Ayịsaya 29

Ịrẹyị ene vee tù Ijerusarẹmị

1Wa sị dà ẹwụ nịnị anẹkụra Ariyeri. Ẹwụ nịnị Anariyẹrị ịzị Idevidi vịdị ra, mị ka wa sị dà nịnị. Òo zee wu nini eyi wa rịị rị eche awụ nịnị ịrayị-ịrayị.

2Ama yẹ ka Ohomorihi aa kụ́ ịrẹkụ vee tù wu nịnị, ẹwụ nịnị Anariyẹrị. U vee nowu nịnị, dị waa jị òrèrè. Vị Ohomorihi vaa mẹ wụ nịnị anka arasị ịzị a yàa rị ịsa ịsọvọ ịra avọọ nị. 3Ohomorihi vaa kụ́ ịrẹkụ kwẹẹtẹ tù Anariyẹrị okiri-okiri. Avọọ o mè vee tenyi ẹngụ ịrẹkụụ kara a dị ọ rị ọ nị. 4Ohomorihi vee hu ọ ẹtẹ, dị ahịka vị ọ kụkụ vụrị yà ini eteesu aa kà ịrẹyị nị. Mị ka ini eteesu aa yà, dị ọ kụkụ vụrị-vụrị aa kà ịrẹyị nị. Anariyẹrị vị ana kụkụ vaa sị mẹẹ anka aneku ene hi ịnị ẹtẹ ana aa vụrị ka ẹnị ẹ̀ kà ịrẹyị avọọ. Vị a vụrị-vụrị vaa wụ́ ọ màa kà ịrẹyị ini eteesu nị.

5Ama ọnịvị awụ gigirigi ẹnẹẹ ana vavọọ mẹ wụ avọọ vị oni Ohomorihi vaa vara eteesu nẹrẹ-nẹrẹ. Mị ka anayịchama ẹnẹẹ vị oni Ohomorihi vaa tụ́ ahịị ha anka azịzẹ avọọ. Ịnị ụmẹ ọnị ọza ọ̀ yị hyakụ ro vụrụ-vụrụ, 6Ẹnẹyịmavara Ochẹtẹẹngụ vaa mẹ ka apaana ihinẹba ọ̀ há, di ẹtẹ ò henyi jigijigi. Ẹtẹ vaa sụ́ ịrẹyị, di opomi aa tụ́ kukuku, dị ịra aa dà kẹnẹ. Dị ọ vavọọ vẹ dị ọ va dọ wụ tụ́. 7Di u vene re ka avaba anẹkụra ana hara gụ dị ẹ kụ́ ịrẹkụ ẹnị ẹ kụ́ vẹ ệ ta. Ịrẹyị ẹnịnị vị ana va sị mẹẹ ọza òo rere ra ụra ịrahụ avọọ. Mi ka vị ọ va sị mẹẹ ka vi ọza vavọọ ro ịrẹyị ịrahụ kẹnẹ nị.

8Avaba anẹkụra ana kụ́ gụ ka ẹnị è ne pè Anijerusarẹmị kụ̀ ịrẹkụ vị ana vaa sị mẹẹ anka ọza ọnị ụngwẹ aa kụ̀ dị ọ ra ụra ka ọnị aa rị ịsa. Ịjị ọ si ha, ụngwẹ vị ana aa kịị kụ̀ ọ. Mị ka vị ẹ rẹ vaa sị mẹ anka ọza eni enyi aa kụ̀, dị aa ra ụra ka oni ee hú enyi nị. Ịjị ọ sị ha, enyi aa raa wụ ọ, o yi re enyi hú.

9Wa mịị mẹ ụraa na, óò mè zee wu eyi nịnị. Sị ịsa kú eyi asị ụ zẹẹ ka we re ẹtẹ nịnị. We yi hú eche ama waa mẹrị eche nịnị. 10#Iro 11.8Ẹnẹyịmavara ọ raà mẹ ka waa sụ ara ụtọ nịnị. O reè gù ẹwụ nịnị ọnịsẹ eyi ka asị u kuku re ẹtẹ nịnị. 11Ohomorihi ọ̀ọ sị ẹtẹ zụ̀ wụ nịnị ọ yị vaa zẹẹ ka wa yẹ iruvo ẹtẹ oni wee re nịnị. Vị ọ vaa sị mẹẹ iwe ana a chẹrẹ dị a sị ịsa kú ọ avọọ nị. Wàa si iwe ọnọọ yị ọza ana yara kà iwe dị ụ ka aarịhịnị ò pè wu kà a nị, dị ọ ka ọnị ọ yị zụ kà a, ka a raà sị ịsa kú ọ. 12Wàa va sị na yị ọza ẹnẹ ẹ̀ yẹ iwe dị ụ ka aarịhịnị ò pè wa kà a nị, dị ọnị ka ọnị ọ yị hyakụ yara kà iwe.

13 # Imt 15.8,9; Ịmk 7.6,7 Agụvị avọọ Ẹnẹyịmavara kà, “Aza ẹnẹnị vị ana aa kú irenu kẹnẹ ka ẹnị vị amị. Irenu kẹnẹ ẹ yaa sịị sị ụbanyị mị nị ama ayị ẹnịnị ọ yị gụrị mị vụrụ-vụrụ. Ọda ana aza kẹnẹ mẹ̀ ẹ sị ụvọ za, dị ẹ ka vị ẹnị aa hẹkẹ mị nị. 14#1 Ịkọ 1.19Mị rẹ va naa mẹ̀ ịsa ana ahịka ô hi wa eyi. Avọọ m mẹ̀ vaa mẹ̀ ẹ tụ̀ ẹngụ tù ẹngụ nị. Aza ana ka ẹnị ệ yẹ ịrẹyị vee re ka ọnụra ẹnị vị nị. Avaba ịrẹyọyẹ ẹnị ẹ ka ẹnị ệ nyị vị ana vaa tụ́ osusu.”

Aza ene ro ka Ohomorihi o yi re ẹnị

15Wa sị dà nịnị, ẹwụ nịnị ana aa mẹ eto di ụ ka asị Ẹnẹyịmavara yẹ nịnị. Mị ka wa sị dà nịnị, ẹwụ nịnị ene ee weree mẹ ịrẹyị di wee ro o nịnị ka ẹ yị nyị ọza ene ee re wu nịnị. Ụ ka ẹ yị nyị ọza ana yẹ ịsị waa mẹ nịnị. 16#Ayị 45.9; Iro 9.20Wa kụ́ ẹhẹ du nịnị. Ụ́mọpa wéé kuku si huna ọza ana dà a ka ọnị ọ sị jị ụnọkọ nị? Ịsa ana a mẹ ọ́ọ́ zụ̀ kà a yị ọza ana mẹ̀ ẹ ka ẹ yị vị ọza ọnọọ ọ kụkụ mẹ̀ ọnị? Ụnọkọ ọ́ọ rẹ zụ kà a yị ọza ana jị ọ ka ẹ yị nyị ịsị ọ yẹ?

17Anka a mẹ̀ẹ kà a, iriku Ịrẹbanọnị ọ sị vara ẹtẹ ịrịkụ ene zoza, di ẹtẹ ịrịkụ ịyẹyẹ ọnị rẹ sị vara iruku nị. 18Ịnị ụmẹ ọnọọ, ogutọ nịnị vaa wụ́ ịrẹyị ana a chẹrẹ tụ́ ini iwe ọnọọ àa kà a. Ogweyi nịnị ana vịdị yà ịnị ịrahụ vaa há eyi di ee re ẹtẹ. 19Ẹnẹyịmavara ana vị Ohomorihi ẹnịnị ana Anisirẹrị aa hẹkẹ rẹ vanaa mẹ ka onosiye nịnị ẹ̀ rẹẹ jẹ. 20Anayịchama ana aā kụ́ Ohomorihi isiya vaa taa hụrẹ ẹtẹ. Dị a za avaba aza ana aa mẹ̀ ebira odivi dị a wụ̀ wa và ha. 21Aza ene eē cheechee kú ọza, dị ẹ̀ yị mà zẹẹ ka aza, ana mẹ̀ ịsa odivi ẹ̀ rị ụya, di e re yee cheechee kú ọza ẹnị ẹ̀ yi nyị ịsị ọ mẹ ka à jị ịvị yọ vị oni Ohomorihi vaa wụụ vàa ha. 22Ẹnẹyịmavara ana dọ Abụrahamị tụ́ ộ kà a yị Anisirẹrị, ọ ka ụhị ọ yị kụkụ vaa nyị wa. Ọ rẹ ka eyirẹsụ ẹnịnị vaa nịya. 23Ọ kà Ịjị èeyee re ezi ọnị ọnị sị yị wa ịnị akakana ẹnịnị, ẹ vaa yẹ ka ọnị ọ vị Ohomorihi ẹnịnị ana Anisirẹrị aa hẹkẹ nị. Ịjọnọọ ẹnịnị vee hí angwa anị. 24Aza ana vịdị aa mẹ ụra vaa yẹ ịrẹyị. Aza ana vịdị aa rị ihuhu vaa jẹ ka aa zụ̀ ẹnị ịsa.

Currently Selected:

Ayịsaya 29: EBTP

Highlight

Copy

Compare