Ẹzịra 1

Ịsayịrọsị ộ navọ Aniju ka ẹ varẹma na eehi ẹnịnị

1 # Ijer 25.11; 29.10 Â nyị ụmẹ ọnya aanị ọnị ọnọrụ ọnya ana aa hị́ Ịsayịrọsị sị vị ohinọyị Ipesiya. Ịnị ịrayị ịpaapa ọnị ọ rị ohinọyị, Ẹnẹyịmavara ộ mẹ̀ ka ịrẹyị anị ọnị Ijeremaya vịdị ka yị Anisirẹrị ọ sẹ. Ẹnẹyịmavara ộ kụ́ hi Ịsayịrọsị ayị ka, ọ mẹ̀ ọda, dị aa chẹrẹ ẹ tịtẹ, dị aa nọ̀ ọ ịnị avaba ẹtẹ anị nị. 2#Ayị 44.28Ịzẹyịza, dị Ịsayịrọsị ka Ẹnẹyịmavara, Ohomorihi ana nyị ẹbẹẹba ọ raà sị ịjọva avaba ẹhẹ chire ọnị ụvọ. Dị ọ nyị ọnị ka ọnị ọ da irehi anị tụ Ijerusarẹmị ịnị ẹtẹ Ijuda nị. 3Ịsayịrọsị ộ mẹ̀ aduwa ka Ohomorihi ọ̀ ya pe avaba aza anị Anisirẹrị. Ọ kà ẹnẹnị ẹ́ nọ Ijerusarẹmị na da irehi Ẹnẹyịmavara ana vị Ohomorihi ẹnịnị nị. Ịzọọ a va yaa hẹkẹ ẹ nị. 4Àa nyị aza Ẹnẹyịmavara ene hi Ipesiya ene ee sì ọgụvọ, aza ẹnị ẹnịrị wa ra ẹ̀ mẹ yị wa. Ẹ sị ẹkẹhị ọnịrị ịsọyịrị ne beri ịsụpa ọnịrị ẹyịza ọnị ẹ vaa sị nọ ini irehi Ẹnẹyịmavara ana ya Ijerusarẹmị. 5Dị Ẹnẹyịmavara kụ́ hi Anisirẹrị ọrụrụ-ọrụrụ ayị ka ẹ̀ nọ Ijerusarẹmị na tenyi irehi Ẹnẹyịmavara ana ya ịzọọ. Dị avaba ohirẹsụ irehi Ohomorihi nịnị ọnịrị Anireevi ne beri avaba ọdọvịdị ịrẹsụ-ịrẹsụ ene hi Ijuda ọnịrị Ịbẹnjamịnị kwẹẹtẹ ka ẹnị a nọ Ijerusarẹmị nị. 6Ịzẹyịza, dị aza tụ́ ẹnya isiriva ọnịrị igooru, dị ẹ kụ́ ịsọyịrị ọnịrị ịsụpa yị wa nị. Dị ẹ varẹma kụ ẹnya ọkatarihi ọnịrị ẹyịza ọnị ẹ vaa nọ irehi Ẹnẹyịmavara tụ́ ọ yị wa nị. 7Dị Ịsayịrọsị ụvọta anị kụ́ avaba ogu ọnị Inebukadineza vịdị kụ́ hụrẹ ịnị irehi Ẹnẹyịmavara Ijerusarẹmị na tụ́ ịnị irehi ori anị yị wa nị. 8Dị Ịsayịrọsị hụrị ẹnya ẹnẹẹ ụvọ yị Imitiredati ana vị ọsẹkẹhịtẹ ẹtẹ Ipesiya ana za ẹnya ẹnẹẹ ịrịka yị Isesibaza, Ịgọvọnọ ẹtẹ Ijuda nị. 9Ẹnya ọnị Ịsayịrọsị kụ́ yị Aniju nịnị vị ẹnya igooru ẹbanyị-ẹbanyị ohurẹẹwụ (30), ẹnya isiriva ẹbanyị-ẹbanyị akahị (1,000), ẹnya ana vọ vị ohurịhịịna (29). 10Ẹnya igooru ohurẹẹwụ (30) ẹnya isiriva akava tụra ẹẹwụ (410) ẹnya ana vọ, akahị (1,000). 11Avaba ẹnya igooru ọnịrị isiriva ana a varẹma yị Isesibaza vẹ Ijerusarẹmị vị achuchu ọnya (5,400) tụra akahị beri akava.

Currently Selected:

Ẹzịra 1: EBTP

Highlight

Copy

Compare