Ẹzịra 7

Ẹzịra ộ vẹ Ijerusarẹmị

1Ịrẹma ịsa ẹnẹnị, ọnọrụ ọnya ana a hị́ Atazazasisi va vị ohinọyị Ipesiya nị. Ịnị ụmẹ anị Ẹzịra hụrẹ Ịbabịrọnị vẹ Ijerusarẹmị nị. Ẹzịra ọnọnị vị ozi Iseraya ọnị ada anị vị Azarịya, ozi Ihirikaya, 2ozi Isarumi, ozi Ịzadọkị, ozi Ahitubi, 3ozi Amarịya, ozi Azariya, ozi Imerayoti, 4ozi Izerahiya, ozi Uzi, ozi Ibuki, 5ozi Abisuwa, ozi Ihwinehasi, ozi Eriyaza, ozi Eerọnị ohirẹsụ ọbanyị irehi Ohomorihi. 6Ẹzịra vị ọka ana zụ ọza ọda ọnị Ẹnẹyịmavara Ohomorihi Anisirẹrị sị yị Imosiisi. Ẹnẹyịmavara ọ mẹ ka ohinọyị o sì ịrẹyị Ẹzịra, dị ọ sị ịsa tụra ịsa ọnị Ẹzịra họ̀ use anị yị ọ nị. 7Ịnị ịrayị ana tu ọ ịrayị, ịhịmba ọnị Atazazasisi sị rị ohinọyị, Aniju ẹnyị ẹnịrị ohirẹsụ irehi Ohomorihi nịnị, Anireevi nịnị, ọjahẹ nịnị, neberi oserẹtẹ ịnị irehi Ohomorihi nịnị sị wara saasa Ẹzịra vẹ Ijerusarẹmị nị. 8Ẹzịra ọ ngụ Ijerusarẹmị ịnị ụhwẹ ọhụhị ịrayị ịhịmba ọnị Atazazasisi sị rị ohinọyị. 9Ộ kwẹẹtẹ hụrẹ Ịbabịrọnị ịnị ẹkụhị ịpaapa ịnị ụhwẹ ịpaapa ịrayị, dị Ohomorihi gụ ọ ụvọ, dị ọ na ngụ Ijerusarẹmị ịnị ẹkụhị ịpaapa ịnị ụhwẹ ọhụhị nị. 10Ẹzịra vị ana sị avaba ẹngụ anị yị ọyịkọsẹ ọda Ẹnẹyịmavara, dị a saasa a, dị ọ raa sị ọ zụ aza ana vọ nị.

Atazazasisi ộ sị iwe yị Ẹzịra

11Ẹzịra vị ohirẹsụ ọbanyị irehi Ohomorihi, dị ọ vị ọka ịnị ịrẹyị ọda ọnị Ẹnẹyịmavara sị yị Anisirẹrị nị. Ẹkụhị ọnya, Atazazasisi ohinọyị chẹrẹ iwe tụ hi ọ nị. Dị ọ ka, 12Tangwa o Ẹzịra, ohirẹsụ irehi Ohomorihi, ọka ana zụ ọza ịrẹyị Ohomorihi ana nyị ẹbẹẹba. 13Ọ kà, ọnị ọ sị oze yị Anisirẹrị ọnyọọnyị, ọ daka vị ohirẹsụ irehi Ohomorihi, ọ vị Anireevi nịnị ene e si ka ọnị ọ̀ saasa a nọ Ijerusarẹmị, 14Ohinọyị ọnịrị anajuwe anị ịhịmba ka Ẹzịra ọ nọ Ijerusarẹmị ọnịrị Ijuda nee re aza ene hi ịzọọ àa saasa ọda Ohomorihi ana a sị chire ụvọ. 15Dị ọ ka ọnịrị Anajuwe anị ẹ sị igooru ọnịrị isiriva yị Ohomorihi Anisirẹrị ọnị irehi anị ya Ijerusarẹmị. 16Dị ọ ka Ẹzịra ọ kụ avaba isiriva (ẹkẹhị) ọnịrị Igooru ọnị oo re ẹtẹ Ịbabịrọnị neberi ẹyịza ọnị ọ dọ huu nị ụvọ aza ọnịrị ohirẹsụ irehi Ohomorihi nịnị. Ẹzịra ọ kụ wa na mẹ̀ ụkọrọ irehi Ohomorihi ana ya Ijerusarẹmị. 17Dị ọ ka ọ̀ tangwa sịị ẹkẹhị ọnọọ hị́ imaaru, ịdẹba, atẹmẹ ịsọyịrị ọnịrị eche ọyị sị mẹ̀ ịsọvọ ịrẹsụ ụta Ohomorihi ịnị irehi anị Ijerusarẹmị. 18Dị ọ sị ẹkẹhị ana vọ mẹ̀ ịsa ana ngụ Ohomorihi eyi. 19Ọ kụ avaba ẹnya ana a kụ vẹ ka a sị mẹ̀ ụkọrọ ini irehi Ohomorihi vẹ ọvịdị Ohomorihi. 20Dị ọ ka, àa nyị ịsa ọnị ee si agụvị ụkọrọ irehi Ohomorihi, ọ na dọ ọ hụụ ịzị aā kụ ẹnya tẹ̀ ịdị Ohinọyị nị. 21Dị Atazazasisi mẹ ọda ka avaba aza anaā sịị ẹkẹhị ịjọvaa tẹ nịnị ene hi akẹnẹ irehu Iyuhwuretisi ẹ̀ sị ịsị ọnị Ẹzịra ọ̀ọ họ̀ use anịị yị ọ nị. 22Dị ọ rẹ sị oze yị wa ka ẹ̀ dọ isiriva ịka akahị-akahị oze ịhịmba tụra akavarẹchẹhị (7,500); ihwiti orogo akavarẹchẹhị (500), eche ịgarụwa akavarẹchẹhị tụra ẹvarẹwụ ọ tụra ẹẹhị ọnịrị angwẹ orivi ịka akavarẹchẹhị tụra ẹvarẹwụ, beri anọ ọnị ẹnịnị èe yee sì. 23Dị ọ ka ịsa tụra ịsa oni Ohomorihi ana nyị ẹbẹẹba èee si ịnị irehi anị, à sị yị ọ agụvị asị ọ kụ ayị hị́ ọnị avị ezi ịrẹma anị. 24Dị ohinọyị kà a yị ọ ka, asị a nyị ụmẹ ọnị ohirẹsụ irehi Ohomorihi, Anireevi, ọjahẹ nịnị, oserẹtẹ, ọnịrị Anụkọrọ irehi Ohomorihi sị su ụta ẹkẹhị irehi. 25Dị Atazazasisi rẹ ka, “Ẹzịra ọ sị ịrẹyọyẹ ọnị Ohomorihi sị yị ọ nyị ọdọvịdị ọnụkọrọ ana vaa mẹ ịjọva ẹtẹ ọnọọ nị. Dị aza ẹnẹẹ ẹ̀ vị aza ana yẹ ọda Ohomorihi dị ẹ zụ zụ ọ yị aza ana vọ. 26Ọ kà à sị ụya rị ọza tụra ọza ana àa mẹ akamawụ hi ịrẹyị Ẹnẹyịmavara ọnịrị ọda ohinọyị. À wụ̀ wa, ẹ̀ yị vị avọọ à dụ wa hụụnị ẹkụra, àa vị ka à dọ wa ogu ẹnịnị, ẹ̀ yị vị avọọ à jị wa ẹngwa.” 27Dị Ẹzịra ka, ọnị ộ sị ụga yị Ẹnẹyịmavara, Ohomorihi ohiku ẹnịnị ana mẹ ka ohinọyị ọ̀ maanị sị ụbanyị yị irehi Ẹnẹyịmavara Ohomorihi ana ya Ijerusarẹmị nị. 28Ọ kà, Ẹnẹyịmavara, Ohomorihi ọ raa gu ọnị ụvọ, dị ọ mẹ ka Ohinọyị ọnịrị Anajuwe anị nịnị ẹ̀ ngụ ayị anị nị. Ộ mẹ ka ọnị ọ̀ kụ ọrụrụ-ọrụrụ ọdọvịdị Aniju nịnị vavẹ Ijerusarẹmị.

Currently Selected:

Ẹzịra 7: EBTP

Highlight

Copy

Compare