Ijeremaya 16
16
Ịsị Ẹnẹyịmavara si yị Ijeremaya
1Ijeremaya ka, Ẹnẹyịmavara ộ rẹ kà a yị ọnị ka, 2Asị ọnị nyị ọnẹẹ hụrị ẹngụ ẹkụra ọnọnị; asị ọnị rẹ yà ịzọọ ma ezi bẹẹ. 3Ẹnẹyịmavara kà, ọnị aa kà a yị ọnị ịsị ẹ vaa mẹ ezi ana ma ẹkụra ọnọọ ẹnịrị aza ana ma wa. 4Ọ kà, ụkụ odivi ọ vaa wụ̀ wa ha nị. Ẹ yị nyị ọza ana vaa zị ẹngụ ẹnịnị. Oku ẹnịnị vene vee hi ẹtẹ anka ịhyẹrẹ ene e kune jẹẹ avọọ. Eyi ịrẹkụ á vaa wụ̀ wa nị, ẹ̀ yi vavọọ dị ụngwẹ wụ̀ wa, dị ahịka inomi nịnị ẹnịrị uye ịnị avị nịnị ẹ rị oku ẹnịnị nị. 5Ọ kà a ka asị Ijeremaya ngụ irehi ana aza aa zị ẹngụ oku ịnị anị. Asị ọ́ hụvị ọza ọnyọọnyị du ayị. Ọ kà ọnị ẹ yị ma vana mẹ ize yị aza ka ẹ̀ nyị ẹngwọọrọ. Ọnị ẹ yị kụkụ vee sì ịrẹyị ẹnịnị avịka ọnị ọ̀ vayị ẹnẹnị. 6Ọza ọbanyị ọnịrị onuruwa ene hi ịnị ẹtẹ ọnọnị vene vee súu ha, ama ẹ́ yị nyị ọza ene vee ne wa; ẹ́ yị nyị ọza ana vaa zị ẹngụ ẹnịnị. Ẹ́ yị nyị ọza ana vaa hụvị ẹnịnị tọ ẹngụ anị ụnava avịka ẹ̀ hụvị ẹnịnị kụ ịrẹsụ ẹnịnị ka vị ẹnị ee du ayị nị. 7Ẹ́ yị vaa nyị ọza ana vaa mẹ̀ ịsa ana yị ọsa avịka a ká enyi na yị aza ọ̀yị sị wa ayị nẹtẹ ka aza ẹngụ ẹnịnị ô sú. Ọza ana ada anị avị ọnyị anị ọọ hyakụ sú, e yi vee re ọza pe e zị ẹngụ. 8Ẹnẹyịmavara kà asị Ijeremaya ngụ irehi ọnyọọnyị ịzị aza hi aa rị ịsa. Asị ọ yaatụ pe wa rị ịsa dị asị o re hú ịsọnyị-ịsọnyị ịzọọ. 9#Ijer 7.34; 25.10; Ẹtẹ 18.23Ẹnẹyịmavara Ochẹtẹẹngụ ka Ijeremaya ọ̀ wụ ịsị ọnị Ohomorihi Anisirẹrị nịnị aa kà. Eyi awụ-eyi awụ, ọnị vaa mẹ̀ ẹ dị aza ẹ́ ma vana wụ́ aahẹ ka aza aa jẹ ịrajẹ ọnịrị ka eyee hine ayị. Ẹ́ ma vana nyị ka vị aza aa nyị ẹngụ anka ẹvarose dị ẹ yaa mẹ aahẹ nị. 10Ọ kà Ijeremaya ọ̀ọ maanị kà avaba ịrẹyị ọnọnị yị wa, ẹnịnị vaa họ̀ use ka sị ẹ vẹ dị ọnị ka ọnị maanị aa sị ụyaa ọngwọọngụụ rị ẹnị aanị? Ẹnịnị vaa họ̀ ka sị ẹ vị ebira odivi ẹnẹ ẹnị rị ịvị anị kẹ? Sị ẹ vị ebira odivi ẹnẹ ẹnị mẹ hi Ẹnẹyịmavara Ohomorihi ẹnịnị? 11Ịjọnọọ dị Ijeremaya ọ̀ kà a yị wa ka, Ẹnẹyịmavara kà, ohiku ẹnịnị ệ va ịrẹma anị naa hẹkẹ ori nịnị, dị ẹyaa kụ ụ yị wa nị. Ẹnịnị ệ và ịrẹma anị saka-saka ẹ́ yị saasa ọda nị. 12Ẹnẹyịmavara kà ebira odivi Anijuda nịnị o divi huna oohiku ẹnịnị nị. Ayị ẹnịnị vana katẹngụ dị ahịka ịsị odivi ene sì kẹnẹ ẹyaa mẹ nị. Ẹnịnị ẹ́ yị saasa ịrẹyị anị. 13Agụvị avọọ ọnị vaa dụ wa hụrị ẹkụra ẹnịnị nee hi ẹkụra ọsa ọnị ẹnịrị ohiku ẹnịnị ẹ̀ yị vịdị yẹ da. Ẹnịnị ẹ zụ kụkụ na hẹkẹ ori nịnị òo mee ze wa eyi. Ọnị ẹ́ yị vaa vayị ẹnịnị.
Anijuda nịnị vaa vavẹ eehi
14Ẹnẹyịmavara kà, ụmẹ aa vẹ ọnị aza ẹ̀ yị ma vana sị ọnị hụ́ eku ka; Ohomorihi ana kụ Anisirẹrị nịnị hụrị ẹtẹ Ijipiti vẹ ọ̀ọ yị yà ịzọọ. 15Ama ẹnịnị vaa sị ọnịị hị́ eku ka: Ohomorihi ana kụ Anisirẹrị nịnị hụrị ẹtẹ Ịbabịrọnị ọnịrị avaba ẹkụra ịzị ọnị dụ wa ne hi vavẹ ẹkụra ọnị ọnị sị yị ohiku ẹnịnị, ọ̀ọ yị yà ịzọọ.
Ụyọrị anaa vẹ
16Ẹnẹyịmavara kà, ọnị aa tụ́ ụ hị́ ozube ivovo ọrụrụ-ọrụrụ vẹ dị ẹ̀ vaa zá aza ẹnẹnị. Dị ọnị rẹ tụ́ hị́ ozube nịnị ka ẹ̀ ve si wa ịnị avaba ataba ọnịrị ịnị ụtẹha ịrẹta, dị ẹẹ za wa vaka ẹtẹ. 17Ọ kà ọnị ee ré avaba ịsị ẹyaa mẹ. Ẹ́ yị nyị ịsị ẹ tẹ̀ yị ọnị. Ebira odivi ẹnịnị vị ọnị ọnị ee ré saka-saka. 18Ọ kà ọnị vaa sị ụya avaba ebira odivi ẹnịnị ọnịrị akụvị ẹnịnịị rị wa oze ẹẹva, agụvị ka ẹnịnị ẹ́ raa sị ori ẹnẹẹ yị nyị ụhwẹ anka oku ene su avọọ du ẹtẹ anị ha. Ẹtẹ anị kụkụ vị ohihi yị ori ana ahịka ireche kẹnẹ ẹ vị nị.
Aduwa ọnị Ijeremaya mẹ agụvị ka ộ sị ayị tụra Ẹnẹyịmavara
19Ijeremaya kà, Ẹnẹyịmavara, ẹwụ ee sere mi dị waa sị ụkata yị mị nị ọ; ẹwaā gụ mị ụvọ ịnị ụmẹ ẹngụkata nị. Anẹkụra nịnị vaa hụrị ịzị ẹhẹ na ta ịrẹsụ tụ vee tù wụ dị ẹ ka: Ẹ́ yị nyị ịsị ohiku ayị nịnị nyị para ori ana ahịka ireche kẹnẹ e vị nị hu, ori ẹnẹẹ yị nyị ịsị ẹ́ wụra mẹ aanị kẹnẹ ẹ nyị nị ọ. 20Ọza ọ́ọ́ zụ mẹ ori yị ẹngụ anị kẹ? Hịịn, ama ẹ́ yị vị ori obooro ẹ vị. 21Ẹnẹyịmavara kà agụvị avọọ ọnị aa sị ụkata anị zụ wa nịnị dị ẹ̀ yẹ ka ọnị ọ vị Ẹnẹyịmavara nị.
Currently Selected:
Ijeremaya 16: EBTP
Highlight
Copy
Compare
Share
Want to have your highlights saved across all your devices? Sign up or sign in
Ebira First Bible © Bible Society of Nigeria, 2014.
