Ayịsaya 33

Ọnịvị Anisirẹrị ẹ sị da

1Wa sị dà, ẹwụ nịnị ana maanị aa wụ̀ aza, dị à yị nyị ọza ana aa wụ nịnị. Mị ka wa sị da, ẹwụ nịnị onireche ene ee vene ọza dị ọza ò yi vene ẹwụ nịnị. Ụ màa wụ̀ ọza nịnị aanị, ịjị ụmẹ awụ nịnị ọ̀ọ ta, a rẹ vaa wụ̀ ẹwụ nịnị. Ịjị wè yi rè kuku vene ọza nịnị, ụmẹ ọnọọ e vee vene wu nịnị nị.

2Ẹnẹyịmavara, navọ kwogwo wa vayị ayị. Ẹwụ ị sị ayị tụra nị. Navọ weē sere eyi eyinị-eyinị, dị wa dọ yị tụ́ ịhị ẹngụkata òo tù yị. 3Anẹkụra nịnị mè re ka wâ kwẹẹtẹ di u nowu ịrẹsụ, ẹnịnị e kú zwe, ẹ sị gara hi.

4Ẹwụ nịnị anẹkụra aza vị ana vaa sùu kú ogu awụ nịnị dị ẹ kụ́ ọ anka akụvarịva mèe sùu kú avị avọọ. 5Ẹnẹyịmavara ộ dà nyị ụbanyị kẹnẹ Ọnị ọ vị ohinọyị avaba ịsa nị. Ọ vaa mẹ ka avaba aza ene hi ẹ̀ẹ mẹ ịzẹyịza ọnịrị ebira ana vọrọ. 6Ẹngụ avaba aza vaa vọ di o hunẹnẹ ịnị ụmẹ awụ. Wàa sị ụbanyị yị Ẹnẹyịmavara, ọ vaa mẹ ka ọ̀ dọ wụ há, dị ọ rẹ mẹ ka wa yẹ ịrẹyị nịnị ẹtẹẹtẹrẹ. Ogu avaba ẹnẹẹ vaa vịị yị wụ nị.

7Ọdọvịdị ẹkụra nịnị ee nowu ka à gụ ẹnị ụvọ. Aza ana anẹkụra tụ́ ka è ne jii ịrazị ẹnị aa tụ́ orere booboro. 8Oze ọbanyị ọ sị jị ẹngwa hyó, ẹ yị nyị ọza ana nyayịnẹ và tụra oze. Ọkarẹyị ana a vịdị mẹ dị a ka â dọ, ọ rẹ sị gara. Aza ẹnyị ẹ yị kụkụ sị ụbanyị yị ọsa. 9Ẹtẹ ọnọọ kụkụ vi osusu tịtẹ kẹnẹ, ẹ yị kụkụ nyị ọza ịnị anị. Avaba ọchị ene hi ini iriku Ịrẹbanọnị ẹ kụ́ wọrọ. Ini ozi Ịsarọnị ana vịdị maanị zoza ọ kụkụ sị vara ọpaapara. Ọchị ene hi ịnị ataba Ịbasanị ọnịrị Ịkamẹrị ẹ kụ́ wọrọ avị.

Ọnịvị Ẹnẹyịmavara ẹ sị dà

10Ẹnẹyịmavara kà ọnị vaa kwẹẹtẹ booro aanị dị ọnị ọ̀ mẹ ụkata anị zụ̀ anẹkụra. 11Ọ kà eyi ana aza ẹnẹẹ aa gẹ vi osusu kẹnẹ. Ọ rẹ ka avaba ịsa ẹnị ẹ̀ẹ mẹẹ vị ana vaa tụ́ osusu. Ọ kà ịsa ẹnị ẹ yaa mẹ ọ vị ịra ana vaa rị wa nị. 12Ẹnẹyịmavara kà aza ẹnẹẹ vị ana vaa rị ịra dị ẹ sụ atịtọ. Ọ kà ẹnịnị vị ana vaa rị ịraa vàa ha anka avị ana a sẹ hi ẹtẹ avọọ. 13Ọ kà avaba aza ene hi ẹnẹẹnẹ ọnịrị ẹngụ eehi ẹ̀ wụ ịsa ọnị mẹ, di è re re ụkata anị. 14Aza edivi ana aa mẹ̀ ebira odivi ene hi aa banyị ángwa mèe hi wa. Ẹ ka ẹnị ẹ rị ẹnị ana zụ sị ẹngụ dọ ọkarẹyị Ohomorihi ana aā rị ọza anka ịra pooro aanị.

15Ẹngụ aza ana vaa jẹẹ ẹ vị aza ana ahịka ẹẹ̄ mẹ̀ ebira ana vọrọ, dị ẹ rẹẹ̄ kà ịrẹyị ana vọrọ nị. Ẹngụ aza ẹnẹẹ ẹ ma bẹ ụvọ tụ́ ịnị ịsa ana a sị ụkata-ụkata dọ ọza. Ẹnịnị ẹ mā rẹ dọ ochirerenu. Aza àa gẹ eyi ka à na wụ̀ ọza, ẹ mā rẹ bẹ ụvọ tụ́ ọ. Ẹnịnị ẹ mā bẹ tụ́ ịnị ịsa odivi ọnyọọnyị. 16Ẹngụ aza ẹnẹnị ẹ va zụụ há nị. Vị ẹ vaa sị mẹ anka ọza ana na vaka tụ́ aha ịzị ẹ̀ yị nyị ịsị ẹ zụ kanyị ọ avọọ nị. E vee re ịsaa rị, e re vee re enyi hú.

Ụmẹ ozoza ana aa vẹ

17Ẹkụhị ọnya aa vẹ, ịhị ọnọọ u vee re ohinọyị ana nyị ụbanyị ka a mẹ ohinọyịị tụra ẹkụra ana kara a. 18Ịnị ụmẹ ọnọọ ẹ yị kụkụ vaa nyị ka wee hí angwa azọga ana aa mẹ ehunaa wụ, dị ẹ yaa dọ wụ nịnị ẹkẹhịrehi. We yi re kuku vee hí angwa ẹnị ene eē yi ẹtẹ awụ nịnị re. 19Ụ vanaa sị pa ịta nịnị nị ka â vịdị nyị azọga ọnị wẹ̀ yị wụ́ ẹkụra anị ene ee wuu hi wu nịnị. 20Kana eyi di we re nịnị. Ịzọọ ọ vị ẹkụra ịzị ị yàa rị eche ahẹkẹ ayị nị. Wéē re Ijerusarẹmị ẹkụra ana aza ra hi ịnị anị ịnị ẹngwọọrọ. Vị ọ sị mẹẹ ajẹngụ ana ahịka ọza ọ yị vaa kụ́ụ hụrẹ udi anị avọọ nị. Ọza ọ yị vaa tụ̀ ẹka ana a sị kanyị ọ. Ọza ọ yị rẹ vaa yẹrẹ obo anị. 21Ẹnẹyịmavara vaa mẹ ka à yẹ ụkata anị ịzọọ. Vị ọ vaa sị mẹẹ anka okuha ana gana avọọ nị. Ama ẹ yị nyị ẹpa ịrẹkụ ọnyọọnyị ana vaa zi oze avọọ. 22-23Avaba ẹnya ana aā kụ́ụ hi ini ẹpa ẹnẹẹ vị ana vaa vi osusu. Ọchị ọgọdọ ana a mẹ jẹẹ ịnị ẹpa vị ana vaa ma. Ọza ọ yị rẹ vaa gana ịta ana a sịị dọ ahị. Ogu ọnịvị ayị vị ọnị ị vaa kụ́. Ogu vaa gwẹtẹ, di oswahụ nịnị ẹnị re re kụ́ bẹẹ. Ọ vavọọ vaa yà agụvị ka Ẹnẹyịmavara ọnị ụvọta ọ vaa vị ohinọyị ayị, dị aa mẹ ịjọvaa tụra yị nị. Ọnị aa sị ọdaa yị nị ọnị ọ rẹ vaa dọ yịị há nị. 24Nyị ọza ana ra ẹnị ẹngụ kụkụụ vanaa zị. Ebira odivi ana aza ana ra hi ịzọọ ẹ̀ẹ mẹ vị ọnị Ohomorihi vaa vagu wa ịnị anị.

Currently Selected:

Ayịsaya 33: EBTP

Highlight

Copy

Compare