Ayịsaya 13

Ohomorihi vaa sị ụya rị Anibabironi

1 # Ayị 47.1-15; Ijer 50.1—51.64 Etore ịrẹyị ene vee tù Anibabironi ọnị Ohomorihi sị zụ Ayịsaya ozi Amozi yị.

2Nọ ịrẹsụ ataba ẹnẹ ẹ̀ yị nyị ọchị. Wèe tù ịzọọ dị wa kụ̀rà uyi tụ́ ẹba ka ịrẹkụ o si tù. Nowu, di we mi ụvọ hị́ isoja ka ẹ̀ ngụ tù anẹkụra ẹnẹẹ ana aā vavọọ mẹ eyi. 3Ẹnẹyịmavara ọ raà hị́ isoja anị ka ẹ̀ na sị ụya rị aza ọnị ịrẹyị anị aa kụ́ ọnị ayị. Ezirẹkụ ẹnẹẹ vị ana vaa jẹ ka Ananyị yị ọ sị ọnịvị anị huna.

4Batọ wáā wụ́ aza màa kụ́ ịrẹka ịnị ataba. Ịrẹka ọnọọ ộ sị zụ̀ ka ẹnịnị ệ rụrụ ẹtẹẹtẹrẹ ana hụrẹ ẹkụra irenyi-irenyi va gụ. Ẹnẹyịmavara Ochẹtẹẹngụ aa hara isojaa gụ. 5Ezirẹkụ ẹnẹẹ vị ana hụrẹ avaba ẹhẹ vẹ. Ẹnẹyịmavara vaa kụ́ ịrẹkụụ vẹ dị ọ sị va wụ̀ avaba anẹkụra ẹnẹẹ. 6#Ijow 1.15Tụ́ ụvọ kú ịrẹsụ wee nowu ka ẹkụhị ẹnẹ Ẹnẹyịmavara Ochẹtẹẹngụ vaa sị wụ̀ azaa ha o si tù. 7Nyị ịsị ọza ọnyị-ọnyị va zụụ mẹ, angwahi vị ana vaa ngụ avaba aza ẹngụ. 8Ẹngụ ẹnịnị vaa sụ ẹgahị. Ụya vaa rị wa di eyee nowu anka ọnẹẹ ana aa barẹẹ avọọ. Ayị vaa hụrẹ ọzọza ịnẹ di eyi ẹnịnị ee vi ịra. Dị ẹnịnị hi ẹtẹ ee re ẹngụ kẹnẹ. 9Ẹkụhị Ẹnẹyịmavara aa vẹ. Ẹkụhị ọnị ọ vaa sị kụ́ ayịị hi aza. Ẹkụhị odivi ịhị ọnọọ vaa vị nị. Ịhị ọnọọ Ohomorihi vaa wụ̀ ọnịvị nịnị vaa ha, dị ọ tụ́ ẹtẹ ọnọọ osusu. 10#Ezk 32.7; Imt 24.29; Ịmk 13.24,25; Irk 21.25; Ẹtẹ 6.12,13; 8.12Avaba ụzọmị ene hi ẹbẹẹba ẹ yị kụkụ vaa zẹtẹ. Ọ yị ana hụrẹ vi ene vee hozi, dị ụhwẹ ọ yị zẹtẹ. 11Ananyị yị vaa sị ụyaa rị anẹhẹ agụvị ebira odivi ẹnịnị. Ọ vaa sị ụyaa rị aza edivi agụvị ebira odivi ẹnị ẹ yaa mẹ. Aza ẹnyị vi ene ee wù, dị ẹ yaa me eyii zị, dị ẹ rẹ yaa chamayịị yị ọza. Avaba ẹngụ ẹnẹẹ vị ọnị Ohomorihi vaa tẹ. 12Aza vaa zwọ huna igooru obooro ene hi Ohwiri mẹ̀ zwọ avọọ.

13Ẹnẹyịmavara Ochẹtẹẹngụ vaa kụ́ ayịị hi anẹhẹ ẹnẹmẹhị. Ọyịkụ anị vaa mẹ ka ẹbẹẹba ò henyi, dị ẹhẹ ọnị re henyi di o jesi hụrẹ udi anị. 14Azọga ene hi Ịbabịrọnị vee zwee nọ eehi ẹnịnị. Ẹnịnị vị ana vaa sị mẹẹ anka atẹmẹ ẹnẹ ẹ̀ yị nyị ọza ana si eyi pè e nị. 15Avaba aza ana aa za, dị a ká a ụhwọ, dị o sú. 16Aanị ẹ màa jẹẹ dị a za ezi ẹnịnị eyi ẹnịnị, di aa jị waa kú ịsa dị a wụ̀ wa nị. Ẹnya ini irehi ẹnịnị vị ana a vaa kụ́, di a za ose ẹnịnị di ee pè waa sụ éyi ẹnịnị.

17Ẹnẹyịmavara vaa tụ́ Animediya ịrẹyị tù wa. Ẹ yị nyị ịzị ịrẹyị ẹkẹhị ọnị gẹ Animediya. 18Ezwọọmụha vi eni e vee che ọpa. Ẹnịnị ẹ yị vaa vayị ozweyi vụrụ-vụrụ. 19#Oyn 19.24Wâ yẹ ka ẹkụra Ịbabịrọnị o zoza hu keekere nị. Anịzọọ vị ana aā sịị mẹ eyi. Ama Ohomorihi vee vú ọ ẹtẹ anka o mè vu Isodọmị ọnịrị Igomora ẹtẹ avọọ. 20Aza ẹ mā vana ra ịzọọ pooro. A mā a vana nyị Anarabi ana aa ngụ ọ zizi ana vaa kụ̀ udii tụ́ ịzọọ. Aza ana aa kụ́ ịsụpaa rị ẹ yị hyakụ vaa kụ́ ịsụpa ẹnịnịị nọ ịzọọ. 21#Ayị 34.14; Ịzhw 2.14; Ẹtẹ 18.2Uye ịnị ụnọmị e venee hi ịzọọ nị. Ọdụmị, ogugu ọnịrị akọnọ e vee hi ini eehi ịzọọ, di eyee jii ngụ ịzọọ zị nị. 22Ọdụmị ọnịrị uye edivi vi ene vee hi ini irehi ẹbanyị-ẹbanyị ịyẹẹyẹ di eyee nowuu ngụ ịzọọ zị. Ụmẹ ọkarẹyị Ịbabịrọnị o si tù, ẹkụhị anị ọ yị kuku noze.

Currently Selected:

Ayịsaya 13: EBTP

Highlight

Copy

Compare