Ezikẹẹrị 48

Ẹtẹ ana á gà tu ịrẹsụ-ịrẹsụ

1Ịrẹsụ-ịrẹsụ Anisirẹrị nịnị ọnịrị ọpa ẹtẹ ene tu ịrẹsụ ọnya-ọnya yị. Ẹtẹ ezi Ịdaanị vị ana yà eyi ẹbẹẹba kere-kere. Ẹhwị ẹtẹ ẹnịnị ô nyima hụrẹ oze Ihetironi na ngụ Irebo-Ihamati. Ộ na huuu na ngụ Ihazari-Enoni, ọ̀ sị gụrị Ịdamasịkọsị. Dị ọ sị Ihamati tụ́ eyi ẹbẹẹba nị. Ẹtẹ ezi Ịdaanị ộ gọdọ ẹhwị ẹtẹ Anisirẹrị, hụrẹ eyi ọnị ọyịị̄ zịị vẹ na ngụ eyi ọnị ọọ̄ zị naa ngụ ẹtẹ. 2Ẹtẹ ezi Aseri vị ana gụrị eyi ụvẹtẹ ẹtẹ Ezi Ịdaanị, dị ọnị rẹ hụrẹ eyi ọnị ọyịị̄ zịị vẹ na ngụ eyi ọnị ọọ̄ zị naa ngụ ẹtẹ nị. 3Ẹtẹ Ezi Inahwitari ọnị vị ana rẹ yà eyi ụvẹtẹ ẹtẹ ezi Aseri, hụrị eyi ọnị ọyịị̄ zịị vẹ na ngụ eyi ọnị ọọ̄ zị naa ngụ ẹtẹ. 4Ezi Ịmanasẹ nịnị ẹ vana nyị ẹtẹ vatụra ezi Inahwitari nịnị. Ẹtẹ ẹnịnị ọnị ọ rẹ hụrẹ eyi ọnị ọyịị̄ zị vẹ ọnịrị eyi ọnị ọọ̄ zị na ngụ ẹtẹ 5Ẹtẹ Ehwireemi nịnị ọ̀ và tụra ẹtẹ ezi Ịmanasẹ nị. 6Ezi Irubẹnị ó vene tù nị, 7di o ve tu Ezi Ijuda nịnị nị. Ẹtẹ avaba ẹnịnị vị ana hụrẹ eyi ọnị ọyịị̄ zị vẹ na ngụ eyi ọnị ọọ̄ zị naa ngụ ẹtẹ.

Ẹtẹ ana a vaa dàa tụ irenyi ịnị akakana ẹtẹ ọnọọ

8Ịpa ọnị ó venee tù ịnị ẹtẹ ọnọọ vị ana vaa dà a tịtẹ ọ̀yị mẹ ịsị irenyi. Ẹtẹ ọnọọ vaa gana ikiromita ẹwụrẹva rị ẹjịjị, hụrị eyi ẹbẹẹba na ngụ eyi-ụvẹtẹ, dị ọ rẹ vavọọ gọdọ hụrị eyi ọnị ọyịị̄ zịị vẹ na ngụ eyi ọnị ọyịị̄ zịị na ngụ ẹtẹ. Ọpa ụgọdọ ẹtẹ ọnọọ gẹdẹ-gẹdẹ a sị yị ịrẹsụ ikonyi ikonya nị. Ịnị ẹtẹ ọnọnị a vaa dà irehi Ohomorihi tụ nị. 9A vaa dà aha tịtẹẹ yị Ẹnẹyịmavara ịnị akakana ẹtẹ ọnọnị. Ịzị a vaa dà a tịtẹ aanị vaa gọdọ ikiromita ẹwụrẹva rị ẹjịjị, dị ọ gana ikiromita ẹẹwụ. 10Â nyị ịpa ana a vaa dàa yị ẹnị ohirẹsụ irehi Ohomorihi nịnị ịnị ẹtẹ ana a sị tịtẹ yị Ẹnẹyịmavara aanị, ọ vaa gọdọ ikiromita ẹwụrẹva rị ẹjịjị hụrị eyi ọnị ọyịị̄ zịị vẹ naa ngụ eyi ọnị ọyị zị naa ngụ ẹtẹ. Dị ọ gọdọ ikiromita ẹẹhị hụrị eyi ẹbẹẹba naa ngụ eyi-ụvẹtẹ. Ịnị akakana ẹtẹ ọnọnị á vaa dà irehi Ohomorihi tụ nị. 11Ẹnị ohirẹsụ irehi Ohomorihi ana vị evere Ịzadọkị ẹ vaa nyị aha ọnịnị ọnọnị nị. Ẹnẹyịmavara kà ẹnịnị ệ sị ịzẹyịza hẹkẹ ọnị. Ẹnịnị ẹ́ yị saasa Anisirẹrị ana vọ na mẹ̀ ịsa ẹnẹ ẹ̀ yị vọrọ anka Anireevi nịnị. 12Avọọ, ẹnịnị vaa nyị tụ ịnị aha ọnịnị ọnọnị. Ịzị a dà yị wa ọ vaa vị aha ọnịnị ene hu kere-kere nị. Ẹtẹ ẹnịnị a vaa paraahu dị e vee tu ẹtẹ Anireevi nịnị nị. 13Aa nyị ịpa irenyi ana a rẹ vaa dàa yị Anireevi nịnị ịnị ẹtẹ ọnọnị. Ẹtẹ ẹnịnị vị ana vaa yà eyi-ụvẹtẹ ẹtẹ ohirẹsụ Irehi Ohomorihi nịnị. Ẹtẹ ẹnịnị vaa gọdọ ikiromita ẹwụrẹva rị ẹjịjị hụrị eyi ọnị ọyịị̄ zịị vẹ naa ngụ eyi ọnị ọyịị̄ zịị naa ngụ ẹtẹ, dị ọ gana ikiromita ẹẹhị hụrị eyi ẹbẹẹba na ngụ eyi-ụvẹtẹ. 14Ịpa ana a sị tịtẹ yị Ẹnẹyịmavara aanị, o hu ịnị avaba ẹtẹ Anisirẹrị nịnị nị. A sị a nyị ịpa ọnị ọza dà ná ịnị anị. Asị a nyị ịpa ana á dà yị ọza dị à sị dọ ịsị ọsa. Asị a rẹ nyị ịpa ana a dà yị ọza ẹnẹsa ịnị anị o. Ẹtẹ ọnọọ vị ọnịnị, Ẹnẹyịmavara ọ nyị nị. 15Ịpa ana vẹtẹ ịnị ẹtẹ ana á dà tụ irenyi aanị ộ gọdọ ikiromita ẹwụrẹva rị ẹjịjị, dị ọ́ gana ikiromita ẹẹva rị ẹjịjị nị. Ẹtẹ ọnọnị ẹ́ yị vị ọnịnị, avaba aza ẹ vaa nyị, dị ẹ yaa sịị mẹ̀ ịsa nị. Ẹ zụ rá ịnị anị dị ẹyaa mẹ ịsị ẹẹ ka ẹnị a mẹ ịnị anị. Ịnị akakana anị ẹkụra ọbanyị ọnọọ vaa yà nị. 16Ụgọdọ ọnịrị ụgana ẹkụra ọnọọ vaa vị ẹbẹẹbẹ, ụgọdọ eyi ọnya-ọnya vaa vị okuvọ akawụ tụra ịrẹka rị ẹvarẹwụ (2,250 m). 17A vaa navọ ẹtẹ okuvọ ẹchịhịnọnyị tụra ẹẹhị tịtẹ akaha-akaha ẹkụra ọnọnị jesi kara a. Ẹtẹ ọnọọ vị ana a vaa vavọọ há ẹkụra ịnẹẹ naa paraahu. 18Àa sị ẹkụra ọnọnị dà tụ ẹtẹ ana a vịdị ee tù eyi-ụvẹtẹ ẹtẹ ọnịnị ọnọọ, áa nyị ẹtẹ ana vaa vọ. Ẹtẹ ana vaa vọ tụ eyi ọnị ọyịị̄ zịị vẹ vaa gọdọ ikiromita ẹẹhị rị ẹjịjị, dị ọ gana ikiromita ẹẹva rị ẹjịjị. Avọọ ọ mẹ rẹ vaa vọọ tụ eyi ọnị ọyị zị naa ngụ ẹtẹ nị. Aza ana rá hi ịnị ẹkụra ọbanyị ọnọọ ẹ vaa dà aarẹ hi ịnị ẹtẹ ọnọnị nị. 19Ịrẹsụ tụra ịrẹsụ ọnị ọza ọọ vị ịnị ẹtẹ Isirẹrị, dị ọ ra ịnị ẹkụra ọbanyị ọnọọ nị, ọ zụ da aarẹ tụ ịnị ẹtẹ ọnọọ. 20Avaba ẹtẹ ọnị ụ vaa dàa tụ irenyi aanị vaa gọdọ ikiromita ẹwụrẹva rị ẹjịjị, dị ọ rẹ vavọọ gana. Ịnị anị a rẹ vaa dà ẹkụra ọbanyị ọnọọ tụ nị. 21Ẹtẹ ana vọ tụ́ eyi ẹnyị-eyi ọsa ẹtẹ ọnịnị ọnọọ ọnịrị ẹkụra, ohinọyị nịnị ẹ vaa nyị nị. Ụgọdọ ẹtẹ ọnọọ zị oze eyi ọnị ọyịị̄ zịị vẹ ọnịrị zị oze eyi ọnị ọyịị̄ zị naa ngụ ẹtẹ vaa vị ikiromita ẹwụrẹva rị ẹjịjị. Ẹtẹ ana a dà tịtẹ yị Ohomorihi aanị ọnịrị irehi Ohomorihi vị ana vaa yà ịnị akakana. 22Àa sị ẹtẹ ana dà tịtẹ yị Ohomorihi aanị ọnịrị ẹkụra kwooze, avaba ẹtẹ ana vọ tụ́ ịnị akakana ẹtẹ Ijuda ọnịrị ẹtẹ Ịbẹnjamịnị, kụkụ vị ẹtẹ ohinọyị nịnị. 23Ẹhwị ẹtẹ ana a gà tụ ịrẹsụ-ịrẹsụ ana vọ yị. Ẹtẹ Ezi Ịbẹnjamịnị ọ gụrị ẹtẹ ezi ohinọyị nịnị eyi ụvẹtẹ nị. Ụgọdọ anị vị ẹhụ ụgọdọ avaba ẹtẹ Anisirẹrị hụrẹ eyi ọnị ọyịị̄ zịị vẹ na ngụ eyi ọnị ọọ̄ zị naa ngụ ẹtẹ. 24Ẹtẹ Ezi Isimiyọnị ọ và tụra ẹtẹ Ezi Ịbẹnjamịnị eyi ụvẹtẹ nị. Ộ hụrẹ eyi ọnị ọyịị̄ zịị vẹ na ngụ eyi ọnị ọọ̄ zị naa ngụ ẹtẹ. 25Ẹtẹ Ezi Iisaka nịnị ọ vana và tụra Ísimiyọnị nị. Ọnị ộ rẹ hụrẹ eyi ọnị ọyịị̄ zịị vẹ naa ngụ eyi ọnị ọọ̄ zị naa ngụ ẹtẹ. 26Ezi Izeburuni ẹ vana nyị ẹtẹ va tụra wa nị. Ẹtẹ ẹnịnị ọnị ọ rẹ gọdọ hụrẹ eyi ọnị ọyịị̄ zịị vẹ na ngụ eyi ọnị ọọ̄ zị naa ngụ ẹtẹ. 27Ẹtẹ ezi Igadi ọ yà eyi ụvẹtẹ ẹtẹ Ezi Izeburuni nị. Ọnị vana rẹ hụrẹ eyi ọnị ọyịị̄ zịị vẹ na ngụ eyi ọnị ọọ̄ zị naa ngụ ẹtẹ. 28Ẹtẹ Ezi Igadi ọnị vị ene re nyima hụrẹ eyi-ụvẹtẹ Ísirẹrị. Ộ hụrẹ eyi ụvẹtẹ Ịtama huuu na ngụ ịzị enyi yà Ímeriba-Ikadesi, di o zi oze ịzị aā hị́ Iwadi ịnị ẹtẹ Ijipiti na ngụ oku ọbanyị Imeditareniya nị. 29Ẹnẹyịmavara Ochẹtẹẹngụ ka ẹtẹ ọnọnị ụ́ vaa gàa yị Ịrẹsụ-ịrẹsụ Anisirẹrị nịnị. Ọpa ẹtẹ ene vee tù ọzọza yi o. 30#Ẹtẹ 21.12,13A vaa nyị oze ọbanyị nịnị ana a va zịị ngụ Ijerusarẹmị. Ọvọ ana a tụra tụ́ eyi ẹbẹẹba vaa gọdọ ikiromita ẹẹva tụra chee. 31Oze ọbanyị ẹẹta ọ vaa yà ịnị ọvọ ọnọọ nị. Ị́ịpaapa vị ana a vaa sị ịrẹha Irubẹnịị hị́, ọhụva vị ana a vaa sị ịrẹha Ijudaa yị, dị a sị ịrẹha Ireevi yị ọhụta. 32Ụgọdọ ọvọ ana yà eyi ọnị ọyịị̄ zịị vẹ rẹ vaa vị ikiromita ẹẹva tụra chee. Oze ọbanyị ẹyịta ene hi ịnị anị vị ana a vaa sị ịrẹha Ijosẹẹhụ, Ịbẹnjamịnị, ọnịrị Ịdaanịị hị́. 33Ụgọdọ ọvọ ana yà eyi ụvẹtẹ ọnị rẹ vaa vị ikiromita ẹẹva tụra chee. Ịrẹha Isimiyọnị, Iisaka, ọnịrị Izeburuni a vaa sị yị oze ọbanyị ẹyịta ene hi ịnị anị. 34Ọvọ ana ya eyi ọnị ọyịị̄ zị naa ngụ ẹtẹ ọnị rẹ vaa gọdọ anka ọvọ ana vọ. Ịrẹha Igadi, Aseri, ọnịrị Inahwitari a vaa sị yị oze ọbanyị ene hi ịnị anị nị. 35Ụgọdọ avaba ọvọ ana a tụra kara Ijerusarẹmị vị okuvọ akahị-akahị oze ịhịịna. Hụrị ọyaanị na, ịrẹha ẹkụra ọbanyị ọnọnị á vanaa hị́ Ẹnẹyịmavara ya ịzẹnị nị.

Currently Selected:

Ezikẹẹrị 48: EBTP

Highlight

Copy

Compare