Ayịsaya 58

Awẹ ịzẹyịza

1Ẹnẹyịmavara kà yị Ayịsaya ka, “Nowu tụ ẹba ọmẹzụ-ọmẹzụ, ọngwẹ awụ ọ̀ tụ ẹba anka ọpanyị aa sụ ịrẹyị avọọ. Kà a yị aza anị Anisirẹrị ịvị ẹnẹ ẹ yaa mẹ̀. 2Ẹ yaa hẹkẹ ọnị eyinị-eyinị. Ẹnịnị ẹ yaa mẹ̀ ọ sị mẹ̀ẹ anka e yee si ka ẹnị ẹ yẹ oze ọnị dị ẹnị ẹ saasa ọda anị nị. Ẹ kà ọnị ọ sị ọda kẹnẹ yị ẹnị, ayị ẹnịnị vee hine ọyị hẹkẹ ọnị.” 3Aza e yee họ̀ use ka sị ẹ vẹ dị a ka ẹnị ẹ za awẹ ịrẹma ọnị Ẹnẹyịmavara ẹ yị sị eyi na ịnị anị? Ẹnẹyịmavara ô va ohi yị wa ka, ụmẹ ọnị ẹ ya za awẹ vị ọnị ẹ yaa yịị dụ ẹẹngụ ẹnịnị, dị ẹ ya mẹ ẹvaya yị anụkọrọ ẹnịnị. 4Awẹ ọnị ẹ yaa za vị ana sị wa ngụrẹyị, dị ẹ yaa zyaazị, dị ẹ yaa ba egidi. Ẹngụ awẹ ọnọọ ọ zụ mẹ ka ọnị ọ wụ́ aduwa ẹnịnị. 5Ẹnẹyịmavara ộ kà, ẹnịnị wéé ro ka ayị ô hine tu ịsa ọnị ẹ yaa mẹ nị? Ẹnịnị àa za awẹ, dị sị ụya rị ẹngụ ẹnịnị; dị ẹ ka ịrẹsụ hi anka avị ana ma avọọ, dị ẹ kụ achị ana aā sịị zị ẹngụ hi ẹngụ, dị ẹ sị avaba ẹkụhị yaayịtẹ ịrẹsụ atịtọ. Aanị ka ọsọnị ẹ yaa hị́ awẹ nị? 6Awẹ ọnị ọnị sì yị: ẹnịnị ẹ hụrẹ aza ẹnẹ ẹ sị akụvị mẹ ẹvaya yị ụvọ. Ẹ sị ọkẹkẹrẹ hụụnị ọbẹ ẹnịnị, dị ẹ navọ wa. 7#Imt 25.34Ẹnịnị ẹ da ịsa yị aza ọnị ụngwẹ aa kụ, dị ẹ sị irehi ẹnịnị yị onosiye ẹnẹ ẹ yị nyị irehi ka ẹ ra, dị ẹ sị achị yị aza ana tụ ahwaahụ, asị e yi ka ẹnị ẹ yị mẹ ọgụvọ yị anda ẹnịnị. 8Ẹnẹyịmavara kà, ẹnịnị ẹ̀ẹ vavọọ mẹ, ụbanyị ayamva anị vaa zẹtẹ ịnị ẹhẹ ẹnịnị anka ọyị ẹnẹnẹ avọọ. Ụnava ẹnịnị vaa hụra vị, dị ọnị yaa pe wa, dị ọnị dọ wa ha, dị ọnị ee sere wa eyi ụvọnị-ụvọnị. 9Ụmẹ ọnị ẹ̀ẹ sị mẹ̀ aduwa, ọnị vaa wụ́. Ẹ̀ẹ hị́ ọnị, ọnị vee tu wa ohi. Ama asị ẹ kụkụ rẹ mẹ ẹvaya yị aza, asị ẹ rẹ sị eyi wụ̀ aza, dị asị ẹ rẹ ka odivi aza. 10Ẹnịnị ẹ̀ẹ sị ịsa yị aza ọnị ụngwẹ aa kụ, dị ẹ tẹsị aza ẹnẹ ẹ yị nyị nị, etohozi ana kara wa vaa vara ẹtohweyi anka ọọdụ. 11Ẹnẹyịmavara kà ọnị vaa zụ wa oze pooro, dị ọnị sị ịsa ọyịza-ọyịza ọnị e yee si yị wa. Ọnị vaa sị ụkata yị wa, dị ẹ nyị ẹngwọnịya. Ẹ vaa ya anka ụbazị ana ya ịnị apasị ọnị enyi anị ẹ yị mā wụ̀ avọọ nị. 12Ẹ vaa varẹma da irehi ẹnịnị ana jị eburu tịtẹ hụrị ụmọrụmọ. Ẹ ka irehi ene wu ẹtẹ. A vaa yẹ wa anka aza ene tenyi ọvọ ẹnịrị irehi ene wu da.

Ọgụ ana ya ịnị ọyị sị ụvọ za ẹkụhị ụhwọtụ

13Ẹnẹyịmavara kà ẹ̀ẹ sị ụbanyị yị ẹkụhị ụhwọtụ anka ẹkụhị ọnịnị, dị ẹ yị dụ ẹngụ ẹnịnị kẹnẹ, dị ẹ yị jịnẹ, dị ẹ yị mẹ̀ ụkọrọ, a vị dị ẹ ka ịrẹyị kẹnẹ-kẹnẹ ẹkụhị ọnọọ nị, 14e vee re ayohine ana ya ịnị ọyị hẹkẹ ọnị. Ẹnẹyịmavara kà ọnị vaa mẹ ka avaba anẹhẹ ẹ sị ụbanyị yị wa, dị ẹtẹ ohiku ẹnịnị ọnị ọnị si yị wa ọ vaa vị ize yị wa.

Currently Selected:

Ayịsaya 58: EBTP

Highlight

Copy

Compare