Ayịsaya 18

Ohomorihi vaa sị ụyaa rị Anikusi

1 # Ịzhw 2.12 Â nyị ẹkụra ana yà akẹnẹ okuha Ikusi. Ịsa ene eē hira anka akụvarịva avọọ vi ana gụ ịzọọ. Anẹkụra ọnọọ ẹ̀ nyarị iruwa.

2Ẹnịnị ệ tụ́ ọnụtụ ana ngụ ẹpa zi oze ini enyi. Ẹpa ọnọọ vị ana a sị ịkẹ mẹ, ộ rẹ ẹtẹẹtẹrẹ. Ẹwụ nịnị ọnụtụ ẹnẹẹ, varẹma ne tù anda awụ nịnị ene hi ẹkụra ene enyi gà hi. Dọ ụtụ na kà yị aza awụ nịnị ana hụ dị ẹngụ ẹnịnị swa. Avaba aza vị ene ee hí angwa ẹnịnị. Ẹnẹnị vị ana aa nyị ọyịha. Ọza ọ yị wụ́ ẹkụra ẹnịnị.

3Avaba ẹwụ nịnị ene hi ẹhẹ ọ̀ sị ụtọ pè ẹtẹ. Ịjị àa tana uyi tụ́ ẹba ịrẹsụ ataba, dị ọpanyị aa sụ́ ịrẹyị nị, ụ vaa wụ́ nịnị. 4Ẹnẹyịmavara ộ kà a mị ka aanị ọnị màa jịị jẹẹ hẹẹ ịzị ọnị yà, dị ọnị ee re anka eguhi mẹ̀ tangwa chire ịrahụ ịnị ụmẹ ọyị ama aa ha àa mẹ̀ ịsa ịnị aarẹ avọọ nị. Ọ kà dị ọnị vavọọ ee yii re ẹtẹ hẹẹ anka ọyị mẹ tangwaa ha ụmẹ ọọdụ avọọ. 5Di ò nee tù ka ododo ẹtụtụ ịvayịnị ẹ kụ́ hụrẹ, eyee vi, o di tù ka à há wa, a raà kụ́ Anikusi kwooze. Vị a vaa kụ́ waa kwooze ẹngwọọrọ-ẹngwọọrọ Anaka a mẹ̀ẹ sị ụhwọ da avọ́ ọchị ịvayịnị hwẹẹrẹ avọọ nị.

6Oku isoja Anikusi vi ana a vaa navọọ hi ẹtẹ yi inomi ọnịrị uye ịnị avị. Ẹnị inomi nịnị vaa rị pooro ịnị ọhahị, di uye ịnị avị ẹnị rẹ rị ọ pooro ịnị ịrẹsụ nị.

7Ụmẹ ọnya aa vẹ. Ịhị ọnọọ anẹkụra ana hụ, dị ẹngụ ẹnịnị swa ana avaba azaa hí angwa anị aanị vaa kụ́ ẹyịza vaa yị Ẹnẹyịmavara, Anẹkụra ọnị maa kà aanị vị ọnọyịha, ọza ọ yị wụ́ ẹkụra ẹnịnị. Okuha vị ana gà ẹkụra ẹnịnị hi. Ẹ vaa kụ́ ẹyịza ẹnẹẹ vẹ ịnị ataba ịzị a yà aa hẹkẹ Ẹnẹyịmavara Ochẹtẹẹngụ.

Currently Selected:

Ayịsaya 18: EBTP

Highlight

Copy

Compare