Ayịsaya 38

Ẹngwọzị Ihezekaya

1Â nyị ụmẹ ọnya aanị ọnị ẹngụ sị zị Ihezekaya, dị ọ sị vọ chee di o su. Ọnịsẹ Ayịsaya ana vị ozi Amozi ô ne tu ọ dị ọ kà, Ẹnẹyịmavara kà o tenyi irehi anị agụvị ka ẹ yị vaa zụ rị ụkụ anị ọnọnị, ee su nị. 2Di Ihezekaya va eyi ka ugene, dị ộ mẹ̀ aduwa hi Ẹnẹyịmavara nị. 3Ọ kà, Ẹnẹyịmavara ọ tamayị ka ọnị ọ raà sị avaba ayị mẹ ịzẹyịza, dị ọnị rẹ mẹ̀ ịsa ana vọrọ eyi anị nị. Dị ọ nyayịnẹ jị òrèrè ẹtẹẹtẹrẹ nị. 4Ịjọnọọ, dị Ẹnẹyịmavara pè Ayịsaya kà ịrẹyị nị. 5Ọ kà ọ na ka yị Ihezekaya ka, Ẹnẹyịmavara Ohomorihi ada anị Idevidi ka ọnị ọ raà wụ́ aduwa anị, di oni reè re orere anị nị. Ọnị vaa da ịrayị ẹwụrẹhị tụ́ ịnị ẹhẹ anị yọ. 6Ọnị rẹ vaa dọ ọnịrị ẹkụra ọnọọ ha hụụnị ụvọ ohinọyị Anasiriya. Ọnị vaa vụ ịrẹvụ yị ẹkụra ọnọọ nị. 7Dị Ayịsaya ka apọtẹrẹwa ọnị Ẹnẹyịmavara vaa sị zụ ka ọnị vaa mẹ ịsị ọnị ka yị: 8Ụmọmọ vaa nọ ọvịdị ahụ ẹẹwụ, dị ọ rẹ va nọ ịrẹma ahụ ẹẹwụ.

9Ẹngụ ana zị Ihezekaya ohinọyị Ijuda mẹ ta, ahẹ ọnị ọ́ chẹrẹ yị. 10Me roo ka ịnị ẹnẹnẹ viri-viri ẹhẹ anị,

ị mee vee su hụrẹ ẹhẹ aanị nọọ

Dị ẹhẹ amị kara ụpa

11Me roo ka ịnị ẹhẹ ọnọnị ọnị ẹyị ọza va ra aanị

mẹ yị kụkụ vene re Ẹnẹyịmavara

Ẹ yị nyị anẹhẹ ọnị mị venee re.

12Ẹhẹ amị vị ana da ẹjịjị, dị ọ ta

anka ajẹngụ oseratẹmẹ ene wú avọọ.

Ma raà kara ụvẹnẹ ẹhẹ amị kwooze

anka ọza eneē hí ịta, mẹẹ̄ jị ọ avọọ.

Ohomorihi vị ene ee tura orupa ụhwẹ ọọdụ ọnịrị ịrahụ 13Avaba ịrahụ vị ọnị mẹ sị jị òrèrè pooro dị eyi aa nị,

O che ẹchụkụ amị hi mi ẹngụ anka idu avọọ nị.

Ohomorihi vị ene ee tura orupa ụhwẹ ọọdụ ọnịrị ịrahụ 14Mị vụrị ee nowu anka inomi ịnị avị,

di mee tii anka arivadi avọọ nị

Eyi anị ọ sị kata mm mẹ kụ eyi hi ẹbẹẹba ee zi

Ananyị mị va gụ mị ụvọ hụụnị akanya amị. 15Ama sị mị vị ana zụ ka? Ẹnẹyịmavara ộ mẹ̀ ịsa ọnọnị nị.

Ayị amị o si du chuku-chuku, mẹ yị nyẹngụ sụ ara. 16Ananyị yị ẹwụ kẹnẹ mị vaa ra yị nị, ẹwụ kẹnẹ ọ vị ẹhẹ amị nị.

Navọ wa mẹ mị ụkụ, dị wa navọ ka ma yara. 17Ayodu amị ọ vara ẹngwọọrọ.

Dọ ụhwẹ amị ha hụụnị usu.

Jị eyi vee hụụnị ịnị avaba ebira odivi ọnị mẹ mẹ̀. 18Oku ẹ yị kụ wụ avọ, avị ka ọ zụ ha va ga wụ.

Ọza ene su ọ yị zụ sị ayị tụra ịzẹyịza awụ.

19Ọza ana yara ọ zụ ga wụ anka mm ma mẹ ajịnị aanị.

Aza ana ma ezi ẹ̀ ka yị wa ẹwụ Ohomorihi mẹmẹ nyị ịzẹyịza nị.

20Ẹnẹyịmavara vaa dọ mị tụ̀.

Ị vaa jị ahẹ di yee hụ́ ịsa ga a

ịnị avaba ẹhẹ ayị

ịnị irehi Ẹnẹyịmavara.

Ajiwe ọnị Ayịsaya sị yị Ihezekaya

21Ayịsaya ộ ka yị ohinọyị ka a kwọ avị ihwigi tụra ịtahụ anị ka ọ vaa vị. 22Ihezekaya ô họ̀ use ka ịsị ẹ vaa apọtẹrẹwa ka ọnị vaa zụ hịrẹ nọ ịnị irehi Ohomorihi?

Currently Selected:

Ayịsaya 38: EBTP

Highlight

Copy

Compare