnọkọ ana a chaka
1Ẹnẹyịmavara ộ kà a yị Ijeremaya ka, ọ̀ na hị́ ụnọkọ ana a sị ụmọpa mẹ. Ijeremaya ka ọ́ rẹ kà a yị ọnị ka ọnị ọ̀ nyị azọkụ chee hụụnị ịnị aza anị beri ẹnị ohirẹsụ irehi Ohomorihi chee aanị. 2#2 Ohi 23.10; Ijer 7.30-32; 32.34,35Ọ kà ọnị ọ zị oze ana a zịị̄ ngụ eehi ịzị aā kụ ururaa hi, dị ọnị ọ̀ nọ inoze ẹtẹ ọnọrụ ana aā hị́ Ihinọmị. Ọnị òo tu ịzọọ dị ọnị ọ̀ ka ụtụ ọnị ọnị tụ ọnị. 3Ijeremaya ka, Ẹnẹyịmavara kà ọnị kà a yị ohinọyị Anijuda nịnị ọnịrị Anijerusarẹmị nịnị ka, ẹnịnị ẹ̀ sị ụtọ pe ịrẹyị ọnị ọnị Ẹnẹyịmavara Ochẹtẹẹngụ aa kà. Ọnị ọ̀ Ohomorihi Anisirẹrị nịnị nị. Ẹnẹyịmavara kà ọnị vaa sị ụyaa rị ẹkụra ọnọnị divi-divi, dị o hi avaba aza anaa wụ ọ irenu. 4Ọ kà ọnị vavọọ vaa mẹ agụvị ka aza ẹ raa và ịrẹma anị. Ẹ sị ẹtẹ du ẹ́ mẹ kụkụ yà ịnị anị aa mẹ ịsọvọọ yị ori nịnị. Ẹnịrị ohiku ẹnịnị beri ohinọyị Ijuda nịnị ẹ yị vịdị yẹ ori ẹnẹẹ. Aza ẹnẹ ẹ̀ yị nyị ịsị ẹ mẹ̀ vị ọnị ẹyaa wụ ịzọọ. 5#Ire 18.21Ụta-ịsọvọ vene hi yị Ịbaarị ịzị ẹ vaa yaa sị ezi ẹnịnị mẹ ịsọvọọ dị ẹ rị ọ ịra yọ. Ẹnẹyịmavara kà ọnị ẹ yị mẹ ọda yị wa ka ẹ̀ vavọọ mẹ. Ọnị e yi re rò ka ẹnịnị ẹ́ zụ vavọọ mẹ. 6Avọọ, ụmẹ aa vẹ ọnị ọza ẹ yị ma vana hị́ ịzị ẹnị Itohwẹtị à vị inozi Ihinọmị. Inozi ana a yaa wụ̀ ọza á vanaa hị́ ọ nị. 7Avaba eyi ọnị Anijuda nịnị ọnịrị Anijerusarẹmị nịnị aa gẹ vị ọnị ọnị vaa gara hi wa ụvọ ịzẹnaanị. Ọ kà, ọnị vaa navọ ka ọnịvị ẹnịnị e huna wa eyi ịrẹkụ dị ẹ wụ̀ wa ha. Oku ẹnịnị vị ọnị ọnị vaa sị mẹ̀ ịsọyịrị yị inomi ọnịrị uye ịnị avị nịnị. 8Ẹnẹyịmavara kà ọnị vee vú Ijerusarẹmị ẹtẹ divi-divi. Avaba aza anaa parahu vị ọnị ọ́ vaa zaa zizi óoo me hi wa irenu. 9Ọnịvị Anijerusarẹmị nịnị vaa tara kara Ijerusarẹmị dị e yee si oze ka ẹnị ẹ̀ wụ̀ aza ene hi ịnị anị. Ịrẹyị ọnọọ vee divi ẹtẹẹtẹrẹ dị aza ene hi ịnị ẹkụra kụkụ aa wụ ẹngụ rị. Ẹ hyakụ vaa wụ̀ ezi ẹnịnị rị bẹẹ. 10Ijeremaya ka, dị Ẹnẹyịmavara vaa kà a yị ọnị ka ọnị ọ̀ chaka ụnọkọ ọnọọ eyi aza ana saasa ọnị aanị nị. 11Ọ kà ọnị ọ̀ kà a yị wa ka, anka ụnọkọ ana a sị ụmọpa mẹ aanị mẹ gara ha dị ọza ẹ yị kụkụ zụ kụ ọ gẹ aanị, avọọ ọnị mẹ vaa gara Ijerusarẹmị ọnịrị aza ene hi ịnị anịị ha nị. Ẹtẹ Itohwẹtị aza venee ne oku ẹnịnị nị agụvị ka ẹnịnị ẹ yị me vene re aha ọsa ene e vee ne okuu tụ. 12Ẹnẹyịmavara kà ọnị vaa mẹ Ijerusarẹmị ọnịrị avaba aza ene hi ịnị anị anka Itohwẹtị avọọ nị. 13Ọ kà, ịzẹyịza avaba irehi ene hi Ijerusarẹmị beri irehi ohinọyị Ijuda nịnị vana vaa yaa anka Itohwẹtị. Avọọ avaba irehi ene e hi ịrẹsụ anịị rị eturare ịraa yị ụzọmị ẹnẹ ẹ sị mẹ ori dị ẹ yaa ka echee hi ẹtẹ yị ori ẹnịnị ịnị anị mẹ vaa yà nị. 14Dị Ijeremaya varẹma hụrị Itohwẹtị ịzị ọ́ na kà ụtụ ọnị Ẹnẹyịmavara tụ ọnị nị. Ọ kà ọnị ộ na jẹẹ ịnị ohweje irehi Ẹnẹyịmavara, dị ọnị kà a yị aza ene hi ịzọọ ka, 15Ẹnẹyịmavara Ochẹtẹẹngụ, Ohomorihi Anisirẹrị ọ́ sị ọ ka ka, ọnị vaa sị ụyaa rị Anijerusarẹmị nịnị ọnịrị avaba anẹkụra ana kara wa anka ọnị mẹ kà a, agụvị ka ẹnịnị aa mẹ ayị ọkatẹngụ, ẹnịnị ẹ yị saasa ịrẹyị anị.
Currently Selected:
Ijeremaya 19: EBTP
Highlight
Copy
Compare
Share
Want to have your highlights saved across all your devices? Sign up or sign in
Ebira First Bible © Bible Society of Nigeria, 2014.
