Ezikẹẹrị 40

Irehi Ohomorihi ana a vaa dàa tụ Ijerusarẹmị

1Ezikẹẹrị ka, ịhị ẹ tụ ọ ẹkụhị ẹẹwụ ịnị ịrayị ọwọọwa, ịrayị ọnọọ ọ tụ ọ ịrayị ohurẹẹhị ana a zá ẹnị ne hi ẹkụra ọsa nị. Ịrayị ọnọọ gẹdẹ-gẹdẹ ọ́ gụ ịrayị ẹwụrẹna ọnị ụvọ kara Ijerusarẹmị nị. Ịhị ọnọọ dị ụkata Ẹnẹyịmavara kà ọnị vẹ, dị ọ sị ọnị aa na nị. 2#Ẹtẹ 21.10Â nyị ẹtẹ ọnị ọnị re, dị ọnị re ka Ohomorihi ộ sị ọnị na ngụ ẹtẹ Isirẹrị, dị ọ sị ọnị na jẹẹ ịrẹsụ ataba ọnya aanị, ana nẹba ẹtẹẹtẹrẹ nị. Ọnị ô re ka irehi gụ ọvịdị anị anka ẹkụra ọbanyị avọọ. 3#Ẹtẹ 11.1; 21.15Ẹnẹyịmavara ộ kà ọnị pèe, dị ọnọrụ ọnya anaa za nyoonyo anka enyusẹ ọkatarihi ọnya aanị avọọ nị. Ọza ọnọnị ộ sị obo ọnịrị ọchị ana a sịị̄ mọ ịsa rị ụvọ, dị ọ́ jẹẹ enoze ọbanyị ana a zịị̄ ngụ eehi nị. 4Ọza ọnọnị ộ kà a yị ọnị ka, ọnị ozi-ọza ò sị eyi pe ẹtẹ o. Ọnị ọ̀ sị ụtọ pe ẹtẹ ẹtẹẹtẹrẹ, dị ọnị ò jị eyi ngụ avaba ịsị ọnị ọnị ọọ sị zụ ọnị; agụvị ka ịsị a hụvị anị sị ọnị vẹ ịzẹnị ọ vị ọnọọ nị. Ọ kà avaba ịsị ọnị oo re, ọnị ọ̀ kà a yị Anisirẹrị nịnị.

Oze ọbanyị ana yà eyi ọnị ọyịị̄ zịị hụrẹ

5 # 1 Ohi 6.1-38; 2 Ịtọ 3.1-9 Ezikẹẹrị ka ọnị ô re irehi Ohomorihi, dị a jị ọvọ kara a nị. Ọza ọnọnị ộ sị ọchị ana a sịị̄ mọ ịsa aanị, ụgọdọ ọchị ọnọọ vị ẹhwị ahụ ẹẹta avọọ, dị ọ sị mọ ọvọ ọnọọ nị. Ọvọ ọnọnị ộ nẹba ahụ ẹẹta va hịrẹ, dị ọ́ rẹ gana eyi ahụ ẹẹta nị. 6Dị ọza ọnọnị nọ oze ọbanyị ana a zịị̄ ngụ eehi ana và eyi ka ịzị ọyịị̄ zịị hụrẹẹ vẹ nị. Ộ hịrẹ ọbụna na ngụ ẹbẹẹba; ịjị ó tu ịzọọ, dị ọ́ mọ enoze anị nị. Ộ nyịnẹ ahụ ẹẹta. 7Wàa kana chee, â nyị oze ana zị avọọ, ộ nyị aku oserẹtẹ nịnị ẹtẹẹta tụ eyi ọnyị-eyi ọsa. Ụgana aku ikonyi ikonya vị ẹ̀hụ ahụ ẹẹta avọọ eyi ẹyịna. Ọvọ ana jị wa ịnị akakana ộ gana eyi ẹ̀hụ ahụ ẹẹva rị ẹjịjị avọọ. Waa kana chee yị aku ẹnẹnị, â nyị oze ọnya aanị; ụgọdọ anị vị ẹ̀hụ ahụ ẹẹta avọọ. Oze ọnọnị vị ana na ngụ ịnị aku ọnya aanị ana yà enoze. Aku ọnọọ vị ana và eyi ka Irehi Ohomorihi. 8Ọza ọnọnị mẹ mọ aku ọnọọ, dị ahịka ẹ̀hụ ahụ ẹẹna avọọ ọ vị nị. 9Vị́ á dà a gẹ oze ana a mẹ tụ ịnị ọvọ ana a tụra kara Irehi Ohomorihi nị. Oze ọnọọ ọ gụrị Irehi Ohomorihi hu nị. Ọvọ ana yà ịrẹma akụ ọnọọ kere-kere ộ gana eyi ẹ̀hụ ahụ ọnya avọọ. 10Aku ẹnẹnị ana yà akaha oze ọnọnị aanị vị ẹbẹẹbẹ. Ọvọ ana a tụra jị wa akakana vị ana rẹ gana eyi ẹbẹẹbẹ. 11Ọza ọnọnị ộ mọ ụgana oze ana parahu ịnị oze ana a mẹ̀ tụ ịnị ọvọ aanị, dị ọ vị ẹ̀hụ ahụ ịhịnọnyị rị ẹjịjị avọọ nị. Aha ana vọ tịtẹ ịnị akakana oze ọnọnị ọnịrị ọvọ vị ẹhụ ahụ ẹẹhị avọọ. 12Â nyị ọvọ ana a tụra tụ ọvịdị akụ ikonyi ikonya. Ệ nẹba ẹ̀hụ ụvọ ẹẹva rị ẹjịjị avọọ, dị ọ́ vavọọ rẹ gana eyi nị. Aku ẹnẹẹ vị ẹ̀hụ ahụ ẹẹta eyi ẹnyị eyi ọsa. 13Dị ọza ọnọnị rẹ na mọ ẹ̀hụ ụsẹ ana hụrị ugene ịrẹma aku ọnya na ngụ ịrẹma aku ana và eyi ka a akẹnẹ oze nị, dị ọ vị ẹ̀hụ ahụ ẹwụrẹva rị ẹjịjị avọọ nị. 14Â nyị oze ana hụụ ịnị aku ana yà ịrẹma kere-kere na ngụ ịnị ohweje. Ọza ọnọnị ộ mọ aku ọnọọ, dị ụgana anị vị ẹ̀hụ ahụ ẹẹwụ avọọ nị. 15Ọza aa zị ụsẹ ẹ̀hụ ahụ ohurẹẹhị avọ hụrị oze ana á mẹ̀ tụ ịnị ọvọ ana yà ẹhẹ naa ngụ akaha akụ ana vị ọdịrẹma. 16Ugene avaba akụ ẹnẹẹ ene hi ẹhẹ ẹnịrị ugene ana jị wa akakana ịnị ịnẹ ệ nyị uhwohwo eweyi-eweyi. Dị á và ụmọmọ ọsọchị hi ini ugene ịnịnẹ eehi ana và eyi ka oze nị.

Ohweje ana yà ẹhẹ

17Ezikẹẹrị ka ọnọrụ ọnọnị ộ sị ọnị và tụra oze ọnọnị na ngụ ịnị ohweje. Â nyị akụ ohurẹẹwụ ana á dà vaka ugene ịnị ohweje ịzọọ; dị a nyị aha ana a maanị và ịrẹta hi ọvịdị akụ ẹnẹẹ nị. 18Aha ọnọọ vị ene jesi kara ohweje bẹẹ. Ohweje ana yà ẹhẹ aanị ọ nẹtẹ hu ana yà ịnị ịnẹ nị. 19Â nyị oze ana mẹ tụ ịnị ọvọ ọnị ọza aa zị naa ngụ ịnị ohweje ana yà ịnị ịnẹ. Aha ana nẹba ọ́ yà nị. Ọza ộ mọ unoze ana yà ịnị akakana oze ẹyịva ana a mẹ̀ tụ ịnị ọvọ aanị, dị ọ vị ẹ̀ hụ ahụ ẹvarẹwụ avọọ nị.

Oze ana yà eyi ẹbẹẹba.

20Ọnọrụ ộ rẹ mọ oze ana a mẹ tụ ịnị ọvọ ana yà oze eyi ẹbẹẹba, ana na ngụ ịnị ohweje ana yà ẹhẹ. 21Â nyị aku oserẹtẹ ẹẹta ana ya akaha oze eyi ẹnyị-eyi ọsa, ọvọ ana jị wa akakana, beri aku ana dà tụ enoze ẹnịrị ẹngụ ẹnẹẹ ene hi oze ana yà eyi ọnị ọyịị̄ zịị hụrẹẹ vẹ vị ẹbẹẹbẹ á mẹ mọ wa. Avaba ụgọdọ oze ọnọọ vị ẹ̀hụ ahụ ohurẹẹhị avọọ, dị ụgana nị vị ẹ̀hụ ahụ ẹwụrẹva rị ẹjịjị nị. 22Aku ana a dà tụ enoze ọnịrị ozokete anị beri ụmọmọ ọsọchị ana á và hi ini ugene anị vị ana sị mẹẹ anka ẹngụ ene hi eyi ịzị ọyịị̄ zịị hụrẹẹ vẹ. Â nyị aha ana aa sị ahụụ hí ịhịmba dị à na ngụ ịnị oze ọbanyị ọbanyị ọnọọ. Aku ana á dà tụ enoze aanị vị ana và eyi ka ohweje. 23Â nyị oze ọsa ana na ngụ ịnị ngụ ohweje ana yà ịnị ịnẹ, dị ahịka vị ó và eyi ka oze ọbanyị ana yà eyi ẹbẹẹba aanị nị. Avọọ ọ́ mẹ rẹ yà eyi ọnị ọyịị̄ zịị hụrẹẹ vẹ nị. Ọnọrụ-ọnọrụ ộ mọ oze ọbanyị ẹyịva ẹnẹnị mẹmẹ noze rịrị ẹngụ, dị ọ vị ẹ̀hụ ahụ ẹvarẹwụ avọọ nị. 24Ezikẹẹrị ka ọnọrụ ọnọnị re aanị ộ sị ọnị nọ eyi ụvẹtẹ, dị ọnị re oze ọnya ana a mẹ tụ ịnị ọvọ ịzọọ nị. Ộ mọ ọvọ anị ana yà ịnị ịnẹ ọnịrị aku ana a dà tụ enoze, dị ahịka ọnyọọnya ẹnịrị ana vọ vị nị. 25Ozokete vị ene hi ịnị aku ana á dà tụ enoze aanị anka ana vọ ẹnị mẹ rẹ nyị. Avaba ụgọdọ oze ọnọnị vị ẹ̀hụ ahụ ohurẹẹhị avọọ, dị ụgana anị vị ẹhụ ahụ ẹwụrẹva rị ẹjịjị avọọ nị. 26Aha ịhịmba aa kụ ahụụ hí naa ngụ ịnị anị nị. Aku ana á dà tụ enoze aanị vị ana na yà ọnataha ụgana eyi ọvọ ọnọọ, dị ahịka vị ọ́ và eyi ka ohweje nị. Ụmọmọ ọsọchị vị ana á và tụ ịnị ugene ịnịnẹ eehi ana và eyi ka oze. 27Â rẹ nyị oze ịzẹnị ana na ngụ ohweje ana yà ịnịnẹ. Ọnọrụ ọnọnị ộ mọ unoze oze ịpaapa va ngụ ịzị oze ụpọhụva ọnọnị yà, dị ọ vị ẹ̀hụ ahụ ẹvarẹwụ avọ nị. 28Ezikẹẹrị ka ọnọrụ ọnọọ ộ sị ọnị zị oze ọbanyị ana yà eyi ụvẹtẹ na ngụ ịnị ohweje ana yà ịnịnẹ. Ọ́ mẹ mọ oze ana na ngụ ọ, ọnịrị oze ana yà ịnị ọvọ ana yà ẹhẹ vị ẹbẹẹbẹ. 29Aku oserẹtẹ ene hi ịzọọ, aku ana á dà tu enoze anị, ọnịrị ọvọ ana a tụra hi ịzọọ, ẹnịrị ene hi oze ana vọ vị ẹbẹẹbẹ. Avaba aku ene hi oze ọnọnị vị ana nyị ozokete. 30Ụgọdọ aku ana á dà tụ enoze aanị vị ẹ̀hụ ahụ ohurẹẹhị avọọ, dị ụgana anị vị ẹ̀hụ ahụ ẹwụrẹva rị ẹjịjị nị. 31Aku ana á dà tụ enoze aanị vị ana và eyi ka ohweje ọsa, dị á và ụmọmọ ọsọchị hi ịnị ugene ịzị oze zi parahu nị. Aha ịhịnta aa sị ahụụ hi naa ngụ oze ọnọọ nị. 32Ezikẹẹrị ka ọnọrụ ọnọnị ộ rẹ sị ọnị zị oze ana yà eyi ọnị ọyịị̄ zịị hụrẹẹ vẹ na ngụ ịnị ohweje ana ya ịnịnẹ. Ộ mọ oze ana a mẹ tụ ọ, dị ọnịrị ana vọ vị ẹbẹẹbẹ nị. 33Aku oserẹtẹ ene hi ịzọọ, aku ana á dà tụ enoze anị, ọnịrị ọvọ ana tụra hi ịzọọ ẹnịrị ene hi oze ana vọ vị ẹbẹẹbẹ. Aku ana á dà tụ enoze aanị ọnịrị aha ana vọ, vị ọnị ozokete hi ịnị anị. Avaba ụgọdọ anị vị ẹ̀hụ ahụ ohurẹẹhị avọọ, dị ụgana anị vị ẹ̀hụ ahụ ẹwụrẹva nị. 34Aku ana á dà tụ enoze ịzọọ vị ana và eyi ka ohweje ana yà ẹhẹ. Ụmọmọ ọsọchị vị ana á và hi ịnị ugene ịzị oze zị parahu. Aha ịhịnta aa hịrẹ naa ngụ oze ọbanyị ọnọnị nị. 35Ezikẹẹrị ka ọnọrụ ọnọnị ộ rẹ sị ọnị na ngụ oze ọbanyị ana yà eyi ẹbẹẹba. Ộ mọ ọ, dị ọnịrị ana vọ vị ẹbẹẹbẹ nị. 36Ọnị ộ rẹ nyị aku oserẹtẹ nịnị, ọvọ ana á mẹ ọvị, aku ana á dà tu enoze ọnịrị ozokete kara ẹngụ. Ụgọdọ avaba anị vị ẹ̀hụ ahụ ohurẹẹhị avọọ, dị ụgana anị vị ẹ̀hụ ahụ ẹwụrẹva rị ẹjịjị nị. 37Aku ana á dà tụ enoze anị vị ana và eyi ka ohweje ana yà ẹhẹ. Ụmọmọ ọsọchị vị ana a và hi ịnị ugene ịzị oze zi parahu. Aha ịhịnta aa hịrẹ naa ngụ oze ọbanyị ọnọnị nị.

Itevuru ịsị ịsọvọ

38Ịnị ohweje ana ya ẹhẹ, â nyị irehi oweyi ana á dà vaka aku ana ya enoze, oze ọbanyị ana ya eyi ẹbẹẹba. Ộ nyị oze na ngụ ịnị aku ana á dà tu enoze aanị. Aku ọnọọ vị ana và eyi ka ohweje. Ịzọọ á yaa nyịna uye ana a sị va mẹ̀ ịsọvọ aa si ọ wụ nị. 39Â nyị itevuru ẹẹna ana ya ịnị aku ana a zịị̄ ngụ eehi aanị. Ẹvẹẹva ẹ́ vị tụ eyi ẹnyị-eyi ọsa ịnị aku ọnọọ nị. Ịrẹsụ itevuru ẹnẹnị aā wụ̀ ịsụpa ana aa sịị mẹ̀ ịsọvọ nị, ọ̀ọ vị ịsọvọ ana aa rị avaba anị ịra, ọ̀ọ vị ịsọvọ ana aa mẹ agụvị ebira odivi, à vị ịsọvọ ọ̀yị si ụta varẹma. 40Â vavọọ rẹ́ nyị ẹngụ itevuru ẹnẹẹ ene hi eyi ẹhẹ aku ọnọnị, ẹvẹẹva ẹ́ vị̀ tụ eyi ẹnyị eyi ọsa ịzị a zịị̄ ngụ oze ọbanyị ana ya eyi ẹbẹẹba aanị nị. 41Avaba itevuru ana aa wụ̀ ịsụpa ana a sịị̄ mẹ̀ ịsọvọ ịnị aanị vị ịhịnta. Ẹẹna yà ịnị aku, dị ẹẹna yà ẹhẹ ịnị ohweje nị. 42Itevuru ẹẹna ana ya irehi oweyi ọnọnị ana aa rị ịsị ịsọvọ ịra ịnị anị aanị vị ana asị ịrẹta mẹ, ụnẹba ẹnịnị vị ẹ̀hụ ụvọ ẹẹva rị ẹjịjị avọọ, dị ụgana ịrẹsụ ẹnịnị vị ẹ̀hụ ụvọ ẹẹna avọọ nị. Avaba ịsị a sịị̄ wụ̀ ịsụpa ana aa sịị mẹ̀ ịsọvọ vị ana á kụ tụra itevuru ẹnẹnị. 43Â nyị ịsa pata aanị, ẹnẹ ẹ̀ yị zẹẹ gana ana a sị kara itevuru ẹnẹnị ụtọ. Dị a kụ avaba uye ana aa sịị mẹ̀ ịsọvọ tụra ịrẹsụ itevuru ẹnẹnị nị. 44Ezikẹẹrị ka dị ọnọrụ ọnọnị rẹ sị ọnị hụrị ẹhẹ va ngụ ịnị ohweje ana ya ịnịnẹ. Â nyị aku ẹẹva ana ya ịzọọ. Ọnya vị ana ya akaha oze ọbanyị ana yà eyi ẹbẹẹba, dị ọ́ và eyi ka oze ụvẹtẹ nị, dị ọsa ọnị yà akaha oze ọbanyị ana yà eyi-ụvẹtẹ, dị ọ́ và eyi ka oze ẹbẹẹba nị. 45Ọnọrụ ọnọnị ộ kà a yị ọnị ka, aku ana và eyi ka eyi-ụvẹtẹ aanị vị aku ohirẹsụ irehi Ohomorihi ana aa mẹ̀ ụkọrọ ịnị Irehi Ohomorihi. 46Dị aku ana và eyi ka eyi ẹbẹẹba aanị vị aku ohirẹsụ irehi Ohomorihi ana aa mẹ̀ ụkọrọ ịnị ụta ịsọvọ nị. Avaba ohirẹsụ irehi Ohomorihi ẹnẹnị vị evere ọnọrụ ana aā hị́ Ịzadọkị. Ẹnị ẹ vị ịpa Anireevi ana a zẹẹ ka ẹ̀ jị ahụ ngụ ọvịdị Ẹnẹyịmavara na mẹ ịsọnyịsọnyị nị. 47Ọnọrụ ọnọnị ộ mọ ohweje ọnọnị, dị ụgọdọ anị ọnịrị ụgana anị vị ẹbẹẹbẹ eyi ẹyịna nị. Ẹ̀hụ ahụ ẹvarẹwụ avọọ ọzọza vị nị. Dị é hi ụta tụ ọvịdị irehi Ohomorihi ana á dà tụ ịnị ohweje ọnọnị nị. 48Ezikẹẹrị ka ộ sị ọnị va ngụ ịnị aku ana a zịị̄ ngụ ịnị irehi Ohomorihi, di ọ́ mọ enoze aku ọnọọ, dị ọ́ nyịnẹ ẹ̀hụ ahụ ẹẹva rị ẹjịjị avọọ, dị ụgana anị vị ẹ̀hụ ahụ ịhịmba nị. Ọvọ anị eyi ẹnyị eyi ọsa ộ gana eyi ẹ̀hụ ahụ ọnya rị ẹjịjị avọọ. 49Ụgọdọ aku ọnọọ ụvọta vị ẹ̀hụ ahụ ẹẹwụ avọọ, dị ụgana anị vị ẹ̀hụ ahụ ịhịnọnyị nị. Ịsị ẹẹwụ ọza aa hịrẹ naa ngụ ọ nị. Dị á nyị ọhẹ ikonyi ikonya eyi ẹnyị, eyi ọsa enoze anị nị.

Currently Selected:

Ezikẹẹrị 40: EBTP

Highlight

Copy

Compare