Ayịsaya 10

1Ẹwụ nịnị ana aa mẹ ọda irikichi, dị waa mẹ ọda ka wa sị vaya ọza, wa sị dà nịnị. 2Waa mẹ ọda nịnị ka wa sị mẹ ehuna yị onosiye nịnị. Waa mẹ irikichi tụ́ ịnị ịrẹyị aza amị ana aza aa mẹ ẹchakaa yị. Ịsị osoku ọnịrị ozi oku ẹ̀ẹ vụrị nyị dị ụ dọ wa nịnị. Ịhị Ohomorihi àaa sị ụyaa rị wụ nịnị, dị ọ kụ́ ịrẹyị hụrẹ aha ẹnẹẹnẹ ve tù wu nịnị nị, 3sị ụ vaa mẹ nịnị ịhị ọnọọ? Eni u vee zwe nee tù ka ọ̀ gụ wụ nịnị ụvọ? Mị ka ịzị ụ vaa kụ́ ogu awụ nịnị nee hi ịhị ọnọọ? 4Aza ẹnyị awụ nịnị vi ene vee sú ịnị ịrẹkụ à yị vi avọọ dị a za wa ọrịhị nọ ẹkụra ọsa. Wàa daka maanị rị rị ụya nịnị, Ẹnẹyịmavara ọ yị vị vaa vàa hụụnị ọyịkụ anị. Vị aa tịị tana ụvọ za wụ nịnị nị.

Ohomorihi rẹ vaa mẹ̀ ọkarẹyị yị Anasiriya

5 # Ayị 14.24-27; Ịna 1.1—3.19; Ịzhw 2.13-15 Anasiriya nịnị ẹ sị dà. Ayị màa kụ mị mâ sị wa mẹ inori 6ka me si tụ́ aza ẹnẹ ẹ̀ yẹ ẹmị Ohomorihi. Mâ tụ́ wa ka ẹ̀ na kụ́ ogu aza ana mẹ ayị kụ́ mị. Mị ka ẹ̀ na vara wa eteesu dị ẹ̀ẹ kụ́ ahụụ hi wa ini orere. 7Ama ịsị ẹ nyị tụ́ ịnị ayị vị irenyi. Ịsị ẹ yà ịnị ayị ẹnịnị ọ vị ka ẹ̀ na wụ̀ wa va ha, di è vú anẹkụra ọrụrụ-ọrụrụ ẹtẹ nị. 8Eyee wo oto, ẹ ka avaba ọga ịrẹkụ ẹnịnị vi ohinọyị. 9Ẹ rẹ ka ẹnị mè huna Ikakemisi ịnị ẹtẹ Aripadi nị. Ẹ ka ẹnị ệ kụ́ ịrẹkụ na rị anẹkụra Ịsamarịya ọnịrị Ịdamasịkọsị.

10Ẹ ka ẹnị ệ tana ụvọ za anẹkụra ana ahịka ệ nyị ori irenyi-irenyi, di ori ẹnịnị hyakụ rụrụ huna ori Anijerusarẹmị ọnịrị ori Anịsamarịya. 11Ẹ rẹ ka ẹnị ệ sị Isamariya ọnịrị ori anị vú ẹtẹ, avọọ ẹnị mè ree yi vú Ijerusarẹmị ọnịrị ori anị ẹtẹ nị. 12Ama Ananyị yị ọnị ka ọnị ọ̀ọ sị ịsị ọnị ka ọnị aa mẹ mẹ hụrẹ ụvọ ịnị ataba ọnịrị Ijerusarẹmị, ọnị vaa sị ụyaa rị Anasiriya, agụvị irenu ẹnị ẹ vavọọ aa nyị, dị ẹ rẹ yaa mẹ eyi avọọ.

13Anasiriya aa kà a ka ụkata ẹngụ ẹnịnị ọnịrị ịrẹyọyẹ ẹngụ ẹnịnị ẹnị vavọọ sị nyị ehuna ẹkụra nị. Ẹ ka ẹnị ẹ nyị ụkata ẹnị ẹnị sị za ohinọyị anẹkụra dị ẹnị kụ́ ogu ẹnịnị nị. 14Ẹ ka anẹkụra vị ana sị mẹẹ anka ịrẹngwẹ inomi avọọ. Ẹnị ệ kụ́ ogu ẹnịnị anka a mẹẹ̄ kụ́ ajẹ inomi hụụnị ịrẹngwẹ hwẹẹrẹ avọọ. Ẹ ka ẹ yị nyị ọza ana nyayịnẹ kụ̀rà ụvọ à vị ka dị ọ̀ ha irenu ka sị ẹ vẹ.

15Dị Ẹnẹyịmavara ve họ̀ use dị ọ̀ ka vị ịraga wáá rẹẹ kà a ka ọnị ọ nyị ụkata huna aza ana aa sị ọnịị dà ọchị nị? À vị ànyụ vaa kà a ka oni o kuku huna ọza ana aa sị ọnịị yẹrẹ ọchị nị? O re họ̀ use ka okutẹ óó chema ọza anị, ò vị ọza óó chema okutẹ nị? 16Agụvị irenu ẹnị ẹ maanị nyị aanị, Ẹnẹyịmavara Ochẹtẹẹngụ vaa sị ụkụ za isoja ẹnịnị ana ta dẹngụ. Ẹngụ ẹnịnị vaa ka ịra anka ịra ana ka dị a za giri-giri avọọ 17Ohomorihi Anisirẹrị ana vị ọnịnị vaa vara ịra dị aa za giri-giri. Ịnị ẹkụhị ọnya ọ vaa za avaba avị ẹhịmị dị ọ rị wa ịra va ha nị. 18Anka ụkụ odivi mèe du ọzaa ha avọọ, avọọ ọ́ mẹ̀ vaa rị iriku ẹbanyị-ẹbanyị ọnịrị aarẹ ịra ha saka-saka nị. 19Ọchị sẹẹrẹ aanị ọ kụkụ vaa vọ tụ́ ini iriku anị nị. Ezweyi hyakụ vaa zụụ za a ịrịka.

Anisirẹrị ana vọ vaa vàa ka Ohomorihi vẹ

20Ụmẹ aa vẹ ana ahịka Anisirẹrị ana vọ ẹ yị kụkụ vaa sị ayị tụra anẹkụra ana vịdị ka ẹnị aa wụ waa ha. 21Ẹnịnị vị ana kụkụ vaa sị ayị tụra Ẹnẹyịmavara, ana vị Ohomorihi ọnịnị Anisirẹrị. 22#Iro 9.27Anisirẹrị ana vọ vaa vaa vẹ ịda Ohomorihi ana nyị ụkata. Ịzẹyịza Anisirẹrị ệ rụrụ anka ààrẹ ụtọ ókụ̄, ama aza chee ana vọ ẹ vaa vaa vẹ nị. Ebira ẹnị ẹ mẹ vị ana a vọrọ ka à sị wụ̀ wa ha, ụya ọnọọ vị ana tịtẹ ee zi wa.

23Ananyị yị Ẹnẹyịmavara Ochẹtẹẹngụ ọ sị ọ kà ka vị a vaa wụ̀ avaba ẹnịnịị ha nị. Ẹ yị nyị ịsị aa vara ka ẹ yị vị avọọ ọ mẹ̀ vị vaa mẹ wa.

Ohomorihi vaa sị ụyaa rị Anasiriya

24Ini oze ịrẹyị Anasiriya ọnị mị vịdị aa kà ịjọọ, Ananyị yị Ẹnẹyịmavara Ochẹtẹẹngụ ộ kà ịrẹyị ịnị ịpa ẹnịnị. Ọ kà asị ẹwụ nịnị aza anị ene hi hí angwa Anasiriya nịnị ana kụ́ okutẹ tụ́ wu nịnị anka Anijipiti mẹ̀ mẹ avọọ. 25Ohomorihi ka ọnị aa vaa za ụvọọ jẹẹ dị ọnị ọ yị kụkụ sị ụya rị wụ nịnị. Ama ọnị vaa tana ụvọọ za Anasiriya ẹtẹẹtẹrẹ. 26Ẹnẹyịmavara Ochẹtẹẹngụ vee tụ́ wa ịjapa anka ọ mẹ̀ sị ụya rị Animidiya ịnị anị ịnị ịda ana aā hị́ Orebi. Ọ rẹ vaa sị okutẹ anịị mẹ̀ ụkọrọ ịvọpa anka ọ́ mẹ̀ mẹ tụ́ ịrẹsụ enyi Anijipiti ịnị anị. 27Ịjị ụmẹ ọnọọ òo si tù, ọ ka ọnị vaa dọ wụ nịnị tịtẹ hụụnị ụvọ Anasiriya, dị ọnị tụ̀ ọkẹẹkẹrẹ ẹnịnịị hụrẹ wụ ọrọkọ. Ọ kà avaba ẹnya ene e kune tụra wụ nịnị vị ọnị ọnị aa dọ vaa ha.

Ịzị ịrẹkụ Anasiriya va zịị vẹ

28Anasiriya ẹ sị ngụ Ayị, ozi Imigironi ẹ, zị para hu nị. Ẹnya ẹnịnị vị ẹnẹ ẹ kụ́ tẹ Ímikimasi. Ệ zị oze ini òsusùụ́, dị ẹ ka ẹnị vaa sụ Ígeba nị. 29Anirama aa dá ẹgahị ángwa m èe hí wa. Anigibiya ana vị ẹkụra Ịsọọrụ ene kú zwe. 30Weē nowu nịnị ẹwụ nịnị Igarimi. Ẹwụ nịnị Anirayisa ẹ sị ụtọ pe ẹtẹ, dị ẹwụ nịnị Ananatotu ọ̀ ba wa owu.

31Animadimena e kú zwe, Anigebimi ẹnị e kú zwe na tẹ̀ 32Ọnịvị nịnị ẹ va sị ngụ ẹkụra Inobi ajịnị, eyee che ọpẹẹ hi ataba ana yà Ijerusarẹmị.

33Ẹnẹyịmavara Ochẹtẹẹngụ vee ne wa naa nya ẹtẹ anka avọ́ ọchị ana a dà mẹ̀ naa nya ẹtẹ avọọ. Aza ana aa mẹ eyii hu ịnị ẹnịnị ọnịrị ohirẹsụ ẹnịnị vị oni Ohomorihi vee hú ẹtẹ dị ọ tẹ ẹ. 34Wâ yẹ ọchị ana a sị ịraga dà mẹ̀ẹ ma nya ẹtẹ ini iriku avọọ, ẹngụ ọchị ẹbanyị ene hi ini iriku Ịrẹbanọnị m maa kà nị. Avọọ Ẹnẹyịmavara mẹ̀ vaa ma waa nya ẹtẹ nị.

Currently Selected:

Ayịsaya 10: EBTP

Highlight

Copy

Compare