Ihoseya 7

Anisirẹrị nịnị e sì ịrẹyị ebira odivi

1Ẹnẹyịmavara kà ọnị e si ka ọnị ọ mẹ̀ Anisirẹrị nịnị ụkụ ama ebira odivi Anehwireemi nịnị ẹ yị tẹ̀. Anịsamarịya nịnị vị ana kụ ụvọ chire ịsa odivi. E yee cheeche, dị ẹ yaa chaka irehi ọza kụ ẹnya anị, di e hi oze aa mẹ̀ ako nị. 2Ama ẹnịnị ẹ yị ro ka Ẹnẹyịmavara ee re avaba ebira odivi ẹnịnị. Ee re ịvị mẹ jị ọvọ kara wa hi. 3Ebira odivi ẹnịnị vị ene hine ohinọyị ayị, di ireche ẹnịnị vị ayohine ọdọvịdị nịnị nị. 4Avaba ẹnịnị vị anaa sẹ̀ ịrẹka. Ịrẹkọyịsẹ vị ana jị odo tụ wa ẹngụ anka arasị mẹẹ̄ ngwụra zi ịbụrẹdị ana jị avọọ. 5Ịnị ụmẹ ana aa nyị ohinọyị, ọdọvịdị nịnị vị eneē hu eche dị aa mẹrị wa, dị ohinọyị saasa aza ana sị ọ mẹ̀ enyinyii hu eche. 6Ọyịkụ ẹnịnị sị mẹ anka ịra ana sị avaba ịrahụ za, dị akịna anị banyị hu avọọ ịnị ẹnẹnẹ eyinẹhẹ anị. 7Ẹnịnị sị mẹẹ anka ịra anaa rị ọdọvịdị ẹnịnị avọọ, dị ẹ yị ọza ana vọrọ ka o na owu na za Ẹnẹyịmavara kà ọ gụ wa ụvọ avọọ nị. 8Anehwireemi nịnị ẹ̀ raà kụ ẹngụ vahụra anikinami nịnị. Ẹnịnị sị mẹ anka Ịbụrẹẹdị ọnị ọza ẹ yị vara ana rị ịra eyi ụkụha ọnya avọọ nị. 9Ẹnịnị ẹ yị yẹ ka anikinami ẹnẹẹ ẹ raà tụ ẹnị ọkụmị. Ịrẹsụ ẹnịnị ẹ̀ ta vị ẹwẹwa, ama ẹnịnị ẹ yị yẹ ka ẹnị ẹ yị kụkụ nyị ụkata. 10Ka ẹnịnị aa sị ẹngụ tụ ẹba, ẹnịnị ẹ yị varẹma ne tu Ẹnẹyịmavara Ohomorihi ẹnịnị ịnị ụmẹ ọnị ịrẹyị sị tụ́ wa.

Anisirẹrị ẹ sị ayị tụra Anẹkụra ana vọ

11Anehwireemi nịnị sị mẹẹ anka arivadi avọọ nị. Ẹnịnị ẹ yị yẹ ịrẹyị, ọ yị tụ́ akanya dị ọza o vene wa, avọọ ẹ yaa hị́ Anigipiti, di e yee ne tụ́ Anasiriya nị. 12Ẹnẹyịmavara kà ọnị vaa za wa anka ịrẹpa mẹẹ za inomi ịnị ahị avọọ. Ọnị vaa sị ụya rị wa anka enube ẹnịnị ana kà ịnị ịragụ. 13Ka ẹnịnị e yi ọnị tịtẹ o vee du wa ku nị. E vee su agụvị ka ệ mẹ̀ akamawụ hi ọnị. Ọnị yaanị dọ wa ha ama e yee cheeche kú ọnị. 14Ẹnẹyịmavara kà ẹnịnị ẹ yị sị ayị ọnya na owu hi ọnị ẹngụ. E hi ịrẹsụ ode ẹnịnị aa jị òrèrè kẹnẹ nị. Ẹnịnị vị anaa sị ịsa na ẹngụ ẹnịnị yị ori anikinami ka ẹ mẹ̀ ịsa ịnị aarẹ nịnị zoza, dị ẹnị ẹ nyị akụ ọnịrị eche. 15Ẹnẹyịmavara kà ọnị ọ zụ wa ịsa dị ẹ va yẹ nị. Ọnị ọ mẹ̀ ka ẹnịnị ẹ nyị ụkata ama di e yee geyi odivi anị nị. 16Ẹnịnị e yi si ọgụvọ hụrị ẹbẹẹba ịda Ẹnẹyịmavara. Ẹnịnị sị mẹẹ anka ọkịta ana rara enee zụ che ịsa avọọ nị. Ọnịvị ẹnịnị ẹ vaa wụ́ ọdọvịdị ẹnịnị ha nị.

Currently Selected:

Ihoseya 7: EBTP

Highlight

Copy

Compare