Ayịsaya 25

Ahẹ ana a jị gono Ohomorihi

1Ẹnẹyịmavara, ẹwa vị Ohomorihi amị nọ;

Mị vaa sị ụbanyịị yị wụ ẹtẹẹtẹrẹ. Wâ dà nyị ịzẹyịza kẹnẹ.

Wa raà mẹ̀ ịsa ohyozirenu ẹbanyị-ẹbanyị;

ọnị ụ ka ụ vaa mẹ̀ hụrẹ ụmọrụmọ,

avọọ ụ mẹ̀ yị va mẹ̀ ẹ nị.

2Wâ za ẹkụra ọnọọ wa sị ọ jị eburu.

Wê wu ọvọ ana jị kara ẹkụra hi ẹtẹ.

Ẹkụra azọga ana vịdị nyị ụkata ệ ta.

Ọza ọ mā vana tenyi ọ dà.

3Ọsọnị vaa mẹ ka anẹkụra ana nyị ụkata ẹ sị ụbanyịị yị wụ

Avaba anẹkụra ẹnẹ ẹ̀ yị mā vayị ọza è hí angwa awụ dị.

4Onosiye ọnịrị ọnụya nịnị ê zwe vẹ ịda awụ

dị ụ dọ wa tụ́ ịnị ụmẹ ẹngụkata ẹnịnị nị.

Wâ vi ihuhu gu wa ka asị anayịchama re oze sị ụya rị wa.

Ịrẹyị anayịchama vị ana sị mẹẹ anka opomi ana aa tụ́ kù ugene.

Aza edivi vị ana kụ ọ hana wa anka opomi avọ.

5Ịrẹyị anị ộ ngụra anka ọyị ana aa ha ngaa-ngaa.

Ama ẹwụ ẹnẹyịmavara ẹwa za wa ụvọ chire enyi nị.

Éguhi mẹẹ dàa kú ọyị, avọọ ụ mẹ dà kú aza edivi Ịjị ẹ kwẹẹtẹ ee nowu nị.

Ohomorihi ộ mẹ̀ ịsa hi ẹtẹ yị ọza anị

6Ẹnẹyịmavara Ochẹtẹẹngụ vaa mẹ̀ ịsa ozoza gụ ẹtẹ ịrẹsụ ataba dị ọ ka ọzọza ẹ̀ va rị. Ịsa ọnọọ ộ nyị eche ene zoza ẹtẹẹtẹrẹ ne beri uye ene zoza. 7Ịrẹsụ ataba ịzọọ Óhomorihi vaa yà dị ọ kụ́ ayodu kwooze yị avaba aza nị. 8#1 Ịkọ 15.54; Ẹtẹ 7.17; 21.4Ọ mā vana zẹẹ ka ọza ò sú paa Ẹnẹyịmavara ana vi ohinọyị ọ yị kụkụ vaa zẹẹ ka ọza ò re ịrẹyị orere. Ọ yị rẹ kụkụ vaa zẹẹ ka ụhị ọ̀ vana nyị aza anị ịnị ẹhẹ. Ẹnẹyịmavara kà ọnị ọ kà avọọ nị. 9Ịjị ụmẹ ọnọọ ọ̀ọ vẹ, avaba aza vaa kà a ka Ohomorihi ayị yọ. Yâ sị ayị tụra a, dị ọ dọ yị tụ́ nị. Ọnị ọ vị Ẹnẹyịmavara nị, ọnị ị sị ayị tụra nị. Ọ sị yị dọ ha; agụvị avọọ à vẹ vị yaa jẹ ịrajẹ.

Ohomorihi vaa sị ụyaa rị Animowabi

10 # Ayị 15.1—16.14; Ijer 48.1-47; Ezk 25.8-11; Emọ 2.1-3; Ịzhw 2.8-11 Ẹnẹyịmavara vee sere ataba Ịzayọnị. Ama Imowabi vị ọnị ọ vaa kụ́ ahụụ hii za ẹtẹ, dị ọ mẹ̀ ụhị nyị ọ ẹtẹẹtẹrẹ. 11Animowabi vaa gana ụvọ anka ọza ana aa mẹrị enyi avọọ. Ama Ohomorihi vaa tẹ wa tụ́ ịrẹsụ avaba ịsị e ro ka ẹnị ẹ zụ mẹ. 12Avaba ẹkụra ẹnịnị ẹnị ẹ jị ọvọ kara vi oni Ohomorihi vee wuu hi ẹtẹ saka-saka, dị ọ vara a eteesu nẹrẹ-nẹrẹ.

Currently Selected:

Ayịsaya 25: EBTP

Highlight

Copy

Compare