Ayịsaya 52

1 # Ẹtẹ 21.2,27 Ẹwụ nịnị Anijerusarẹmị kwẹẹtẹ, kwẹẹtẹ wa sị tụ ụkata nịnị. Ẹwụ ẹkụra ọnịnị Óhomorihi, waa mẹ ụbanyị anka ọza ọ̀ọ kụ́ ịta ozoza hi ẹngụ avọọ. Aza ẹnẹ ẹ̀ yị jị ụvẹvẹnẹ, ọnịrị aza ẹnẹ ẹ̀ yị nị, ẹ yị vaa zị oze ọbanyị awụụ paraahu. 2Ẹwụ Ijerusarẹmị, henyi ẹngụ awụ! Kwẹẹtẹ hụụnị evutu dị ụ wa yaayịtẹ ịnị aga ohinọyị awụ. Ngwa ẹba ana a sị sụ́ wụ, ẹwụ nịnị Anịzayọnị ana a za ọrịhị. 3Ẹnẹyịmavara ộ kà a yị aza anị ka, “Ẹ yị nyị ẹkẹhị ene e si ụmẹ ana a za wụ nịnị ọrịhị; avọọ gẹdẹ-gẹdẹ, ẹ yị nyị ịsị e re vee si, dị a dọ wụ nịnị varẹma.” 4Ụmẹ ọnị ụ na ra nịnị Ijipiti dị ụ vị ọzọga tụ ịzọọ nịnị, ẹwụ nịnị ọ́ vavọọ ze eyi nị. Ama, Asiriya vị ana sị ụkata kụ wụ nịnị hụrẹ ẹkụra awụ nịnị. Ẹnịnị e yi sí ụta ọnyọọnyị ụvị awụ nịnị. 5#Iro 2.24Booro aanị, Anibabironi ẹ́ rẹ sị ụ nịnị za ọrịhị, ẹ yị yaanị nyị iruvo ana a vọrọ ka ẹ̀ sị vaa mẹ vụrụ-vụrụ. Ẹnị anaa mẹ ohii tụra awụ nịnị vị enee wo oto, dị ẹyaa nyị irenuu zị. Eyinị-eyinị vị ene ẹyaa kụ mị ụhụ. 6Agụvị avọọ, ịnị ụmẹ anaa vẹ, ụ vaa yẹ nịnị ka ẹma vị Ohomorihi, dị ụ rẹ yẹ nịnị mâ kà ịrẹyịị wụ nịnị. 7#Ịna 1.15; Iro 10.15; Ẹhw 6.15Ộ da zoza ka è vene re ka ọnụtụ aa vẹ ịrẹsụ ataba, anaa vaa kà enube ẹngwọọrọ dị ọ sị enube ịrajẹ ve. Ọza ana vaa kà a ka, “wa sị ha nịnị”. Ọza ana vaa kà a yị Ịzayọnị ka, “Ohomorihi awụ nịnị ọ vị Ohinọyị nị”. 8Sị ụtọ pe ẹtẹ! Aza enee sere ẹkụra ee nowu. Ẹnịnị dudu aa jị ahẹ agụvị ka ayị ẹnịnị ee hine. Ee sị eyi ẹnịnị ee re ka, Ẹnẹyịmavara ọ sị varẹma aa vẹ Ịzayọnị. 9Nyima waa jị ahẹ nịnị, ẹwụ nịnị ene sị vu ẹtẹ hi Ijerusarẹmị. Ẹnẹyịmavara vaa dọ ẹkụra anịị ha, di o hunẹnẹ aza anị ayị. 10Ẹnẹyịmavara ọ sị ụvọ ọnịnị anị tana eyi avaba anẹhẹ. Avaba aza ene hi ịzị ẹhẹ ana ta hi vee re Óhomorihi ayị mẹ vaa dọ aza anịị ha. 11#2 Ịkọ 6.17Re ka waa hụrị Ịbabịrọnị nịnị. Avaba ẹwụ nịnị anaā za ẹnya ene hi ini Irehi Ohomorihi! A sị ụ sị ụvọ kanyị ịsa ẹnẹ ẹ̀ yị nị nịnị. Jịnẹ hụụnị akakana ẹnịnị nịnị. Vara ẹngụ awụ ọnịnị. 12Ọyaanị, wẹ yị vaa sị eyihaa hụụ ịzọọ nịnị, wẹ yị vaa kụ echeechii hụụ ịzọọ nịnị. Agụvị ka, Ẹnẹyịmavara vaa dọ ọvịdị awụ nịnị. Ohomorihi Ísirẹrị vaa yà ịrẹma awụ nịnị, di ee sere wu nịnị.

Ozi ahụ anaa rị ụya

13Ẹnẹyịmavara kà, o vee zee yi ozi ahụ amị ịnị ụkọrọ anị; a vaa sị ụbanyịị yọ ẹtẹẹtẹrẹ. A vaa sị ọ tụ ẹba, dị ọ varẹma nyị ụbanyị ẹtẹẹtẹrẹ. 14Aza ọrụrụ-ọrụrụ mè re e, ộ wa zizi. É mè dụ ọ ha pooro, ẹ yị hyakụ kụkụ vene ọza vụrụ-vụrụ. 15#Iro 15.21Ama ịrẹyị anị vee hi aza ọrụrụ-ọrụrụ irenu. Ịrẹyị anị, vee hi ohinọyị nịnị irenu, dị ẹnịnị ẹ yị hyakụ kà ịrẹyị. Ẹnịnị vee re ẹtẹ dị ẹ yẹ ịsị ẹnịnị ẹ̀ yị vịdị yẹ da.

Currently Selected:

Ayịsaya 52: EBTP

Highlight

Copy

Compare