Ezikẹẹrị 42

Irehi ẹẹva ana gụrị Irehi Ohomorihi.

1Ezikẹẹrị ka ọnọrụ ọnị ọnị maanị re aanị ộ sị ọnị na ngụ ịnị ohweje ana yà ẹhẹ, dị ọ́ sị ọnị zị avọọ na ngụ ịnị irehi ọnya ana yà eyi ẹbẹẹba irehi Ohomorihi nị. 2Ụgọdọ irehi ọnọọ vị ẹ̀hụ ahụ ẹvarẹwụ avọọ, dị ụgana anị vị ẹ̀hụ ahụ ohurẹẹhị nị. 3Irehi ọnọnị ô zị oze eyi ọnya và eyi ka ẹtẹ ana ya akaha irehi Ohomorihi; ẹtẹ ọnọọ ộ gana ẹ̀hụ ahụ ẹẹwụ avọọ. Oze eyi ọsa, dị ọ và eyi ka oze ana á tụra ka aa zị ịnị ohweje ana ya ẹhẹ aanị nị. Irehi ọnọnị vị ọtụrọsarẹsụ ẹẹta, dị ẹ gana huna ẹngụ huna ẹngụ nị. 4Â nyị oze ana zị akaha irehi ọnọnị eyi ẹbẹẹba; ộ gana ẹ̀hụ ahụ ẹẹhị avọọ, dị ọ́ gọdọ ẹ̀hụ ahụ ẹvarẹwụ avọọ nị. Â mẹ ịzị a zịị̄ ngụ eehi tụ oze eyi ẹbẹẹba ọnọọ. 5Aku ene hi ịnị ọtụrọsa ana ya ẹbẹẹba ẹ nyị hwịtị-hwịtị huni ene hi ịnị akakana ọnịrị ene hi ụvẹtẹ nị. Aha ana á dà tụ ẹbẹẹba ịzị aza ee hi ré ẹtẹ ọ mẹ ka asị aku ẹnẹẹ kụkụ banyị nị. 6Aku ene hi ịnị ọtụrọsa ẹyịta vị ana á dà gụrị ẹngụ gụrị ẹngụ. Ẹnịnị ẹ́ yị nyị ọhẹ ẹnẹ và ẹngụ ya anka irehi ana vọ hi ịnị ohweje ịzọọ. 7Â nyị ọvọ ọnị ọnịrị irehi ọnọnị sị akaha-akaha yị ẹngụ eyi ẹhẹ, ọ̀ vaka ohweje ana yà ẹhẹ na, dị ọ́ và eyi ka irehi ana vọ nị. Ugene ọnọọ ộ gọdọ ẹ̀hụ ahụ ẹvarẹwụ avọọ. 8Ụgọdọ irehi ene hi ịnị ohweje ana yà ẹhẹ vị ẹ̀hụ ahụ ẹvarẹwụ, dị ụgọdọ irehi ana và eyi ka irehi Ohomorihi ẹnị vị ẹ̀hụ ẹchẹhị nị. 9Â nyị oze ana yà eyi ọnị ọyị hụrẹẹ vẹ, akẹtẹ irehi ẹẹva ẹnẹnị, dị ọza rẹ nyẹngụ hụụnị ohweje ana yà ẹhẹ ngụ wa nị. 10Ịzị ọvọ ana yà eyi ẹhẹ nyima hụrẹ á vavọọ nyẹngụ zị ngụ wa hụụnị ohweje ọnọọ nị. Â nyị ẹngụ irehi ọnọnị gẹdẹ-gẹdẹ ana yà eyi ụvẹtẹ irehi Ohomorihi. Irehi ọnọnị ẹ́ yị vavọọ noze rịrị irehi ana yà eyi ụvọha irehi Ohomorihi. 11Â nyị oze ana aza aa zị paraahu ọvịdị aku ene hi ịnị anị anka ọ mẹ rẹ yà ịnị irehi ana yà eyi ẹbẹẹba gẹdẹ-gẹdẹ. Irehi ọnọnị ẹyịva vị ẹbẹẹbẹ, dị ahịka ụvọ ọnyọọnya asị da wa nị, oze ana aa zịị ngụ wa rẹ vị ọnyọọnya. 12Â nyị oze ana yà akẹtẹ aku ana yà eyi-ụvẹtẹ irehi ọnọnị. Eyi ụvọha aku ọnọnị oze ọnọọ yà nị. Eyi ọnọọ a tụra ọvọ hụrẹ nị. 13Ezikẹẹrị ka ọnọrụ ọnọnị ộ kà a yị ọnị ka, irehi ẹyịva ọnị ọnya yà eyi ẹbẹẹba, dị ọsa ya eyi-ụvẹtẹ vị Óhomorihi o. Ịzọọ ohirẹsụ Irehi Ohomorihi anaā nọ ọvịdị Ẹnẹyịmavara vaa ngụ naa rị ịsị ịsọvọ ana vị Óhomorihi ịnya kẹnẹ nị; ka irehi ẹnẹnị vị Ohomorihi, ịzọọ a vaa kụ ịsa ịsọvọ ana vị Óhomorihi ịnya kẹnẹẹ hi nị. Ẹngụ akụ ana asị mẹ̀ ịsọvọ, ịsị a sị mẹ̀ ịsọvọ agụvị ka ọza ộ mẹ̀ ebira odivi ọnịrị agụvị ka ọza ộ rị ịvị, vị ana a vaa kụụ hi ịzọọ. 14Ohirẹsụ irehi Ohomorihi ọ̀ọ yà ịnị irehi Ohomorihi aa mẹ̀ ụkọrọ, dị ee sị ka ọnị ọ̀ jịnẹ tụ ẹhẹ nị, áa nyị ka ọ̀ ngwa ẹnya ọnịnị ọnị ọ kụ hi ẹngụ hi ịnị aku ọnọnị da. Dị ò chire awuru ọsa dị ọ̀ va jịnẹ tụ ẹhẹ na ngụ ịzị aza ana vọ hi.

Avaba ọba ana á dà irehi Ohomorihi tụ

15Ezikẹẹrị ka ịjị ọnọrụ ọnọnị sị ịnịnẹ irehi Ohomorihi mọ ta, dị ọ́ zị oze ọbanyị ana yà eyi ọnị ọyịị̄ zịị hụrẹ vẹ, dị ọ́ sị ọnị tụ ẹhẹ nị, ó mẹ tu ẹhẹ, dị ọ́ mọ ẹtẹ ana tịtẹ kara irehi Ohomorihi nị. 16Ộ sị okutẹ ana aa sị mọ ẹtẹ mọ ẹtẹ ana tịtẹ eyi ọnị ọyịị̄ zịị hụrẹẹ vẹ, dị ọ́ vị ẹ̀hụ ahụ ịrẹka tụra ẹvarẹwụ avọọ nị. 17Ộ sị ọchị anị mọ ọ ana ya eyi ẹbẹẹba, dị ọ vị imita ịrẹka tụra ẹvarẹwụ nị. 18Ộ nọ eyi ụvẹtẹ irehi ọnọọ, dị ọ́ sị ọchị anị mọ ọ nị, dị ọ vị imita ịrẹka tụra ẹvarẹwụ nị. 19Ộ nọ eyi ọnị ọyịị̄ zị na ngụ ẹtẹ, dị ọ́ mọ ọ nị; ụgọdọ anị ọnị rẹ vị imita ịrẹka tụra ẹvarẹwụ. 20Ộ vavọọ mọ avaba ọvọ ana a tụra kara ịzọọ. Ụgọdọ anị eyi ẹnyị-eyi ọsa vị imita ịrẹka tụra ẹvarẹwụ. Ọvọ ẹnẹnị a sị há ịzị a sị tịtẹ yị Ohomorihi ọnịrị aha ana vọ hi nị.

Currently Selected:

Ezikẹẹrị 42: EBTP

Highlight

Copy

Compare