Ayịsaya 48

Ohomorihi ọ vị Ẹnẹyịmavara ana nyị ụhwọ nị.

1Batọ ịrẹyị ọnọnị, ẹwụnị Anisirẹrị ana vị evere Ijuda ana sị ịrẹha Ẹnẹyịmavara hị́ eku. Ẹ ka ẹnị aa hẹkẹ Ohomorihi Anisirẹrị ama ireche osusu. 2Di e yee wu ka ẹnị vị anẹkụra ọnịnị ene chi ayị za Ohomorihi Anisirẹrị ọnị ịrẹha vị Ẹnẹyịmavara Ochẹtẹẹngụ. 3O si ku ọnị Ẹnẹyịmavara vịdị ka wa ọnọ ịsa ana vaa mẹ. Ộ mẹ̀ ẹ hụrẹ hi wa, dị ịrẹyị anị sẹ nị. 4Ộ yẹ ka ẹnịnị vaa mẹ ịrẹsụ ọkatẹngụ, ayị ẹnịnị ọ vị, dị ọ katẹngụ hu ịrẹta nị. 5Ẹnẹyịmavara kà ọnị ọ vavọọ ka yị wa agụvị ịjị ọ̀ọ sị mẹ asị ẹ kà a ka ori ọnị ẹ yaa hẹkẹ ộ mẹ̀ ẹ nị. 6Avaba ịsa ọnị ọ raà ka yị wa vị ana sẹ. Ẹ dọ ka ịrẹyị anị ộ gẹ ẹ. Booro aanị, ọnị vaa kà a yị wa ịsa ọwọọwa ana aa vẹ. Ịsa ana tẹ̀ ọnị ẹ yị nyị ọza ana yẹ ọ vị nị. 7Ịsa ọwọọwa ọ vị nị. Ẹ yị vị ịsa ana vịdị mẹ, agụvị avọọ ẹnịnị ẹ zụ kà a ka ẹnị ẹ yẹ oze anị. 8Ẹnẹyịmavara kà ọnị ọ yẹ ka ẹnịnị ẹ yị wụra sị ayị tụra. Â yẹ wa ka anakamawụ ẹ vị hụrẹ ẹtẹẹtẹ nị. Agụvị avọọ ẹ yị wụ́ ịrẹyị ọnọnị vụrụ-vụrụ nị. Ẹnịnị ẹ sị ụtọ kụ ahị ịrẹyị anị.

Anisirẹrị nịnị ẹ sị ha hụụnị ụvọ Anibabironi

9Agụvị aza ẹẹ ga ọnị, ọnị ẹ yị kụkụ vaa kụ ayị hi wa, dị ọnị o vee vu wa ẹtẹ. 10Ẹnẹyịmavara kà ọnị ộ sị ẹngụkata zama wa re anka aā mẹẹ sị ịra akẹnẹ zama isiriva re avọọ. Ama ọnị ore ka ẹ yị nyị ịsị ẹ vị. 11Ọ kà agụvị ẹngụ anị ọnị dọ wa ha nị. Ịzẹyịza, agụvị ẹngụ anị yọ nị. Ọnị ọ yị vaa zẹ ka a mẹ̀ ụhị nyị ịrẹha anị, a vị ka ọnịrị ọzọnyọzọnyị ọ ga ụbanyị ana vị áanị ịnya kẹnẹ. 12#Ayị 44.6; Ẹtẹ 1.17; 22.13Ẹnẹyịmavara kà Anisirẹrị ana vị aza anị ọnị ọnị nyị e sị ụtọ pe ịrẹyị anị. Ọnị ịnya kẹnẹ ọ vị Ohomorihi nị. Ọnị ọ vị oyinyima ọnịrị ẹzẹtẹ nị. 13Ụvọ anị ộ sị ka ẹhẹ ẹtẹ, dị ọ gana ẹbẹẹba ku nị. Ịrẹyị kẹnẹ ọ kà, dị ịsa ọzọza jẹẹ udi anị nị. 14Ẹnẹyịmavara kà a kụ ẹngụ gụ, dị ẹ wụ́ ịrẹyị anị. Áá nyị ọnya ịnị ori nini ana kà a yị wa ọza ọnị ọnị sì ịrẹyị anị, ọnị ọnị nyị ka o va eyi ịraazị ka Ịbabịrọnị? Ọza ọnọọ va mẹ̀ ịsa ọnị ọnị si ka ọ mẹ. 15Ọnị aa hị́ Ịsayịrọsị ka ọnị ọ tụ ọ ụtụ nị. Ọnị vaa gụ ọ ụvọ ka o re mẹ. 16Ọ kà booro aanị ẹ ka pe ọnị dị ẹ wụ́ ịsị ọnị aa kà a. Hụụnị oyinyima ọnị e yi were ka ịrẹyị anị. Ọnịị̄ mẹ̀ ka avaba ịrẹyị anị ọ sẹ nị.

Eto ọnị Ẹnẹyịmavara nyị yị aza anị.

17Ohomorihi ọnịnị Anisirẹrị, Ẹnẹyịmavara ẹnẹdọha awụ nịnị ka, Ọnị ọ vị Ẹnẹyịmavara Ohomorihi ẹnịnị ene si ka ọnị ọ zụ wa ịsa agụvị o zoza yị wa, dị ọnị ọ zụ wa oze ọnị a vọrọ ka ẹẹ zị nị. 18Ẹnịnị ẹ̀ẹ wụ́ ịrẹyị anị, ọ yaanị ee ze yị wa anka orosi ẹnẹ ẹ yị mā wụ̀ avọọ. Ẹ yaanị aa nyị ehuna anka ahịị̄ mẹẹ kụ enyi na va ha ụtọ irehu avọọ. 19Ezi ẹnịnị vaa rụrụ anka aarẹ avọọ. Ọnị vaa mẹ̀ ka asị a nyị ịsị mẹ̀ wa. 20#Ẹtẹ 18.4Ẹ jịnẹ hụrị ẹtẹ Ịbabịrọnị, ẹẹ na hara kẹnẹ! Ẹ ka enube ayohine; dị avaba aza ẹ wụ́ ọ avaba aha tụra aha ka Ẹnẹyịmavara ọ raà dọ ozi ahụ anị Isirẹrị ha. 21Onyi ọ yị kụ wa ịnị ụnọmị ọnị Ẹnẹyịmavara mẹ kụ wa zị. Ộ sị enyi hụụnị ịda yị wa. Ịda ộ ha ẹẹva, di enyi ee si hụụnị anị jịnẹ nị. 22#Ayị 57.21Ẹnẹyịmavara kà ọza ọhịmị ẹ yị nyị ẹngwọọrọ.

Currently Selected:

Ayịsaya 48: EBTP

Highlight

Copy

Compare