Ayịsaya 60

Ụbanyị Ijerusarẹmị anaa vẹ

1Kwẹẹtẹ Ijerusarẹmị, dị ụ waa zẹtẹ anka ọyị.

Ụbanyị Ẹnẹyịmavara aa zẹtẹ ịnị ẹhẹ awụ. 2Avaba ẹkụra ana vọ vị ọnị etohozi kú ruma-ruma,

Etohweyi Ẹnẹyịmavara vaa zẹtẹ kụ wụ nịnị.

Ụbanyị anị vaa ya pe wu nini. 3Etohweyi awụ vee tura anẹkụra nịnị ka wụ vẹ,

dị ohinọyị nịnị vẹ vee tu wu ini ẹnịnị eyọnị ẹtohweyi ọnọọ.

4Kana eyi kara ẹngụ di e re ịsị ana mẹ.

Aza awụ aa kụ́ ẹngụ gụ ka ẹnị aa vẹ eehi.

Ezi anị vaa hụrẹ aha ẹnẹẹnẹ vẹ;

Ezi anẹẹ anị vị ana a vaa kụ́ nọ ẹkụra ọsa anka ezinụvọ avọọ.

5U vee re ịsa ọnọnị, dị ọ vị ịrajẹ yị wụ. Dị ụ mẹrị ayohine. Ogu anẹkụra nịnị vị ana vaa kụ va yị wu; hụrẹ akẹnẹ oku vị ana vaa kụ ẹkẹhị vẹ. 6Osohu ẹbanyị-ẹbanyị ana asị ịnyaakụmị zị ụsẹ vaa hụrẹ Imidiyani ọnịrị Ehwa vẹ. Ẹnyị vaa kụ igooru ọnịrị eturare hụrị Ịshẹba vẹ yị wụ. Aza vaa ka enube ọyịza ịsị Ẹnẹyịmavara raà mẹ̀. 7Avaba atẹmẹ Anikeda ọnịrị Inebayoti vị ana vaa kụ va yị wụ anka ịsa ịsọvọ. A vaa kụ wa mẹ̀ ịsọvọ ịrẹsụ ụta Ẹnẹyịmavara, dị ọ mẹ ka ụta anị ọ nyị ụbanyị hu avọọ pooro. 8Sị ẹ vị ẹsẹnị enee hira anka eguhi avọọ? Ẹ sị mẹẹ anka arivadi aa vavẹ ịnị eehi ani avọọ nị. 9Ẹnịnị vị ẹpa ana hụrẹ aha onoze aa vẹ. Ệ kụ aza Ohomorihi vẹ eehi. Ệ kụ igooru ọnịrị isiriva saasa wa ọyị sị sị ụbanyị yị Ẹnẹyịmavara, Ohomorihi ọnịnị Isirẹrị. Ọnị ọ mẹ avaba ẹhẹ ka ẹ sị ụbanyị yị aza anị nị. 10Ẹnẹyịmavara ộ kà yị Ijerusarẹmị ka, anẹkụra ọsa nini vee tenyi ọvọ ẹnịnị dà. Ohinọyị ẹnịnị vaa hẹkẹ wa. Ọnị ộ sị ụya rị wa ayị mẹ kụ ọ. Ama booro aanị, ọnị vaa nyị ayamva yị wa, agụvị ka ọnị ô re wa eyi. 11#Ẹtẹ 21.25,26Ọọdụ ọnịrị ịrahụ vị ana vaa na oze ọbanyị ọbanyị ẹkụra nịnị ha agụvị ohinọyị anẹkụra nịnị ẹ kụ ogu ẹnịnị vẹ. 12Anẹkụra ene yi ka ọnị ẹ yị hẹkẹ wu vị ọnị e vee vu ẹtẹ. 13A vaa ha ọchị ozozoza ẹngụ ana aā hị́ ịpayịnị, ijunipa ọnịrị isipirẹsị hụrẹ iruku Ịrẹbanọnị va yị wụ. Ọchị ẹnẹẹ a vaa sị mẹ irehi amị ọvị ka ọ nyị ụbanyị, di e si tenyi ẹkụra, dị ọ nyị ụbanyị. 14#Ẹtẹ 3.9Ezi ọnịvị awụ nịnị ana nyị ịhyẹrẹ awụ nịnị, dị ẹ sị ụya rị wụ nịnị vee ku ẹtẹ agada awụ nịnị. Ẹ vaa hị́ Ijerusarẹmị Ịzayọnị, ẹkụra Ẹnẹyịmavara, aha ọnịnị Isirẹrị. 15Â vịdị nyị ịhyẹrẹ awụ, dị ọzọza zwe hụrẹ ẹngụ nị. Ama booro aanị, Ẹnẹyịmavara kà ọnị vee tenyi ọ, dị ọ zoza, dị vara ẹkụra ana wụra mẹ eyi pooro zịna-zịna. 16Anẹkụra nịnị ọnịrị ohinọyị ẹnịnị vaa pa Isirẹrị anka ọnyị mẹẹ̄ ka ozi anị ịrẹva avọọ. Ẹ vaa yẹ ka Ẹnẹyịmavara ộ raà dọ ọ ha. Ochẹtẹẹngụ Ohomorihi Anisirẹrị ộ raà wara a tịtẹ. 17Ọ kà ọnị vaa sị igooru dọ ịrẹsụ enyusẹ ibironzi, dị ọnị sị Isiriva ọnịrị ibironzi dọ ịrẹsụ enyusẹ ọnịrị ọchị, dị ọnị sị enyusẹ dọ ịrẹsụ ịrẹta. Ọdọvịdị awụ nịnị ẹ yị kụkụ vaa mẹ̀ ẹvaya yị wụ. Ẹnẹyịmavara kà ọnị vaa mẹ wa ka ẹ sị ịzẹyịza ọnịrị ẹngwọọrọ mẹ ịjọva tụra wa ịrẹsụ. 18Ọza ẹ yị kụkụ vaa wụ́ ụha ezigi ọnịrị evu-ẹtẹ ịnị ẹtẹ ọnọọ. Ọnị vee sere, dị ọnị vagu ọ anka ọvọ. Ẹ vaa ga ọnị agụvị ka ọnị ọ raà dọ ọ ha. 19#Ẹtẹ 21.23; 22.5Ẹ yị vị ọyị ọ kụkụ vaa vị ẹtohweyi ọọdụ, a vị ụhwẹ ọ vị ẹtohweyi ịrahụ. Ẹnẹyịmavara kà a ọnị ụvọta ọ vaa vị ẹtohweyi arịmata. Ụbanyị ẹtohweyi anị vaa va ku ọ. 20Ẹkụhị ayodu awụ vaa ta. Ẹnẹyịmavara vaa vị ẹtohweyi ẹnẹ ẹ yị ma ta yị ọ nị. Etohweyi anị ó hụụnị ọyị ọnịrị ụhwẹ. 21Aza awụ vaa mẹ ịsị ẹ vọrọ, dị ẹ nyị ẹtẹ pooro zịna. Ẹnẹyịmavara kà ọnị ộ mẹ̀ wa, dị ọnị sị wa jẹẹ agụvị ẹ sị ụbanyị anị zụ nị. 22Ovwoovu ene weyi kere-kere vaa nyị ụkata anka ẹkụra. Ịjị ụmẹ òo si tu, ọnị vaa mẹ ka ịsa ẹnịnị ẹ mẹ eyiha-eyiha. Ọnị ọ vị Ẹnẹyịmavara nị.

Currently Selected:

Ayịsaya 60: EBTP

Highlight

Copy

Compare