Ezikẹẹrị 6

Ẹnẹyịmavara ộ jị ịvị yị aza anaa mẹ ori

1Ezikẹẹrị ka Ẹnẹyịmavara ộ kà a yị ọnị ka, 2Ọnị ozi-ọza, ọ̀ na và eyi ka avaba ataba ene hi ẹtẹ Isirẹrị dị ọnị ọ̀ kà a yị wa ka 3ẹwụ nịnị ataba ene hi Isirẹrị ọ̀ wụ́ ịrẹyị Ẹnẹyịmavara Ohomorihi. Ọ kà ọnị ọ̀ kà a yị ẹnị ataba ọnịrị inozi nịnị ka, ọnị Ẹnẹyịmavara vaa mẹ ka à kụ́ ịrẹkụ ve du ịzị aza vaa mẹ ori ịnị ẹnịnịị ha. 4Ụta ene e hi hi ịzọọ anaa mẹ̀ ịsọvọ ịnị anị ọnịrị anaa rị eturare ịra ịnị anị vị ene e vee wúu ha. Ọnị vaa wụ̀ avaba aza ene hi ịzọọ ha ọvịdị ori ẹnịnị. 5Ọ kà oku Anisirẹrị nịnị vị ọnị ọnị vaa kụụ hi ẹtẹ ọvịdị ori ẹnịnị, dị ọnị gara ẹchụkụ ẹnịnị kara ụta ori ẹnịnị. 6Avaba ẹkụra ene hi ẹtẹ Isirẹrị ọnịrị avaba aha ẹnẹ ẹyaa mẹ ori vị ene e vee vú ẹtẹ. Avaba ụta ọnị Ụ mẹ ịsọvọ ịnị anị nịnị ọnịrị ụta ọnị ụ rị eturare ịra ịnị anị nịnị vị ana a vaa garaa ha. Ori awụ nịnị vị ana a va chakaa vaaha, dị avaba ịsị ọnị ụ mẹ jẹẹ nịnị ta samị-samị. 7Aza vị ana á vaa wụ̀ avaba aha; ịjọnọọ aza ana vọ vaa dọ ka ọnị ọ vị Ẹnẹyịmavara nị. 8Ẹnẹyịmavara kà ọnị vaa navọ aza ẹnyị ka asị á wụ̀ wa, Ẹnị ẹnẹẹ vị ana a vaa garaa hi avaba ẹkụra ọsa. Ịjị aa vavọọ sị wa gara hị́ ẹkụra ọsa, dị a za wa ọrịhị hi ịzọọ. 9Ẹnị ẹnẹẹ vaa yà ẹkụra ana a za wa ọrịhị hị́ dị ẹyaa tamayị anị ka, agụvị ka ẹnị ẹ́ yị sị ayị yị ọnịnya, ẹnị aa dụ orii zị, ọnị maanị sị sị ụya rị ẹnị, dị ọnị mẹ̀ ụhị nyị ẹnị nị. Ịhyẹrẹ ẹngụ ẹnịnị vaa nyị ẹnị ụvọta agụvị avaba ịsị edivi ẹnẹ ẹnị mẹ, ana kụkụ vị ụhị yị ẹnị booro anị. 10Anisirẹrị nịnị vaa yẹ ka, ọnị ọ vị Ẹnẹyịmavara nị. Ẹ vaa yẹ ka ẹ́ yị vị oto ọọhẹ ọnị ee wo ka ọnị vaa sị ụya odivi ọnọnịị rị ẹnị. 11Ẹnẹyịmavara Ohomorihi ka, ẹwụ nịnị Anisirẹrị ọọ kụ̀rà ụvọ, dị waa jị ahụụ kụ ẹtẹ nịnị. We nowu nịnị ka oogwoo! agụvị ịsị edivi anaa nyị ọnị ịhyẹrẹ ana Ansirẹrị nịnị mẹ. A vaa kụ́ ịrẹkụ vaa wụ̀ wa, ụngwẹ ọ vaa wụ̀ aza ẹnyị, dị ụkụ wụ̀ aza ẹnyị ẹnịnị nị. 12Aza ene hi aha onoze vị ọnị ụkụ vaa wụ̀. Aza ana gụrị ẹtẹ vị ana a vaa kụ́ ịrẹkụ vaa wụ̀, dị ụngwẹ wụ̀ aza ana vẹtẹ. 13Ọ kà oku ẹnịnị vaa gwẹtẹ pe ori ẹnịnị; dị ẹ gwẹtẹ kara ụta ẹnẹ ẹẹ mẹ̀ ịsọvọ ịnị anị. Avọọ ọ́ mẹ vaa yà ịnị avaba ịrẹsụ ataba, ọnịrị iruvo avaba ọchị ohwoohu beri iruvo ọchị ẹbanyị-ẹbanyị avaba aha ẹnẹ ẹyaā sị ịsa ana agụ anị hinee mẹ ịsọvọ yị ori ẹnịnị nị. Ịjọnọọ, ọzọza vaa kà a ka ọnị ọ vị Ẹnẹyịmavara nị. 14Ọ kà ọnị vaa tana ụvọ za wa, dị ọnị tụ́ avaba ẹkụra ẹnịnị osusu, dị ọ jị eburu. Avọọ ọnị mẹ vaa mẹẹ hụụnị ụnọmị eyi ụvẹtẹ huu naa ngụ ịzị aā hị́ Iribira eyi ẹbẹẹba nị.

Currently Selected:

Ezikẹẹrị 6: EBTP

Highlight

Copy

Compare