Ezikẹẹrị 34

A vaa sị aza ẹnẹsa dọ aza anaa mẹ ịjọva ịrẹsụ.

1Ezikẹẹrị ka ẹkụhị ọnya, Ẹnẹyịmavara ộ kà a yị ọnị ka 2Ozi-ọza, ọnị ọ̀ và eyi ịrazị ka ẹnị ọdọvịdị Anisirẹrị nịnị, dị ọnị ò tụ́ wa ohuvọ. Ọ kà ọnị ọ̀ kà a yị wa ka, ọnị Ẹnẹyịmavara Ochẹtẹẹngụ ka, ẹwụ nịnị oseratẹmẹ Anisirẹrị ẹ́ sị da. Ịrayị ẹngụ awụ nịnị kẹnẹ ọ jị wụ nịnị areyi nị, ama wẹ́ yị tẹsị atẹmẹ anị nịnị. 3Waa kámá ịrẹva atẹmẹ anịị hú nịnị, dị waa hara ẹyị ẹnịnị hí ịtaa jị awuru chire nịnị nị. Ẹnẹ zoza hu ịnị atẹmẹ anị vị ọnị waa wụụ rị nịnị, ama wẹ́ yị tẹsị atẹmẹ ẹnẹẹ nịnị. 4Wẹ́ yị tẹsị ẹnị ana tụ ọkụmị nịnị, ẹnẹ ẹngụ aa zị, wẹ yị tẹsị ẹnịnị ka ẹngụ ẹnịnị ọ̀ ta. Ẹnị ẹnẹ che ahụ, wẹ yị jị ịsa hi ọ yị wa ka ọ̀ vị. Ẹnị ana ha ngụ avị, dị e sị vu, wé yị ne sì wa, dị wa kụ́ wa vavẹ nịnị. Ama dị wa chamayịị yị wa nịnị nị. 5#Ịrị 27.17; 1 Ohi 22.17; Imt 9.36; Ịmk 6.34Atẹmẹ ẹnẹẹ ẹ́ kụ gara hi agụvị ka ẹ́ yị nyị ọza enee sere wa. Dị uye edivi kụkụ aa za waa mẹ ụngwẹ nị. 6Atẹmẹ ọnị ẹ́ kụkụ naa ngụ ịrẹsụ ataba-ataba zịịzị. Ẹnịnị ẹ kụ gara hi avaba ẹhẹ. Ẹ́ yị nyị ọza ene ne sì wa. 7Ẹwụ nịnị oseratẹmẹ ẹ̀ wụ́ ịrẹyị ọnị Ẹnẹyịmavara aa kà a wụ nịnị booro aanị. 8Ọ kà, àa vị ọnị ọ yị vị Ohomorihi ana yara nị, jintu sị ụtọ pe ịrẹyị anị nịnị. Uye edivi ệ kwẹẹtẹ tu atẹmẹ, ẹ sị wa wụ rị, agụvị ka ẹ́ yị nyị ọza enee sere wa. Aza enee sere atẹmẹ anị, é yị ne sì wa. Ẹngụ ẹnịnị kẹnẹ ẹyaa tẹsị anị nị, ẹ́ yị vị atẹmẹ anị. 9Avọọ, ẹwụ nịnị oseratẹmẹ ẹ̀ sị ụtọ pe ẹtẹ. 10Ọnị Ẹnẹyịmavara Ochẹtẹẹngụ ka, ọnịvị awụ nịnị ọnị kụkụ vị nị. Ọnị vaa dọ atẹmẹ anị hụrẹ ẹwụ nịnị ụvọ. Ọnị ọ́ ma vana zẹẹ ka we sere wa nịnị. Ọnị ọ ma rẹ vana zẹẹ ka waa tẹsị ẹngụ awụ nịnị ịnyara kẹnẹ. Ọnị vaa dọ atẹmẹ anịị hụrẹ ẹwụ nịnị ụvọ ọnị ẹ́ ma vana zẹẹ ka waa sị waa mẹ ụngwẹ nịnị.

Oseratẹmẹ ọyịza

11Ọnị Ẹnẹyịmavara Ochẹtẹẹngụ aa kà a yị wụ nịnị ka, ọnị-ụvọta venee sì atẹmẹ, dị ọnị aa tẹsị ẹnịnị. 12Ọnị vaa tẹsị ẹnịnị anka oseratẹmẹ mẹẹ tẹsị atẹmẹ anị ana gara hi dị a varẹma kụ wa va gu avọọ. Ọ kà ọnị vaa kụ waa vaavẹ hụrị avaba aha ana á gara wa ne hi ịnị ụmẹ odivi ọnị ẹngụkata si tu wa. 13Ọnị vaa kụ waa gụ hụrị ẹkụra ọsa, dị ọnị kụ wa vavẹ eehi ẹnịnị. Ọnị vaa kụ wa varẹma naa rị ịzị avị ọyịza-ọyịza hi ịnị ataba Isirẹrị, dị ọnị aa kụ wa nee hú enyi ịnị okuha ene hi Isirẹrị. 14Ọnị vaa kụ wa naa rị ịzị avị ozoza-ozoza hi, dị ẹ rẹ yaa naa rị ịrẹsụ ataba ene hi Isirẹrị. Ẹnịnị vaa sụ̀tẹtẹẹ hi ịzị avị ozoza-ozoza hi ịzọọ, dị ẹyaa rị avị ọyịza-ọyịza ịnị ataba Isirẹrị. 15Ẹnẹyịmavara Ochẹtẹẹngụ ka, ọnị ụvọta o venee sere atẹmẹ anị nị. Ọnị vaa mẹ ka ẹ̀ sụ̀tẹtẹ hi ẹtẹ. 16Ọnị vee sị̀ ẹnị ene vu, ọnịrị ẹnị ana sị ha hụrẹ oze, dị ọnị kụ́ wa vavẹ eehi. Ẹnị ana ahụ aa zị, ọnị vaa jị ịsaa sụ ọ yị wa. Ọnị vaa mẹ ka ẹnị ana tụ ọkụmị ẹ̀ nyị ụkata. Ọnị vaa si eyi pe ẹnị ẹbanyị-ẹbanyị ana nyị ụkata, dị ọnị aa sị ịzẹyịza pa avaba ẹnịnị. 17Ẹnẹyịmavara kà àa vị ẹwụ nịnị ịsụpa anị yọ, ọnị vaa mẹ̀ ọkarẹyị ịrẹyị ọzịnya-ọzịnyara awụ nịnị. Ọnị vaa ha atẹmẹ ọyịza ọnịrị edivii hi, dị ọnị rẹ ha ịdẹba ọnịrị ịdẹ nịnị hi. 18Avị ọyịza-ọyịza ọnị waa rị nịnị é yị zee aza ẹnyị awụ nịnị. Ẹnịnị ẹ̀ẹ sị rị, dị ẹ sị ahụ sìsi ana vọ hi ẹtẹ. Èe ree hú enyi ene nyeeyi, dị ẹ sị ahụ wụ́ ụdọ hi ana vọ. 19Dị ahịka avị ẹnẹ ẹ sị ahụ sìsị va hi ẹtẹ atẹmẹ anị ana vọ aa rị nị, dị e re yee hú enyi ana aza ẹnyị awụ nịnị sị ahụ wụ́ ụdọ hi. 20Avọọ, ọnị Ẹnẹyịmavara Ochẹtẹẹngụ aa kà a booro aanị ka, ọnị vaa mẹ̀ ọkarẹyị ịrẹyị ẹwụ nịnị atẹmẹ ana nyị ụkata ọnịrị ẹnị ana tụ ọkụmị. 21Ọ kà, atẹmẹ ẹnị ẹngụ aa zị, vị ọnị waa tụ ụvọ vaa hi akaha nịnị, dị ụ dụ wa va hi ozi nịnị. 22Ama ọnị vaa dọ atẹmẹ anịị ha; aza ẹ́ yị ma vana mẹ wa ẹnẹ ẹzụ mẹ ẹvụ. Ọnị vaa mẹ̀ ọkarẹyị ịrẹyị atẹmẹ anị ikonyi-ikonyara. 23#Ẹtẹ 7.17Ọnị vaa nyị oseratẹmẹ ọnya, ene vee sere wa anka ozi ahụ anị Idevidi, dị aa tẹsị ẹnịnị. 24#Ezk 37.24Ẹnẹyịmavara kà ọnị ọ sị ọ ka, ọnị vaa vị Ohomorihi ẹnịnị, dị ọza ịnyara vị ohinọyị ẹnịnị anka ozi ahụ anị Idevidi avọọ. 25Ọnị vaa mẹ eto beri wa, dị ẹ̀ nyị ẹngwọọrọ. Ọnị vaa dụ avaba uye edivi-edivi hụụnị ẹtẹ ẹnịnị agụvị ẹ̀ẹ yaa sụ̀ ara ịnị avị ọnịrị ịnị ụnọmị, asị a nyị ịsị ẹ mẹ̀ wa. 26Ọnị vaa mẹ ka ò zé yị wa, dị ẹnịnị rá kara ataba anị. Ọnị vaa zụ orihi yị wa chụụchụ ụmẹ tụra ụmẹ ọnị ee yee sị ọ. Orihi ọnọọ vị ana vaa mẹ ka ò zé yị wa. 27Ọchị ene hi ịnị aarẹ vaa tụ ẹtụtụ, ịsị ịnị aarẹ vaa mẹ ẹtẹẹtẹrẹ, dị ọzọza ra hị́ ẹtẹ anị ẹngwọọrọ-ẹngwọọrọ. Ịjị ọnị ọọ ree che ọchị ana a sị tụ wa ọkẹẹkẹrẹ, dị ọnị raa dọ wa hụrị ụvọ aza ana za wa ọrịhị nị, ẹnịnị vaa yẹ ka ọnị ọ vị Ẹnẹyịmavara nị. 28Ẹnịnị ẹ́ yị ma vana vị ịsọyịrị yị anẹkụra-ẹkụra nịnị. Uye edivi ẹ́ yị ma vana na wa rị. Ẹnịnị vaa ra ẹngwọọrọ-ẹngwọọrọ; dị ẹ́ yị nyị ọza ene kuku ee chire wa angwa. 29Ọnị vaa sị ẹtẹ anaa mẹ̀ ịsa ẹtẹẹtẹrẹ yị wa, dị ọnị mẹ ka asị ụngwẹ vana kụkụ kụ ịnị ẹtẹ ẹnịnị. Anẹkụra ana vọ ẹ́ yị ma vana kụ wa isiya. 30Ẹnẹyịmavara kà avaba aza vaa yẹ ka Anisirẹrị nịnị vị aza anị. Ọnị Ohomorihi ee sere wa nị. 31Ọ kà, ẹwụ nịnị atẹmẹ anị, ọnị ọnị aa pa vị aza anị, dị ọnị vị Ohomorihi awụ nịnị nị.

Currently Selected:

Ezikẹẹrị 34: EBTP

Highlight

Copy

Compare